Yobo
15 Elifaze muina Temane baluluile’shi:
2 “Muntu sha binangu ekualula na binangu bia bisumanga,*
Sunga kuusha efu diaye na lupapi lua kutunduka nguba su?
3 Kulanga penda na bishima takui na bukuashi,
Na muisambo bupenka buao tawi na bukuashi.
4 Muanda bobofusha bantu buabadia kutshina Efile Mukulu,
Na bopeelesha kunangushena koso pabitale Efile Mukulu.
5 Muanda kilubilo kiobe nyi akikutakula bua kuakula bino,*
Na bosangula mayi a budimu.
6 Kukanua k’obe obe nabene akukupiisha, anka nta nami;
Milomo y’obe obe nabene ayikufundu.
7 Nnobe muntu a kumpala kutandikua,
Su bodi mutandimbue kumpala kua tu miengie tupeela?
8 Opushaa miisambo ifuame y’Efile Mukulu,
Su binangu mbimeene penda kodi?
9 Nkinyi ki’ouku kiatush’atuuku?
Nkinyi ki’opushaa kiatush’atupushaa?
10 Basha nfuidi na banunu be mukantshi muetu,
Bantu bakulu ngofu kukila nshobe.
11 Kusambibua n’Efile Mukulu ta nkukukumbane,
Sunga bishima biabadi bakulungule na kalolo?
12 Buakinyi eshimba diobe adikutuala kula,
Buakinyi wemutoone meso na nsungu?
13 Muanda bofiitshila Efile Mukulu munda,
Na botadiila bishima bi biabia abituuku mukanua m’obe.
14 Muntu afuiyaa nnanyi buashi ekale mutooshibue,
Sunga muntu mutandibue kui muana mukashi buashi ekale mululame?
15 Tala! Te na lukumiino mui beselele baye,
Sunga eyilu ntanditooshibue ku meso kuaye.
16 Bikuikala naminyi su muntu e butete na mmuluile,
Muntu atomaa kukutua kululama bu mema!
17 Nakuukisha, nteemeshe!
Nakula biandi mumone,
18 Mianda ibakula bantu basha binangu ayifiki kui bamashabo,
Na ta mbeyifuamishe.
19 Nsenga ibaadi ibapebue,
Na muntu muenyi tabaadi mukile munkatshi muabo.
20 Muntu ebubi akienga mafuku aaye oso,
Munda mua bipua bioso biabadi balamine muntu akiengieshaa bangi.
21 Tuleo atutshinyisha tui mu matui muaye;
Mu nsaa ya butaale, ba ngifi abamuluisha ngoshi.
22 Takulupila’shi akapanda ku mufito;
Mmulamiibue bua kufua ku lupete lua ngoshi.
23 Aumbakana bua kukimba bia kudia,* a bikunyi?
Auku’shi efuku dia mufito tadidi pepi.
24 Dikienga na tuinyongoshi abitungunuka na kumukiengiesha;
Mbimukile bukome nka bu nfumu muilumbuule bua kuenda mu kulua ngoshi.
25 Eebuesha eyasa diaye bua kuluisha Efile Mukulu
Na atompo kuelesha Sha Bukome Boso mpaka;*
26 Na mutue wi bukopo ende lubilo kuadi bua kumuluisha ngoshi,
Muikale na ngabo ikata na ibukopo;
27 Mpala yaye ngiule na muimu,
Na kifuka kiaye nkiule na muimu;
28 Mmushale mu bibundi abikaluishibua,
Mu mashibo mush’amukashala muntu su ngumune,
Aakekala mituuto ya mabue.
29 T’akekala mpeta, na bupeta buaye t’abukafuimi,
Sunga bintu biaye t’abikapalakana muiumbo.
30 T’akapanda ku mufito;
Ludimi lua kaalo alukaumisha lutonga luaye,*
Na akafu ku muwa wa mukanua mua Efile Mukulu.
31 T’abitungu apambukie eshinda, na kukulupila bintu bishi na muulo,
Muanda bi’akapete pa mbalo yabio t’abikekala na muulo;
32 Abikakitshika kumpala ku’efuku diaye,
Na ntabi yaye tayanasampile.
33 Akekala nka bu mutshi wa nfinyo auponesha tukuba tuao tushamongiele,
Na bu mutshi wa olive auponesha bilongo biao.
34 Muanda kakongie ka bantu bash’abatshinaa Efile Mukulu* t’akatandaa,
Na kaalo akatatshisha tushibo tua mapema tua bantu baabatshibaa milomo.
35 Abemitaa nkalakashi na abatanda mianda ibubi,
Na mafu aabo aatanda madimi.”