Yobo
10 “Ne mushikue muwa wande.
Nakatuusha kuidila kuande patooka.
Nakakula patooka mu dikienga diande di bukopo!*
2 Nakalungula Efile Mukulu’shi: ‘Leka kummona bu muntu mupiile.
Ndungule buakinyi okuete kulua nami.
3 Opete kinyi p’okiengiesha bangi,
P’obepuula mufubo wa maasa oobe?
Buakinyi okumiina malango a bantu be bubi?
4 We na meso bu a bantu,
Su omonaa abimonaa muntu afuiyaa?
5 Mafuku oobe e bu mafuku a bantu abafuiyaa,
Su bipua biobe bi bu bipua bia muntu,
6 Buashi okimbuule kilema kiande
Na kutungunuka na kukimba muluisho wande?
7 Ouku’shi ntshimupiile;
Na takui muntu su ngumune mulombene kumpaasha kuiyasa diobe.
8 Maboko oobe ngambumbe na ngankite,
Anka binobino ombutula ami oso.
9 Tentekiesha namu’shi we munkite na ema,
Anka binobino tongalusha ku lufufi.
10 Tuemumpongoole bu mabele
Na kunkuatakasha bu fromaje su?
11 We munfuandikie kikoba na mbidi,
Onduka na mifufua na mishila.
12 We mumpe muwa na kifulo kia lulamato;
We mulame kikudi* kiande na bulami bobe.
13 Anka we muele binangu mu bufiefie bua kunkitshina ino mianda ibubi.*
Nauku’shi ino mianda ayifiki kodi.
14 Su naadi mukite muluisho bodia kummona,
Na tobodia ku mbingisha ku kilubilo kiande.
15 Su ne mupiile, malua kuandi!
Sunga’shi ntshi musoole, ntshi bia kuibuesha mutue wande,
Muanda nemuule na kukutua kua kinemo na dikienga.
16 Su nebuesha mutue wande, okakimbi bia kunkuata nka abikitaa ntambue.
Na okalesha dingi bukome bobe kuandi.
17 Ofiki na tumonyi tupia bua kumponeesha kilumbu
Na ofimisha nsungu yobe kuandi,
Pe nkalakashi ayinfikila ilondene.
18 Biabia buakinyi we muntuushe muifu dia nyinami?
Nadia kufua kumpala kua’shi eyiso su ndimune dimmone.
19 Bibadia kuikala nka bu’shi ntangikeele kuanka kasha;
Babadia kungata mususa umune muifu dia nyinami benda nami ku mashama.’
20 Mafuku ande ntangapeela su? Antadiile;
Akatushe meso aaye kuandi buashi mpete kuikisha su nkupeela.*
21 Kumpala kua’shi nende, na tankalukiila,
Muiumbo dia mufito ukile bukopo,*
22 Muiumbo dia mufito wi bukopo,
Eumbo dia muesheshi wibukopo na kafutakanyi,
Mui etaata di mpa na bu mufito.”