Yobo
41 “We mulombene kukuata Leviatane* ku ndobo
Sunga kumuanya moshi ku ludimi su?
2 We mulombene kutuesha moshi mu mpembe yaye
Sunga kutubula mbanga yaye na ndobo su?*
3 Mmulombene nkusendeela misango i bungi,
Sunga kuisamba nobe na kalolo su?
4 Mmulombene kukita nobe kilombeno,
Buashi omuikashe mpika oobe bua loso su?
5 We mulombene kuasha naye bu biabashaa na konyi
Sunga kumuanya ku moshi buashi bana bobe bakashi bakinga baashe naye su?
6 Balobi ba mishipa mbalombene kumuudisha su?
Mbalombene kumutshibuula munkatshi mua ba nsunga su?
7 We kutubula kikoba kiaye na milumbu i na meba
Sunga mutue waye na milumbu ya kukuata nayo mishipa su?
8 Tuula eyasa diobe padi;
Okatentekiesha ngoshi na tokebikitshi dingi!
9 Lukulupilo su ndumune lua kumumuna ndua mu bisumanga.
Penda kumumona na meso akukutshinyisha.*
10 Takui muntu su ngumune mulombene kumoolomona.
Biabia nanyi mulombene kuimana kumpala kuande?
11 Nanyi mumpe kintu kampanda kumpala buashi mmualuishe?
Kintu kioso ki muushi mueyilu kiande.
12 Tankaumina pabitale mikoolo yaye,
Pabitale bukome buaye na pabitale mbidi yaye ikitshibue bibuwa.
13 Nanyi mukatushe kilamba kiaye kia panundu?
Nanyi e kutuela mu mbanga yaye ifungule?
14 Nanyi e kufungula biibi bia mukanua muaye?*
Meno aaye efunyishe mpese yoso aatshinyisha.
15 Mongo waye wi na milongo ya mamba*
Ekuateene pamune bibukopo.
16 Mamba oso ngekuatene kalolo
Mu mushindo ushakukila lupapi munkatshi muao.
17 Ngelamatshishene;
Ngekuatene bibukopo pamune na tambalombene kuiabuula.
18 Kuela kuaye kua nkiesha akutuushaa kupenyapenya ku’etaata
Meso aaye enka bu nsembue ya pakutooka.
19 Mipenyo ayituuku mukanua muaye;
Ntolontolo ya kaalo ayitumbu paasha.
20 Miishi ayituuku mu mpembe muaye
Anka bu elungu dia kaalo kabadi batembeshe na lubishi.
21 Kupuwa kuaye akutembeshaa makala,
Na ludimi lua kaalo alutuuku mukanua muaye.
22 Nshingo yaye i na bukome bui bungi,
Oso afumankana naye apusha moo wibukopo.
23 Mikanyamikanya ya mbidi yaye ngikuatene bi bukopo pamune;
Ibukopo nka bu kilonda kiabashi balombene kukatusha.
24 Eshimba diaye di bukopo nka bu ebue,
Oolo, bukopo nka bu ebue dia mpelua dia kuushi.
25 P’ebo, mpa na basha bukome abatshinyi;
Kusanasana kuaye akufuishaa kafutakanyi.
26 Takui muntu mulombene kumutshimuna na lupete lua ngoshi;
Sunga na mulumbu, mushidi, sunga nsongo ya mukietue.
27 Amonaa kiamo nka bu kisosua,
Kiamo kia munyinga nka bu ebaya dinyangie.
28 Mukietue taumusukishaa nya;
Mabue a kuasa nao ndundo a tonyi aafiki bu lusonyi.
29 Amonaa kabongie bu lusonyi,
Na asepaa tuleo tua mulumbu upeela.
30 Efu diaye di nka bu bipese bia elondo bi maashi;
Alekaa mifunda mu matekie nka bu mabaya abakaka kui ngombe bua kufunta ntete.
31 Asakishaa mema e bula nka bu lueso;
Patuele mu kalunga ka mema, mema aatuusha mafulu; nka bu lueso lua muimu ausaka.
32 Alekaa etaata pakidi muishinda diaye.
Muntu e kuela binangu’shi mema e bula e na nyene itooka.
33 Takui kintu ki bu biadi pa nsenga,
Kipangua kikitshibue bua kukutua kuikala na moo.
34 Atalaa kushi kutshina nyema yoso i na kuitatula.
Aye nyi nfumu a nyema yoso ikata i bukielo ya mu kisuku.”