Mukanda wa kumpala wa Kuilondena kua Mianda
23 Pabafikile Davide mununu, na pabaadi taadi ku nfudiilo kua muwa waye, batuudile muana aye Salomone bu nfumu a Isalele. 2 Akupu babungile bakunkushi boso ba Isalele, ba tshite muakuidi na bena Levi. 3 Bababadikile bena Levi babaadi na bipua 30 na kukila paapa, na bungi buabo bubaadi 38 000. 4 Bantu 24 000 ba kuabadi babaadi abafubu bu bakunkushi ba midimo ya mu nshibo ya Yehowa, na kubaadi bakunkushi na ba nsushi 6 000, 5 na kubaadi balami ba ku biibi 4 000, bantu 4 000 babaadi abatumbisha Yehowa na biombuanga bibaadi Davide muakuile’shi: “Ne muibikite bua kutumbisha nabio Efile Mukulu.”
6 Akupu Davide nkuibatshibuula mu bisaka muyile bana ba Levi: Gershone, Kehate na Merari. 7 Bua bena Gershone kubaadi: Ladane na Shimeyi. 8 Bana ba Ladane babaadi: Yekiele baadi mukata, Zetame na Yowele, babaadi basatu. 9 Bana ba Shimeyi babaadi: Shelomote, Aziele na Arane boso babaadi basatu. Bano nyi babaadi ba nfumu ba bifuko bia bena Ladane. 10 Bana ba Shimeyi babaadi: Yahate, Zina, Yeushe na Beriya. Boso bananka babaadi bana ba Shimeyi. 11 Yahate baadi nfumu na Ziza amulondela. Kadi bu bishibaadi Yeushe na Beriya na bana balume bebungi, babaadi abebaata bu kifuko kimune na babaadi abebapa mudimo umune.
12 Bana ba Kehate babaadi: Amalame, Isala, Ebrone na Uziele, bananka. 13 Bana ba Amalame babaadi Alona na Moyise. Kadi Alona na bana baye babaadi batuudibue ku lupese bua kuikasha Mbalo Ikile Kishila iselele, bua kutuusha milambu kumpala kua Yehowa, kumufubila na kuelela bantu miabi muishina diaye mafuku oso. 14 Kadi bua Moyise muntu a Efile Mukulu a binyibinyi, mashina a bana baye abaadi mu mashina a bantu ba kisamba kia Levi. 15 Bana ba Moyise babaadi: Gershome na Eliezere. 16 Mu bana ba Gershome, Shebuele nyi baadi nfumu. 17 Mu bana ba Eliezere, Rehabiya nyi baadi nfumu, Eliezere tabaadi na bangi bana, kadi Rehabiya baadi na bana bakile bungi. 18 Mu bana ba Isala Shelomite nyi baadi nfumu. 19 Mu bana ba Ebrone, Yeria nyi baadi nfumu, Amariya nyi baadi mumulondele, Yahaziyele a kasatu na Yekameame a kananka. 20 Mu bana ba Uziele, Mika nyi baadi nfumu, na Ishia nyi baadi mumulondele.
21 Bana ba Merari babaadi Maheli na Mushi. Bana ba Maheli babaadi Eleazare na Kishe. 22 Kadi Eleazare bafuile kushi kutanda muana mulume, baadi penda na bana bakashi. Biabia bana balume ba Kishe, bakuabo* ba mu kifuko babaadi bebayibakile. 23 Bana ba Mushi babaadi Maheli, Edere na Yelemote, boso babaadi basatu.
24 Bano nyi bana ba Levi babaabadi bafunde mashina muyile bifuko biabo na muyile ba nfumu ba bifuko biabo. Bababadikile bena Levi babaadi na bipua kubanga pa 20 mpa na kukaamina na bafunda mashina aabo, abo nyi babaadi abakitshi mudimo wa mu nshibo ya Yehowa. 25 Muanda Davide bakuile’shi: “Yehowa Efile Mukulu a Isalele mmupe muilo waye butaale, na akashala mu Yelusalema bua loso. 26 Dingi, bena Levi tabekala’nyi abatuala tabernakele sunga bintu biabafubishaa muanka bua kukita mudimo.” 27 Nyi buakinyi muyile mayi a nfudiilo a Davide, bababadikile bena Levi babaadi na bipua kubanga pa 20 mpa na kukaamina. 28 Mudimo wabo ubaadi wa kukuasha bana ba Alona bua kukita mudimo wa mu nshibo ya Yehowa. Babaadi na bushito bua kutala mu lupango, mu tudimbo tua kudiila, kuikasha bintu bioso biselele na kukita kioso kibaadi akitungibua bua mudimo wa nshibo ya Efile Mukulu a binyibinyi. 29 Babaadi abakuasha’nyi bua kulumbuula mikate ya kutuula mu milongo, bukula buibuwa bua milambu ya ntete, galete yabashi bele kitatusho, tu mikate tuabadi bakitshine mu mpano, bukula buabadi basobe kalolo, na babaadi abatala bintu bioso bia kupima nabio bungi na bukata. 30 Babaadi na kia kuikala panka ku namashika koso na ku kiolua bua kutumbula na kutumbisha Yehowa. 31 Babaadi abakuasha nsaa yoso ibabaadi abalambula Yehowa milambu ya kushiika kaalo mu mafuku a Sabato, pa kubaluka kua mueshi na mu bipungo bia misangelo. Babaadi abakitshi biabia pa kiubishi kumpala kua Yehowa, muyile bungi bubaabadi batshibe kui miiya pa bibatale. 32 Babaadi abakitshi dingi midimo yabo pabitale kashibo k’epema, na mbalo ya kishila na pabitale bakuabo bana ba Alona bua mudimo wa nshibo ya Yehowa.