Mukanda wa Kabidi wa Ba nfumu
19 Nka nfumu Ezekiya ki’apusha ano mayi, basanuine bilamba biaye epuuta mpaya na atuela mu nshibo ya Yehowa. 2 Akupu batumine Eliyakime baadi atala nshibo ya nfumu,* Shebena mufundi na bakulu na ba tshite muakuidi mbafuale ma mpaya kui mutemuki Yeshaya muana a Amoze. 3 Abo nkumulungula’shi: “Ezekiya bakula’shi: ‘Lelo uno nyi efuku dia dikienga, dia kusashilua* na dia kusengiibua; muanda bana tabadi pepi na kutandikua,* anka takui bukome bua kutanda. 4 Pangi Yehowa Efile Mukulu oobe apusha mayi oso a Rabishake abadi batume kui nfumuaye, nfumu a Asiri bua kolomona Efile Mukulu e na muwa na akamufutu bua mayi abapusha Yehowa Efile Mukulu oobe. Biabia teka bua baba babashala na muwa.’”
5 Kunyima kua bafubi ba Nfumu Ezekiya kulungula Yeshaya wawa mukandu, 6 Yeshaya bebalunguile’shi: “Bino nyi abitungu’shi nulungule nfumu eenu, Yehowa bakula bino’shi: “Tanutshinanga pa muanda wa mayi anubapusha, mayi ababankaa kui bafubi ba nfumu a Asiri. 7 Neele muadi kinangu,* akapusha mukandu kampanda na alukiile mu nsenga yaye; na nakakitshi bia’shi ayipayibue ku lupete lua ngoshi mu nsenga yaye.”’”
8 Kunyima kua Rabishake kupusha’shi nfumu a Asiri baadi mukatukie ku Lakishe, baadi mualukiile kuadi na amupeta kuete kulua ngoshi na Libena. 9 Binobino nfumu bapushishe abakula pabitale nfumu Tiraka a Etshopi’shi: “Bafiki mu kukuluisha ngoshi.” Biabia aye nkutuma dingi mikiendi kui Ezekiya nkuakula’shi: 10 “Bino nyi abitungu nulungule nfumu Ezekiya a Yunda’shi: ‘Totadilanga Efile Mukulu oobe odi mukulupile akudimba pa kuakula’shi: “Yelusalema t’akatudiibua mu maasa a nfumu a Asiri.” 11 Tala! We mupushe bikite ba nfumu ba Asiri maumbo oso pa kuiabutula. Nk’obe bupenka nyi akapaashibua su? 12 B’efile ba miilo ibaadi bamashami kulu babutule babaadi beyipaashe su? Gozane, Arane, Resefe na bantu ba mu Edene babaadi mu Telasare be kunyi? 13 Nfumu a Amate, nfumu a Arpade na nfumu a kibundi kia Sefarwayime, a kia Ena na a kia Iwa be kunyi?
14 Ezekiya nkuata mikanda mu maasa mua mikiendi na nkuiyibadika, akupu Ezekiya nkukaamina ku nshibo ya Yehowa, na nkuiyadisha kumpala kua Yehowa. 15 Na Ezekiya nkubanga kuteka kumpala kua Yehowa, nkuakula’shi: “Ô Yehowa Efile Mukulu a Isalele, obe mushale kunundu* kua bakeluba, nnobe bupenka Efile Mukulu a binyibinyi a mafumu a pa nsenga. We mupangie eyilu na nsenga. 16 Tee matui Ô Yehowa na opushe! Buula meso oobe Ô Yehowa na omone! Pusha mayi abatumu Senakeribe bua kolomona Efile Mukulu e na muwa. 17 Ô Yehowa, mbinyibinyi’shi ba nfumu ba Asiri mbabutule miilo na maumbo ayo. 18 Na mbele b’efile babo mu kaalo muanda tabekeele b’efile, anka nyi mufubo wa maasa a bantu, mitshi na mabue. Nyi buakinyi mbebabutule. 19 Anka binobino Ô Yehowa Efile Mukulu eetu, etupaashe namu ku maasa aaye bua’shi mafumu oso a pa nsenga aukie’shi obe bupenka nyi Efile Mukulu, Ô Yehowa.”
20 Akupu, Yeshaya muana a Amoze nkutumina Ezekiya uno mukandu’shi: “Yehowa Efile Mukulu a Isalele bakula bino’shi: ‘Napusha luteko lobe kuandi pabitale nfumu Senakeribe a Asiri. 21 Yehowa bakula dino eyi pabimutale’shi:
“Muana mukashi kamame a Siyona bakubepuula, bakusepe.
Muana mukashi a Yelusalema bapuku mutue waye bobe.
22 Nnanyi obolomona na kukaa?
nnanyi obokaamishila eyi diobe
na kuibuesha meso oobe a kuitatula?
Nyi nga Kishila a Isalele!
23 Bolomona Yehowa kukiila kui mikiendi yobe na buakula’shi:
‘Na matempu ande a ngoshi e bungi,
nakaamina ku nsongo ya miengie,
bipindi bi kula ngofu bia Lebanone.
Nnatshibi mitshi yaye ya sedre ibula, mitshi yaye ya jenevriye ibuwa ngofu.
Nnatuele mu ma mbalo aaye afuame e kula ngofu. Na mu mitamba yaye i na mitshi ibungi.
24 Nnabundula mishima na kutoma mema aafiki mu angi maumbo;
Nnaumisha nsulo* yoso ya mema a Ejipitu na biashino bia ngua yande.’
25 Tue mupushe su? Mbiatshibue kitshibilo kubanga kala.
Nemuibilumbuule kubanga mafuku a kala.
Binobino nebikumbasha.
Okekasha bibundi binyingishibue bu ma mbalo aluishibue.
26 Bantu babo bashale muanka abakekala bu bantu bashi na bukuashi;
Abakapusha moo na kukuatshika buufu,
Abakekala bu lubishi lua mu mafuba na bu lubishi luana,
Bu lubishi lua ku musaka luabadi baumishe kui lupapi lua kutunduka nguba.
27 Nauku kalolo p’oshala, p’otuuku, p’otuele,
Na podi munfiitshile munda,
28 Muanda nsungu yodi munfiitshile na kukungula kobe bibafiki ku matui kuande.
Biabia nele ndobo ande mu mpembe mobe, na moshi* wande pankatshi pa milomo yobe,
Na nakualusha muishinda dioyikeele mufikile.”
29 Na kino nyi kitunduilo bobe,* kino kipua anukadi bintu biimenene* abio binabene; mu kipua kia kabidi anukadi ntete imene mu yaaya mbalo imune; anka mu kipua kia kasatu anukakunu mbio na kuumbula na anukakunu mitshi ya nfinyo na kudia tukuba tuayo. 30 Baba ba mu nshibo ya Yunda basuukie, baba bashale abakamene mishi muushi na kupaa bikuba kuiyilu. 31 Muanda bantu bashale abakatuuku mu Yelusalema na bantu bapande abakatuuku ku Muengie wa Siyona. Kisumi kia Yehowa a biluilo akikakitshi bino.
32 “Biabia Yehowa bakula bino pabitale nfumu a Asiri:
“T’akatuele mu kino kibundi
Sunga kuasa mukietue muanka
Sunga kulua nakio na ngabo
Sunga kukita lubunda lua nsenga bua kuikifunyisha.
33 Alukiila muishinda diadi mufikile;
T’akatuele mu kino kibundi,” nyi abiakula Yehowa.
34 “Nakaluila kino kibundi ngoshi bua kuikipaasha pa muanda wande
Na pa muanda wa mufubi ande Davide.”’”
35 Mu buabua bufuku, muikeyilu a Yehowa nkutuuka na nkuipaa bantu 185 000 mu kishalelo kia bena Asiri. Pabaadi bantu babuukie ku namashika buee, babamuene biabia bitanda bioso. 36 Biabia nfumu Senakeribe a Asiri nkukatuka na nkualukiila ku Ninive na aye nkushala kuakua. 37 Pabaadi muiname ku nshibo y’efile aaye Niseroke, bana baye balume Adalameleke na Sharezere nkumuipaa ku lupete lua ngoshi, akupu abo nkusuukila mu nsenga ya Ararate. Na muana aaye Esakadone nkufika nfumu pa mbalo yaye.