Yeshaya
27 Mu diadia efuku, Yehowa akatuulu binangu biaye kui Leviatane,* nyoka aselemukaa,
Leviatane nyoka efunga fungaa.
Na lupete luaye lui bukopo, lui bukata na lui bukome,
Akayipaa uno nyema mukata e mu kalunga ka mema.
2 Mu diadia efuku nuyimbile yawa muana mukashi’shi:*
“Efuba dia nfinyo aditushaa nfinyo i na mafulu!
3 Ami Yehowa nkuete kumulama.
Nkuete kumumiamina mema nsaa yoso.
Nkuete kumulama bufuku na kanya,
Bua’shi muntu tamukitanga bi bubi.
4 Ntshi na nsungu.
Nnanyi ekufika mu kulua nami na tu mitshi tua meba na lubishi?
Nebiashina na nebishiikie bioso kaalo pamune.
5 Su ta mbiabia, akuate bi bukopo ku mbalo yande ya kufuamina.
Akimbe bia kuikala nami mu butaale;
Akimbe bia kuikala nami mu butaale.”
6 Mu mafuku aafiki Yakobo akamene mishi,
Isalele akatuusha bilongo na ntonga,
Na abakauusha nsenga na biumbuluanga.
7 Abitungu bamukupile bu abikupila muntu kuete kumukupila?
Sunga’shi abitungu bamuipee mu mushindo umune na bantu baadi muipee?
8 Okalu naaye na musaase autshinyisha p’okamubingi.
Akamubingi na lupapi luaye lui bukopo mu efuku dia lupapi lua kutunduka nguba.
9 Mu uno mushindo nyi muabakabuikila kilubilo kia Yakobo,
Na pabakakatusha muluisho waye mianda yoso ayikakitshika ngino:
Akakitshi bia’shi mabue oso a ku kilambuilo
Ekale bu mabue atooka abadi basose,
Na takukashala kintu, biabikala mitshi ya kishila* sunga bilambuilo bia kushiikila kabanda.
10 Muanda kibundi kinyingishibue akikashala bisumanga;
Mapia akudishila nyema aakashala bisumanga na kusumbushenua nka bu kabaaka.
Muana a ngombe akadi bisuku muanka na kuimulala
Na akadi ntabi yaye.
11 Apakaumu ntonga yaye,
Bana bakashi abakafiki beyitshibe,
Batembeshe nayo kaalo.
Muanda bano bantu tabe na lushinguluilo,
Nyi buakinyi Mupangi aabo takebapusha lusa,
Na Yawa muibakite takebalesha lusa.
12 Mu diadia efuku Yehowa akakongola bikuba kukatukila ku mema a Muela* mpa na ku kibandabanda* kia Ejipitu, na anukabungibua pamune ku umune umune, Ô muilo wa Isalele. 13 Mu diadia efuku abakele mpungi i bukopo, na baba bakuete kushimina mu nsenga ya Asiri na baaba bapalakane mu nsenga ya Ejipitu abakafiki na bayinamine Yehowa ku muengie wa kishila mu Yelusalema.