Mukanda wa Kumpala wa Ba nfumu

20 Binobino nfumu Ben-hadade a Siri nkubunga kiluilo kiaye kioso kia basalayi pamune na bangi ba nfumu 32 na nfualasa yabo na matempu aabo; Aye nkukaamina, nkuifunyisha Samadiya na nkumuluisha ngoshi. 2 Akupu aye nkutuma mikiendi kui nfumu Akabe a Isalele mu kibundi na nkumulungula’shi: “Ben-hadade bakula bino’shi, 3 ‘Kiamo kiobe kia arja na ôlo mbiande, mpa na bakashi bobe be buwa ngofu na bana bobe balume.’” 4 Biabia nfumu a Isalele nkualula’shi: “Muyile eyi diobe, muanana nfumuami, ami na bintu biande bioso tui bobe.”

5 Akupu mikiendi ibalukiile na yakula’shi: “Ben-hadade bakula bino’shi, ‘Nakutumina mukiendi’shi: “Ompa kiamo kia arja kiobe, ôlo oobe, bakashi bobe na bana bobe balume.” 6 Anka malooba mu ino nsaa, nakutumina bafubi bande, na abakimbuula kalolo mu nshibo yobe na mu mashibo a bafubi bobe, na baate bintu biobe bioso bia muulo, bafikie nabio.’”

7 Biabia nfumu a Isalele nkuitanyina bakulu boso ba muiumbo na nkuakula’shi: “Talayi namu uno muntu biakimbi kuitutuadila dikienga, muanda ekalanga mutekie bakashi bande, bana bande balume, kiamo kiande kia arja na ôlo ande, na ntshi mupele.” 8 Akupu bakulu boso na bantu boso nkumulungula’shi: “Tokookielanga na tokumiinanga.” 9 Biabia aye nkulungula mikiendi ya Ben-hadade’shi: “Lungulayi muanana nfumuami’shi, ‘Bioso biekalanga mutekie mufubi aaye kumpala nebikitshi, anka bua bino ntshimulombene kuibikita.’” Nyi mikiendi kuenda na nkumutuadila mukandu.

10 Biabia Ben-hadade nkumutumina uno mukiendi’shi: “B’efile banyokie ngofu su mu Samadiya amuikala lufufi lukumbane kuusha eyasa dia muntu oso a ku bantu abandondo!” 11 Nfumu a Isalele nkualula’shi: “Mulunguleyi’shi, ‘Muntu mufuale ngabo aaye tabitungu etumbishe bu muntu amufuulu.” 12 Nka’ye ki’apusha lualua lualulo, pabaadi aye na ba nfumu abatomo mu tushibo tuabo tua mapema* balunguile bafubi baye’shi: “Elumbuuleyi bua kuibaluisha ngoshi!” Biabia abo nkuilumbuula bua kuluisha kibundi ngoshi.

13 Anka ungi mutemuki nkuenda kui nfumu Akabe a Isalele na nkumulungula’shi: “Yehowa bakula bino’shi, ‘Bomono kino kibumbu kioso kikata kia bantu? Lelo uno nakupa kianka mu maasa mobe, paapa ouku’shi ne Yehowa.’” 14 Akabe nkuipusha’shi: “Kukiila kui nanyi?” aye nkualula’shi: “Yehowa bakula bino’shi, ‘ Nkukiila kui bafubi ba ba nfumu ba ma provense.’” Nyi Akabe nkuipusha’shi: “Nnanyi abanga ngoshi?” Aye nkualula’shi: “Nnobe!”

15 Akupu Akabe nkubadika bungi bua bafubi ba ba nfumu ba ma provense, babaadi 232; kunyima kua biabia, aye nkubadika basalayi ba bena Isalele boso babaadi 7 000. 16 Babatuukile mu midi pabaadi Ben-hadade na ba nfumu 32 babaadi abamukuasha abatomo mu tushibo tua mapema* na mbakuatshikie. 17 Pabaadi bafubi ba ba nfumu ba ma provense batuukie kumpala, mususa umune Ben-hadade nkutuma mikiendi. Abo nkumulungula’shi: “Basalayi babatuuku mu Samadiya.” 18 Nyi aye nkuakula’shi: “Su babatuuku bua butaale, ebakuateyi na muwa; sunga batuuka bua ngoshi abitungu nuibakuate nka na muwa.” 19 Anka pabaadi bafubi ba ba nfumu ba ma provense na biluilo bia basalayi bibaadi abibalondo batuukie mu kibundi, 20 oso a kuabadi nkuipaa muishikuanyi aaye. Akupu bena Siri nkusuuka na bena Isalele nkuibalonda, anka nfumu Ben-hadade a Siri nkusuuka pa nfualasa na bangi bantu abatambushaa nfualasa. 21 Anka nfumu a Isalele nkutuuka na nkutungunuka na kuipaa bantu babaadi bakaamine pa ma nfualasa na pa matempu na nkutshokola* bena Siri ngofu.

22 Kunyima yawa mutemuki nkuenda kui nfumu a Isalele na nkumulungula’shi: “Enda, welumbuule bua kuikaluila na wele binangu ku akitungu’shi okite, muanda ku mbangilo kua kipua akifiki nfumu a Siri akakaamina bua nkuluisha ngoshi.”

23 Binobino bafubi ba nfumu a Siri nkumulungula’shi: “Efile Mukulu aabo nyi Efile Mukulu a miengie. Nyi buakinyi bekeele betukile bukome. Anka su tualua nabo pa mbalo ibatame atuibakidi bukome. 24 Dingi, kita bino: Katusha ba nfumu boso pa ma mbalo aabo na otuule ba guvernere. 25 Akupu obungie* kiluilo kia basalayi ki mumune na kioyikalanga mushimishe, na bungi bua nfualasa na bua matempu a ngoshi bui mumune na bua kumpala. Biabia tulue nabo pa mbalo ibatame, na atuibakidi binyibinyi bukome.” Nyi aye nkuteemesha elango diabo na nkukita nka biabia.

26 Ku mbangilo kua kipua,* Ben-hadade nkubunga bena Siri na nkukaamina ku Afeke bua kuluisha Isalele ngoshi. 27 Bena Isalele babaadi n’abo babungibue, bebapa bia kudia na batuuka mu kufumanka na bena Siri. Pabaadi bena Isalele batuule kishalelo kumpala kuabo, babaadi nka bu tu bisaka tubidi tua mbushi, aku namu bena Siri babaadi baushe nsenga yoso. 28 Akupu muntu a Efile Mukulu a binyibinyi nkuenda kui nfumu a Isalele na nkumulungula’shi: “Yehowa bakula bino’shi, ‘Pa muanda bena Siri babakula’shi: “Yehowa nyi Efile Mukulu a miengie, ta Efile Mukulu a ma mbalo abatame,” Natuulu kino kibumbu kikata kioso kia bantu mu maasa oobe, na abauku binyibinyi’shi ne Yehowa.’”

29 Babaadi bashale mu kishalelo betalene munda mua mafuku musambobidi, na muifuku dia musambobidi ngoshi nkubanga. Bena Isalele nkuipaa muifuku dimune basalayi ba bena Siri 100 000 abatambukaa lua ngua. 30 Na babaadi bashale nkusuukila ku Afeke, mu kibundi. Anka mudimba nkuponena bantu 27 000 babaadi bashale. Ben-hadade namu nkusuuka, nkutuela mu kibundi na nkufuama mu kadimbo ka munda ngofu.

31 Biabia bafubi baye nkumulungula’shi: “Tala, tuibapushe’shi ba nfumu ba nshibo ya Isalele mba nfumu bena lusa.* Etutadiile namu tufuale ma mpaya mu bifuka bietu na tuanye mioshi ku mitue yetu tuende kui nfumu a Isalele. Pangi ekupaasha muwa* oobe. 32 Biabia abo nkufuala ma mpaya mu bifuka biabo, nkuanya mioshi ku mitue yabo, nkutuela mui nfumu a Isalele na nkuakula’shi: “Mufubi oobe Ben-hadade bakula’shi, ‘Ntandiile namu na muwa.’”* Aye nkualula’shi: “Ki na muwa?” Nnyi mukuetu. 33 Baba bantu nkuibiata bu kitunduilo ki buwa na nkushinguula’shi akitshi binyibinyi kiakia kibakula, biabia abo nkumulungula’shi: “Ben-hadade nyi mukuenu.” Aye nkuakula’shi: “Ndayi na nufikie naye.” Akupu Ben-hadade nkuenda kuadi na aye nkumulungula buadia kukaamina muitempu.

34 Binobino Ben-hadade nkumulungula’shi: “Nalusha bibundi bibaadi nshami muate kui nshobe, na we kutuula bisalue* mu Damase, nka bu bibaadi nshami mukite mu Samadiya.”

Akabe nkualula’shi: “Muyile kino kilombeno nakutadiila wende.”

Biabia aye nkukita naye kilombeno na nkumutadiila enda.

35 Ku eyi dia Yehowa, umune a ku bana balume ba batemuki* nkulungula muntu abaabadi naye’shi: “Nkupile namu.” Anka yawa muntu nkupela kumukupila. 36 Biabia aye nkumulungula’shi: “Pa muanda bopele kuteemesha eyi dia Yehowa, nka atue bakiabelekena nobe ntambue akuipaa.” Nka n’abo kuilekena naye ntambue nkufika kuadi na nkumuipaa.

37 Aye nkupeta ungi muntu na nkumulungula’shi: “Nkupile namu.” Biabia yawa muntu nkumukupila na nkumutapa.

38 Akupu yawa mutemuki nkuenda na nkutengiela nfumu ku bukunkula bu’eshinda, muianye kilamba ku meso bua kuifuamisha. 39 Pabaadi nfumu akidi bamuelele musaase’shi: “Mufubi oobe endanga ku mbalo ya ngoshi ibukopo na kuikeele umune a ku basalayi fikile na muntu kuandi andungula’shi, ‘Lama uno muntu. Su bashimina muwa oobe awata mbalo ya muwa waye,* sunga’shi ofutu ntalanta* umune a kiamo kia arja.’ 40 Na apekalanga mufubi oobe akitshi mifubo aku na aku, mususa umune yawa muntu basuuku.” Nfumu a Isalele nkumulungula’shi: “Biabia nyi abikala kiimu kiobe; buetshibila kianka obe nabene.” 41 Akupu aye nkukaasha bukidibukidi kilamba ku meso kuaye, na nfumu a Isalele nkutundula’shi baadi umune a ku batemuki. 42 Aye nkumulungula’shi: “Yehowa bakula bino’shi, ‘Pa muanda botadiila yawa muntu anekeele mukulungule’shi abitungu abutudibue basuuku mu maasa mobe, abitungu muwa oobe wate mbalo ya muwa* waye, na muilo oobe wate mbalo ya muilo waye.’” 43 Biabia nfumu a Isalele nkuenda ku nshibo yaye ku Samadiya, muinyongole na mukalakashue.