Yobo
28 “Kui mbalo ya kubundula kiamo kia arja
Na mbalo ya kubundula ôlo a kulumbuula;
2 Kilonda akiatshibuaa mu nsenga,
3 Muntu akambila mufito;
Ende mu mbalo i mufito wibukopo,
Bua kukimba mabue a muulo.
4 Abundula kiina kula na mbalo ishale bantu,
Mu ma mbalo abadi balube, kula na mbalo ayitambukila bantu;
Bangi bantu abayiki na mooshi, mbembeele abekupila aku n’aku.
5 Bia kudia abimene panundu pa nsenga;
Anka muushi, nsenga ikuete kufunduluka nka bu yabafunduula kui kaalo.*
6 Mu mabue e muanka mui safire,
Na mu lufufi mui ôlo.
7 Konyi su nkamune akadia muita takauku eshinda adiende kuanka;
Eyiso dia kabemba kafiita tandikumone.
8 Nyema ikata tangibande kuashina kuanka;
Ntambue muana tabandile kutambukila kuanka.
9 Muntu akupila ebue dibukopo* na eyasa diaye;
Afuudika miengie ku bitako biayo.
10 Atanya mikola ya mema mu lubuebue;
Meso aaye aamono kintu kioso kibuwa.
11 Ashiki nsulo ya mema
Na atuusha kintu kifuamishue ku etaata.
12 Anka binangu, be kuibipeta kunyi,
Na kushinguula kua mianda akufikaa kunyi?
13 Muntu su ngumune tauku muulo wabio,
Na tambalombene kuibipeta mu nsenga ya bantu be na muwa.
14 Mema ala aakula’shi: ‘Ta bi muandi!’
Na kalunga ka mema akakula’shi: ‘Ta bi nami!’
15 Tambalombene kuibiula na ôlo mukile buwa;
Sunga kupima bushito bua kiamo kia arja bua kuikishintula nabio.
16 Tabalombene kuibiula na ôlo a ku Ofire
Sunga na ebue dia onikse dishadikambaa kumueneka na safire.
17 Tambalombene kuibipuandikisha na ôlo na lumueno;
Sunga kuibishintula na kibakudi kikitshibue na ôlo mulumbuulue.
18 Mabue a koraye na a kristale tangalombene sunga kutemunua,
Muanda mufuko uule binangu wi na muulo kukila mufuko uule na mabue a muulo.
19 Tambalombene kuibipuandikisha na ebue dia topaze dia ku Kushe;
Tambalombene kuibiula sunga na ôlo mukile buwa.
20 Anka binangu abifiki kunyi,
Na nsulo ya kushinguula kua mianda i kunyi?
21 Mbifuamishue meso a kintu kioso ki na muwa
Na mbifuamishue tonyi tua muiyilu.
22 Kabutu na lufu abiakula’shi:
‘Matui eetu ngapushe penda biabakula pabibitale.’
23 Efile Mukulu auku eshinda dia kuibipeta;
Aye bupenka nyi auku mbalo yabidi,
24 Muanda atalaa mpa na ku nfudiilo kua nsenga,
Na amonaa kintu kioso ki muushi mua eyilu.
25 Pabaadi mutuule bukome* bua lupapi
Na pabaadi mupime mema,
26 Pabaadi muelele mpeshi muiya
Na mukitshine ekumbi dia mpeshi ebukopo a tupandapanda eshinda,
27 Baadi mumone binangu na ebipatuula;
Baadi muibituule na ebitompa.
28 Akupu balunguile muntu’shi:
‘Tala! Kutshina kua Yehowa, nyi binangu,
Na kuleka mianda ibubi nyi kushinguula kua mianda.’”