Yeshaya
25 Ô Yehowa, we Efile Mukulu ande.
Nakusamuna, natumbisha eshina diobe,
Muanda we mukite bintu bia kukaanya,
Bintu bibodi muatshile mpango kubanga kala,
We mukumbashe eyi diobe na olesha’shi we akukulupila.
2 Muanda buekasha kibundi bu mutuuto wa mabue,
Kibundi kinyingishibue bu mbalo iluile ikuete kubumbuka.
Kibundi kinyingishibue kia bantu benyi takiki dingi kibundi;
T’aban’ekibakuule dingi.
3 Nyi buakinyi muilo wa bantu be bukome aukakutumbisha;
Kibundi kia miilo ayikiengieshenaa akikakutshinyi.
4 Muanda kui muntu mushadile buekala mbalo inyingishibue ya kufuamina,
Kui mulanda buekala mbalo inyingishibue ya kufuamina mu dikienga diaye,
Mbalo ya kufuamina mpeshi a kipapi,
Na mutaala bua kufuama kanya.
Pekale muwa wa bantu abakiengieshenaa bu mpeshi a kipapi ekupila ku mudimba.
5 Nka bu kanya mu nsenga yume,
Ouminyisha tuleo tua bantu benyi.
Nka bu kanya kabashikiila kui mutaala wa ekumbi,
Biabia lono lua bantu abakiengieshenaa lubaumina.
6 Mu uno muengie, Yehowa a biluilo akakitshina miilo yoso
Musangelo wa bia kudia bibuwa,
Musangelo wa nfinyo ibuwa,
Wa bia kudia bibuwa biule na bongo bua mu mifufua
Wa nfinyo ibuwa ikakule.
7 Mu uno muengie, akakatusha* kilamba kibuikile miilo yoso
Na kibuikilo* kiabadi batele kunundu kua miilo yoso.
8 Akaminyi* lufu bua loso,
Na Muanana Mukile Bukata Yehowa akakumuna mpolo ku meso a bantu boso.
Akakatusha buufu bua bantu baye pa nsenga yoso,
Muanda Yehowa aye nabene nyi bebiakula.
9 Mu diadia efuku abakakula’shi:
“Talayi! Uno nyi Efile Mukulu eetu!
Tuikeele bakulupile muadi
Na aketupaasha.
Uno nyi Yehowa!
Tuikeele bakulupile muadi.
Tusankieyi na tuikale na muloo muanda mmuitupaashe.”
10 Muanda eyasa dia Yehowa adikala pa uno muengie,
Na Moabe akashinua pa mbalo yaye
Nka bu bisosua biabashina mu mututo wa tufi tua nyema.
11 Akakupila maasa aaye muanka
Nka bu muntu aywaa kuete kukupila maboko bua kuywa,
Na akayisha kuitatula kuaye
Na kusanyisha kalolo maasa aaye.
12 Akabumbula kibundi kinyingishibue
Na midimba yobe ila ya kuikaluila;
Akekiponesha paashi mu lufufi.