Yeshaya
2 Bino nyi bibaadi Yeshaya muana a Amoze mumone pabitale Yunda na Yelusalema:
2 Ku nfudiilo kua mafuku,*
Muengie wa nshibo ya Yehowa
Aukatudiibua pepoo kunundu kua nsongo ya miengie,
Na aukakamishibua kunundu kua tu miengie,
Na miilo yoso ayikende kuanka.
3 Na bantu bebungi abakende kuanka na bakule’shi:
“Fikayi, tukaamine ku muengie wa Yehowa,
Ku nshibo y’Efile Mukulu a Yakobo.
Aketulongiesha mashinda aaye,
Na atukatambukila mu mashinda aaye.”
Muanda muiya* aukatuuku mu Siyona,
Na eyi dia Yehowa adikatuuku mu Yelusalema.
4 Akatshibi biimu munkatshi mua miilo
Na kululamisha mianda itale miilo ibungi.
Abakafusha mpete yabo ya ngoshi ifikie bu nkasu
Na milumbu yabo ifikie bu tupete tua kutenda nato mitshi.
Takui muilo aukebueshela ungi muilo lupete lua ngoshi,
Na tabakalongo dingi ngoshi.
5 Bantu ba mu nshibo ya Yakobo, fikayi,
Tutambukile mu etaata dia Yehowa.
6 Efile Mukulu, bosumbushena muilo oobe, nshibo ya Yakobo,
Muanda mbambule bipikua bibungi bia dia kutunduka nguba;
Abakitshi mianda ya malenganyi nka bu bena Filistine,
Na bana bebungi ba bantu benyi mbashale munkatshi muabo.
7 Nsenga yabo ngiule na kiamo kia arja na ôlo,
Bupeta buabo tabui na nfudiilo.
Nsenga yabo ngiule na nfualasa,
Na matempu aabo ta e na nfudiilo.
8 Nsenga yabo ngiule na b’efile bashi na muulo.
Abenamina mufubo wa maasa aabo,
Bintu bikitshibue na minue yabo.
9 Biabia muntu ayinama, ayishiibua milongo,
Na tue mulombene kuibafuila lusa.
10 Tuelayi mu lubuebue na nufuame mu lufufi
Pa muanda wa nsungu ayitshinyisha ya Yehowa
Na ntumbo yaye ikata.
11 Meso a kuikaamisha a muntu aakayishiibua,
Na kuitatula kua bantu akukayishiibua.
Yehowa nabene akatumbishibua mu diadia efuku.
12 Muanda nyi efuku dia Yehowa a biluilo.
Adifiki kui muntu oso sha kuikaamisha na sha kuitatula,
Kui muntu oso sha kinemo sunga shi na kinemo,
13 Kui mitshi ya sedre ya mu Lebanone ila na i kunundu
Na kui mitshi yoso ikata ya mu Bashane,
14 Kui miengie yoso ila
Na kui tu miengie toso tui kunundu,
15 Kui kitenta kioso kila na mudimba oso unyingishibue,
16 Kui mashuwa oso a ku Tarsise
Na kui maato oso e buwa.
17 Kuikaamisha kua muntu akukayishiibua,
Na kuitatula kua bantu akukayishiibua.
Yehowa nabene akatumbishibua mu diadia efuku.
18 B’efile bashi na muulo tabakekala dingi kuanka.
19 Na bantu abakatuele mu mpako ya mbuebue
Na mu mena e mu nsenga,
Pa muanda wa nsungu ayitshinyisha ya Yehowa
Na ntumbo yaye ikata,
P’akebo bua kutshinkisha nsenga na moo.
20 Mu diadia efuku, bantu abakaata b’efile babo bashi na muulo ba kiamo kia arja na ôlo
Babaabadi bakite bua kuinamina
Bebasumbule mu mbalo ishale tutaba na midima,
21 Bua kutuela mu mena a mbuebue
Na mu mitanta ya mabue akata,
Pa muanda wa nsungu ayitshinyisha ya Yehowa
Na ntumbo yaye ikata,
P’akebo bua kutshinkisha nsenga na moo.
22 Bua buwa buenu, lekayi kukulupila mui muntu,
E na muwa penda mu mpembe muaye.
Buakinyi kumukulupila?