Yeshaya
10 Malua kui baba abeele miiya bua kukiengiesha bantu,
Kui baba abatuusha miiya ayifuishisha bangi makienga,
2 Bua kupelela balanda matalua* aabo,
Bua kupela kubingisha bantu bashadile ba mu muilo,
Abekasha bakashi kilele bu bintu biabo bia kupaula
Na bana ba nshiye* bu bintu biabo bia kupaula!
3 Anukakitshi kinyi muifuku dia kiimu,*
Apakafiki kabutu kukatukila kula?
Anukasuukila kui nanyi bua kupeta bukuashi,
Na anukalekie bupeta* buenu kuikunyi?
4 Takukashala kintu su nkimune kukatusha penda kukunama munkatshi mua bena lukano
Sunga kupona munkatshi mua bantu bayipayibue.
Pa muanda wa bino bioso, nsungu yaye nta ngipue,
Ki’nka muibueshe eyasa diaye bua kunyoka.
5 Obe muina Asiri,
Mutshi wa kulesha nao nsungu yande
Na mutshi wi mu maasa aabo bua kutuusha dinyoka diande!
6 Nakamutumu bua kulua ngoshi na muilo usumbule lukumiino,
Bua kulua ngoshi na bantu banfiitshishe munda;
Nakamutumina eyi bua kunyenga na kupaula bintu bibungi
Na bua kuibashina nka bu matekie e mu mashinda.
7 Anka t’akekala na bino binangu nya
Na t’akekala na ino mpango muishimba diaye;
Muanda muishimba diaye mui binangu bia kubutula,
Bua kuipaa miilo ibungi, kushi ipeela.
8 Muanda bakula’shi:
‘Bakunkushi bande nta mbekale boso ba nfumu su?
9 Kaleno t’enka bu Karkemishe su?
Amate t’enka bu Arpade su?
Samadiya t’enka bu Damase su?
10 Maasa ande ngakuate mafumu a b’efile bashi na muulo,
Be na ma nkishi ebungi kukila a Yelusalema na a Samadiya!
11 Dingi tankakitshi Yelusalema na ma nkishi aaye
Nka bu biandi mukite Samadiya na b’efile baye bashi na muulo su?’
12 “Apapudisha Yehowa mufubo waye oso ku muengie wa Siyona na mu Yelusalema, akanyoko nfumu a Asiri bua kapeesha kaye ka muishimba, kuikaamisha kuaye na meso aaye a kuitatula. 13 Muanda bakula’shi:
‘Nakakitshi bino ku bukome bu’eyasa diande
Na binangu biande, muanda ne na binangu.
Na kakatusha mikalo ya miilo
Na kupaula bupeta buabo,
Na nakatshokola bantu bashale muanka nka bu muntu e bukome.
14 Nka bu muntu eele eyasa mu esua,
Eyasa diande adikakuata bupeta bua miilo;
Na nka bu muntu abungu mayi asumbushenue,
Nakabungu nsenga ishima!
Muntu su ngumune takakupila mbaba yaye sunga kubuula mukanua sunga kudila bu konyi.’”
15 Kabengiele kekuitumbisha’shi nkakile muntu atshibi nako su?
Scie ekuitumbisha’shi mmukile muntu kuete kufuba naye su?
Mukombo wikusanyisha muntu ewibuesha su?
Sunga’shi mutshi wikuibuesha muntu muiukuate su?
16 Anka Muanana a binyibinyi, Yehowa a biluilo,
Akakitshi bia’shi bantu baye batame, banyane,
Na muushi mua ntumbo yaye akatembesha muanka kaalo ke bukopo.
17 Etaata dia Isalele adikafiki kaalo,
Eselele aaye akafiki bu ndimi ya kaalo;
Akakatembe na katatshishe lubishi luaye na milobo yaye muifuku dimune.
18 Akakatusha ntumbo yoso* ya mutamba waye na ya efuba diaye dia mitshi ayipeyaa bikuba;
Abikekala nka bu kunyana kua muntu e na maladi.
19 Mitshi ya mu mutamba waye ayikashala
Ayikekala ipeela ngofu bilombene ka nsongualume kuiyibadika.
20 Mu diadia efuku baba abakashala mu Isalele
Na baba abakapanda mu nshibo ya Yakobo
T’abakakulupila dingi yawa ebakupila;
Anka abakakulupila mui Yehowa,
Eselele a Isalele na lulamato.
21 Nka penda bantu bapeela bashale nyi abakalukiila,
Bantu bashale ba Yakobo, nyi abakalukiila kui Efile Mukulu sha Bukome.
22 Sunga’shi bantu bobe, Ô Isalele,
Be bungi nka bu lusenga lua ku kalunga ka mema,
Nka penda bantu bapeela ba kuabadi bashale nyi abakalukiila.
Kitshibilo kia kuibabutula nkipue kuatshibua,
Na dinyoka dilulame adikebafikila.
23 Oolo, kitshibilo kia kubutula kiabadi baate kui Muanana Mukile Bukata, Yehowa a biluilo,
Akikakitshika muiumbo dioso.
24 Muanana Mukile Bukata, Yehowa a biluilo, bakula bino’shi: “Tanutshinanga, bantu bande bashale mu Siyona, pa muanda wa muina Asiri, baadi enukupila na mutshi na baadi enuibueshela mukombo waye bu bibaadi bikite Ejipitu. 25 Muanda mu kapindi kapeela, dinyoka diande adifiki ku nfudiilo; nsungu yande ayikatadiila kuabadi bua kuibabutula. 26 Yehowa a biluilo akamuibueshela lufimbo, nka bu pabaadi mutshokole Madiane ku lubuebue lua Orebe. Na mukombo waye aukekala pa kalunga ka mema, na akewibuesha nka bu bibaadi mukite Ejipitu.
27 Mu diadia efuku bushito buaye abukakatuka pa epampa diobe,
Kikumbo kiaye akikakatuka ku nshingo yobe,
Na kikumbo akikatshokoka pa muanda wa muimu.
28 Mmufikie ku Ai;
Akidila mu Migrone;
Atuulu mabofu aaye ku Mikemashe.
29 Mbakidile mu mbalo y’abasabukaa lua ngua;
Mbalale bufuku ku Geba;
Rama asuusu, Gibeya a Saule mmusukie.
30 Dila na eyi dibukopo na wele misaase, Ô muana mukashi a Galime!
Tee matui, obe Laisha!
Ô Anatote we a malua!
31 Mademena mmusuukie.
Bantu ba mu Gebime mbakimbe mbalo ya kufuamina.
32 Mu diadia efuku akemana mu Nobe.
Asanyisha ekofi diaye ku muengie wa muana mukashi a Siyona,
Ka muengie ka Yelusalema.
33 Tala! Muanana a binyibinyi Yehowa a biluilo,
Kuete kutshiba ntabi na tuleo tui bukopo;
Mitshi ikata ngofu ikuete kutshibibua,
Na mitshi ila bakuete kui iyisha.
34 Kuete kutshiba tu mitshi tua mu mutamba na kina mufubo kia kiamo,*
Na muntu e bukome akaponesha Lebanone.