Mukanda wa kumpala wa Kuilondena kua Mianda

4 Bana ba Yunda babaadi: Pereze, Esrone, Karmi, Ure na Shobale. 2 Reaya muana a Shobale batandile Yahate, Yahate nkutanda Akumai na Lahade. Bino nyi bibaadi bifuko bia bena Sorea. 3 Bano nyi bana ba nshaye na Etame: Izreele, Ishima na Idibashe (na mukuabo mukashi babaadi abamuitanyina bu Aseleleponi), 4 Na Penuele batandile Gedore, Esere nkutanda Usha. Bano nyi babaadi bana ba Ure muana mbedi a Efrata, nshaye na Beteleme. 5 Asheure nshaye na Tekoa baadi na bakashi babidi: Kela na Naara. 6 Naara nkumutandila Ahuzame, Kefere, Temane na Ahashetari. Bano nyi babaadi bana ba Naara. 7 Na bana ba Kela babaadi: Zerete, Isala na Etane. 8 Kose batandile Anube, Zobeba, na bifuko bia Aharbele muana a Arume.

9 Babaadi abanemeka Yabese kukila bangi bakuabo boso; na nyinaye bamuudikile bu Yabese,* amba’shi: “Ne mumutande mu mitanyo.” 10 Yabese batekiele Efile Mukulu a Isalele, amba’shi: “Ngielele namu miabi, otamishe nsenga yande, na eyasa diobe dikale nami. Nkaluile namu bua’shi muanda wibubi taunfikilanga!” Paapa, Efile Mukulu nkulombasha biabia bibatekiele.

11 Kelube mukuabo na Shuka batandile Mekire, yawa baadi nshaye na Eshetone. 12 Eshetone batandile Bete-rafa, Paseya na Tehina, nshaye na Ire-nakashe, bano babaadi bantu ba ku Reka. 13 Na bana ba Kenaze babaadi: Otenyele na Selaya, na muana a Otenyele baadi Atate. 14 Meonotayi batandile Ofra. Selaya batandile Yoabe, nshaye na bantu ba muibanda dia Ge-harashime.* Diadia ebanda babaadi abeditanyina biabia, muanda babaadi ba nsendue.

15 Bana ba Kalebe muana a Yefune babaadi: Iru, Ela na Naame; muana* a Ela baadi Kenaze. 16 Bana ba Yehalelele babaadi: Zife, Zifa, Tireya na Asalele. 17 Bana ba Ezera babaadi: Yetere, Merede, Efere na Yalone; baadi* muimite atanda Miriame, Shamai, na Ishiba nshaye na Eshetemoa. 18 (Na mukashi aaye muina Yunda batandile Yerede nshaye na Gedore, Hebere nshaye na Soko na Yekutiyele nshaye na Zanowa.) Baba nyi babaadi bana ba Bitiya, muana mukashi a Faraone abaabadi bebakile kui Merede.

19 Bana ba mukashi a Odiya, mukuabo mukashi na Nahame babaadi ba nshaye na bena Keila muina Garmi, na Eshetemoa muina Maakate. 20 Na bana ba Shimone babaadi: Amenone, Rina, Bene-hanane na Tilone. Na bana ba Ishi babaadi: Zohete na Bene-zohete.

21 Bana ba Shela muana a Yunda babaadi: Ere nshaye na Leka, Lada nshaye na Maresha, na bifuko bia bantu babakitanga bilamba bi buwa bukile ba ku Ashebea, 22 na Yokime, bantu ba ku Kozeba, Yoashe na Sarafe babaadi bebakile bakashi ba bena Moabe, na Yashubi-leheme. Ino mianda yabadi bafunde ngia kala.* 23 Babaadi ba mbuufi babaadi bashale mu Netayime na mu Gedera. Babaadi bashale muamua na babafubilanga nfumu.

24 Bana ba Simeone babaadi: Nemuele, Yamine, Yaribe, Zera na Shaule. 25 Shaule batandile Shalume, Shalume nkutanda Mibisame, na Mibisame nkutanda Mishema. 26 Na bana ba Mishema babaadi: Amuele, Amuele nkutanda Zakure, na Zakure nkutanda Shimeyi. 27 Na Shimeyi batandile bana balume 16 na bana bakashi basamombo; anka bakuabo balume tababatandile bana bebungi, na kifuko kiabo su nkimune takibaadi na bantu bebungi bu bantu ba mu Yunda. 28 Babaadi bashale mu Beere-sheba, mu Molada, mu Azare-shuale, 29 mu Bila, mu Eseme, mu Tolade, 30 mu Betuele, mu Orma, mu Sikelage, 31 mu Bete-markabote, mu Azare-susime, mu Bete-biri na mu Sharaime. Biabia nyi bibundi bibaabashalele mpa na ku mbangilo kua bufumu bua Davide.

32 Babashalele’nyi mu Etame, Aine, Rimone, Tokene na mu Ashane, bibundi bitano. 33 Kusanga na tu bibundi tubaadi tuifunyishe bino bibundi, mpa na ku Baale. Ano nyi mashina aabo abaabadi bafunde muyile kuilondena kua ba nkambua babo, na ma mbalo abaabadi bashale. 34 Na Meshobabe, Yameleke, Yosha muana a Amasiase, 35 Yowele, Yehu muana a Yoshibiya, Yoshibiya muana a Selaya, Selaya muana a Ashiele, 36 na Eliyoenai, Yakoba, Yeshokaya, Asaya, Adiele, Yesimiyele, Benaya, 37 na Ziza muana a Shifi, Shifi muana a Alone, Alone muana a Yedaya, Yedaya muana a Shimiri, Shimiri muana a Shemaya; 38 bano bantu babadi batemune mashina aabo babaadi banfumu ba bifuko biabo, na bifuko bia bankambua babo bibafuimine ngofu. 39 Babayile ku kituelelo kia Gedore, ku lupese lua kutunduka nguba ku’ebanda, bua kukimba mbalo yakudishilanga mikooko yabo. 40 Nfudiilo a bioso, babapetele mbalo ibuwa ya kudishila nyema yabo, na yaaya nsenga ibaadi ikata, na mubaadi butaale kushi bantu ba kuibakalakasha. Bantu babaadi bemushale kala babaadi bena Hame. 41 Bano bantu babadi bafunde mashina, babafikile mu ino nsenga mu mafuku abaadi nfumu Ezekiya a mu Yunda akunkusha. Babasasuile tushibo tua mapema tua bena Hame, na abo nkuipaa bena Meune babaadi kuakua. Babaadi babutule baba bantu, na tankushale muntu su ngumune na muwa mpa na lelo uno. Akupu babashalele pa mbalo yabo, muanda kuakua kubaadi mbalo ya kudishila mikooko yabo.

42 Bangi bena Simeone, bana balume 500 babayile ku muengie wa Seyire, ku bukunkushi bua Pelatiya, Neariya, Refaya na Uziele, bana ba Ishi. 43 Babayipayile bantu babaadi bashale ba ku bena Amaleke, baba babaadi bekusuukile, na kuakua nyi kuabadi bashale mpa na lelo uno.