Yobo
1 Kubaadi muntu baadi mushale mu eumbo dia Uze eshina diaye dibaadi Yobo.* Baadi muntu mululame e na lulamato;* na baadi atshinyi Efile Mukulu, baadi asuuku kukita bubi. 2 Baadi na bana balume musambobidi na bana bakashi basatu. 3 Baadi na mikooko 7 000, tumelo 3 000, ngombe 1 000* na mpunda 500,* baadi na bafubi be bungi ngofu, biabia bafikile muntu mukata kukila bantu boso ba kutunduka nguba.
4 Oso a ku bana baye balume baadi akitshi musangelo waye musango ku nshibo yaye. Baadi ayitanyisha bakuabo bakashi basatu bua kudia na kutoma nabo. 5 Su mafuku a misangelo abapu, Yobo baadi ebetanyina bua kuibatoosha. Akupu baadi abuuku ku namashika buee bua kulambula milambu ya kushiika kaalo bua oso a kuabadi. Muanda Yobo baadi akula’shi: “Pangi bana bande balume mbakite miluisho na mbele Efile Mukulu mulua mu mashimba aabo.” Bino nyi bibaadi abikitshi Yobo misango yoso.
6 Efuku dibaadi bana ba Efile Mukulu a binyibinyi batuele bua kuimana kumpala kua Yehowa dibakumbene, na Satana namu batuelele munkatshi muabo.
7 Biabia Yehowa bayipuishe Satana’shi: “Ofiki kunyi?” Satana baluluile Yehowa’shi: “Nafiki mu kuifunya na mukutambakana pa nsenga.” 8 Nyi Yehowa nkuipusha Satana’shi: “Bomono* mufubi ande Yobo su? Takui muntu su ngumune bu’ye pa nsenga. Mmuntu mululame e na lulamato, atshinaa Efile Mukulu na asuukaa kukita bubi.” 9 Biabia Satana nkualula Yehowa’shi: “Yobo kuete kutshina Efile Mukulu bua bisumanga su? 10 Tuemuele lupango lumuifunyishe bua kumukaluila aye, nshibo yaye na bintu biaye bioso su? Wemuelele mufubo wa maasa aaye miabi, na bimunuanga biaye mbipalakane muiumbo. 11 Anka bua kushintula mianda, oola eyasa diobe, oluishe bioso biadi nabio na akakupele binyibinyi.” 12 Akupu Yehowa nkulungula Satana’shi: “Tala! Bintu biaye bioso bi muiyasa* diobe. Anka tokiengieshanga Yobo aye nabene!” Biabia Satana nkukatuka kumpala kua Yehowa.
13 Binobino, muifuku dibaadi bana ba Yobo balume na bana baye bakashi abadi na kutoma nfinyo mu nshibo ya tutu aabo mbedi, 14 mufubi bafikile kui Yobo na amulungula’shi: “Ngombe ikeele ayidimi na mpunda ikeele ayidi lubishi ku lupese luayo 15 pekeele bena Seba betutuukie ngoshi na beyata, na bayipa bafubi ku lupete lua ngoshi. Nka penda ami nyi bapanda bua kufika mu kukulungula.”
16 Pabaadi ki’akula, ungi bafikile na amulungula’shi: “Kaalo akafiki kui Efile Mukulu* kabayiki muiyilu na kabatembe munkatshi mua mikooko na bafubi na kabebatatshisha, nka penda ami nyi bapanda bua kufika mu kukulungula.”
17 Pabaadi ki’akula ungi bafikile na amulungula’shi: “Bena Kaldeya babakitshi bisaka bisatu na babafiki babakuata tumelo na babende nato, abayipa bafubi ku lupete lua ngoshi. Nka penda ami nyi bapanda bua kufika mu kukulungula.”
18 Pabaadi ki’akula, ungi bafikile na amulungula’shi: “Bana bobe balume na bana bobe bakashi abekalanga abadi na kutoma nfinyo mu nshibo ya tutu aabo mbedi. 19 Mususa umune kipapi kibukopo kibakatuka mu kabaaka, na kibekupila ku mapaka ananka a nshibo, biabia nshibo ibaponena bana bobe na babaafu. Nka penda ami nyi bapanda bua kufika mu kukulungula.”
20 Biabia Yobo nkuibua, nkusaana kilamba kiaye na nkutshiba nyene ku mutue waye; akupu aye nkukunama na nkukupila mpala paashi 21 na nkuakula’shi:
Nemutuukie musua munda mua nyinami,
Na nakalukiila musua.
Yehowa nyi mmumpe, na Yehowa nyi baata.
Eshina dia Yehowa ditungunukie na kutumbishibua.
22 Mu ino mianda yoso, Yobo tabaadi mukite muluisho sunga kufunda Efile Mukulu bua muanda su ngumune wibubi.