Mukanda wa kumpala wa Kuilondena kua Mianda

9 Babaadi bafunde bena Isalele boso mashina muyile kuilondena kua bifuko biabo, na mbafundibue mu Mukanda wa Ba nfumu ba Isalele. Babakuatshile Yunda benda naye ku Babilone pa muanda wa kukutua kuaye kua lulamato. 2 Mu bantu ba kumpala babalukile mu ma mbalo aabo mu bibundi biabo, mubaadi ndambo ya bena Isalele, ba tshite muakuidi, bena Levi na bafubi ba ku ntempelo.* 3 Na bangi bantu ba mu lutandua lua Yunda, lua Benyamine, lua Efraime na lua Manasee babashalele mu Yelusalema. 4 Utai muana a Amihude, muana a Omeri muana a Imeri muana a Bani a ku bekulu ba Pereze muana a Yunda. 5 Ku bana ba Shilo kubaadi Asaya muana mbedi na bana baye. 6 Ku bana ba Zera kubaadi Yewele na bakuabo 690.

7 Ku bana ba Benyamine kubaadi Salu muana a Meshulame muana a Odawiya muana a Asenuwa, 8 Ibeneya muana a Yeroame, Ela muana a Uzi muana a Mikeri, na Meshulame muana a Shefatia muana a Rewele muana a Ibeniya. 9 Na bakuabo babaadi 956 muyile kuilondena kua bifuko biabo. Bano bana balume boso babaadi ba nfumu ba bifuko bia bamashabo.

10 Mu ba tshite muakuidi mubaadi Yedaya, Yehoyaribe, Yakine, 11 Azariya muana a Ilikiya, muana a Meshulame, muana a Zadoke, muana a Merayote, muana a Akitube, mukunkushi a nshibo ya Efile Mukulu a binyibinyi, 12 Adaya muana a Yeroame muana a Pashure muana a Malikiya, Masayi muana a Adiele muana a Yazera muana a Meshulame, muana a Meshilemite, muana a Imere, 13 na bakuabo balume, ba nfumu ba bifuko bia bamashabo, bilobo bia ngoshi 1 760, bantu ba kukulupila babaadi belumbuule bua mudimo wa nshibo y’Efile Mukulu a binyibinyi.

14 Mu bena Levi mubaadi Shemaya muana a Ashube muana a Azerikame muana a Ashabiya a mu lutandua lua Merari; 15 Bakebakare, Ereshe, Galale, Matanya muana a Mika muana a Zikri muana a Asafe, 16 Obadia muana a Shemaya muana a Galale muana a Yedutune, na Berekiya muana a Asa muana a Elkana baadi mushale mu ma mbalo abaadi bena Netofa bashale.

17 Balami ba biibi babaadi Shalume, Akube, Talmone, Ahimane, na mukuabo Shalume baadi mukunkushi, 18 mpa nka na ku aa mafuku baadi ku kiibi kia nfumu dia kutunduka nguba. Bano nyi babaadi balami ba ku biibi bia ku bishalelo bia bena Levi. 19 Shalume muana a Koree muana a Ebyasafe muana a Kora na bakuabo balume ba mu kifuko kia nshabo babaadi abakunkusha mudimo wa balami ba ku kiibi kia nshibo y’epema, na bamashabo babaadi abakunkusha kishalelo kia Yehowa bu balami ba ku kituelelo. 20 Mu mafuku a kala, Finease muana a Eleazare nyi baadi mukunkushi aabo, Yehowa baadi naye. 21 Zekariya muana a Meshelemiya baadi mulami a ku kiibi kia kituelelo kia kashibo k’epema ka kufumankena.

22 Bantu boso babaabadi basangule bu balami ba ku bituelelo babaadi 212. Babaadi bashale mu ma mbalo aabo muyile bibaabadi bebafunde mu kuilondena kua bifuko biabo. Davide na Samuele muntu amonaa mianda babaadi bebatuule ku wawa mudimo wabo wabatulaa bantu ba kukulupila. 23 Abo na bana babo balume babaadi abakunkusha mudimo wa ku biibi bia nshibo ya Yehowa, nshibo y’epema. 24 Balami ba ku biibi babaadi ku mpese inanka: kutunduka nguba, kupona nguba, kunundu na kuushi. 25 Ku misango na misango, bakuabo balume babaadi abakatuka mu ma mbalo abaabadi bashale abafiki bua kufuba nabo pamune munda mua mafuku musambobidi. 26 Kubaadi ba nfumu* bananka ba balami ba ku biibi babaadi abakitshi mudimo wabapaa bantu ba kukulupila. Babaadi bena Levi, na babaadi abatala tudimbo* na tudimbo tua kulamina bintu bia muulo bia mu nshibo ya Efile Mukulu a binyibinyi. 27 Babaadi abatoosha bufuku bushima pa ma mbalo aabo mbefunyishe nshibo ya Efile Mukulu a binyibinyi, muanda babaadi na mudimo wa kuiyilama, kulama nfungula na kushitulanga ku kibelo ku nakashika efuku dioso.

28 Bangi ba kuabadi babaadi abatala bintu bia mudimo; babaadi abebibadika nsaa ibaabadi abebituesha na nsaa ibaabadi abebitusha. 29 Bangi ba kuabadi namu babaadi abatala bingi bina mudimo, bina mudimo bioso bia kishila, bukula buibuwa, nfinyo, muimu, oliba na muimu wa bome. 30 Bangi bana ba ba tshite muakuidi babaadi abasanga muimu wa bome, na bingi bintu bia mapembue bua kukita muimu wa kuela bantu. 31 Matitiya baadi umune a ku bena Levi, muana mbedi a Shalume muina Kora, baadi ku mudimo aukitaa bantu ba kukulupila wa kutala bintu bikangibue mu mpano. 32 Bangi bakuabo balume ba ku bena Kehate babaadi abatala mikate ya kulesha ibaabadi abakitshi efuku dioso dia sabato.

33 Bano babaadi ba tuyimba, ba nfumu ba bifuko bia bena Levi babaadi bashale mu tudimbo,* tababaadi abakitshi ingi midimo, muanda bibaadi abitungu’shi bekale ku mudimo bufuku na kanya. 34 Bano bantu babaadi ba nfumu ba bifuko bia bena Levi muyile kuilondena kua ba nkambua babo, babaadi ba nfumu. Babaadi bashalele mu Yelusalema.

35 Yeyele nshaye na Gibeone baadi mushale mu Gibeone. Maaka nyi baadi mukashi aaye. 36 Muana aaye mulume a kumpala baadi Abadone, bamulondela kui Zure, Kishe, Baale, Nere, Nadabe, 37 Gedore, Akiyo, Zekariya na Mikolote. 38 Mikolote batandile Shimeame. Abo boso babaadi bashale pepi na bakuabo balume mu Yelusalema, pamune na bangi bakuabo balume. 39 Nere batandile Kishe, Kishe nkutanda Saule, Saule batandile Yonatane, Malaki-shuwa, Abinadabe na Eshebaale. 40 Muana a Yonatane baadi Meribe-baale, Meribe-baale batandile Mika. 41 Na bana ba Mika babaadi Pitone, Meleke, Tarea na Akaze. 42 Akaze batandile Yara, Yara nkutanda Alemete, Azemawete na Zimeri. Zimeri nkutanda Mosa. 43 Mosa nkutanda Binea, Binea nkutanda Refaya, Refaya nkutanda Eleasa, Eleasa nkutanda Azele. 44 Azele baadi na bana basamombo, mashina a bana baye ngano: Azerikame, Bokeru, Ismaele, Sheriya, Obadia na Anana. Bano nyi babaadi bana ba Azele.