Yeshaya
5 Nyimbile namu ande a kifulo
Loono pabitale ande a kifulo na efuba diaye dia nfinyo.
Ande a kifulo baadi na efuba dia nfinyo lupese lua ka muengie lui na bufukie.
2 Aye nkutshimbula muanka na nkukatusha muanka mabue.
Aye nkukuna muanka nfinyo monga ebuwa bukile,
Nkuibaka kitenta munkatshi muadio,
Na nkubundula muanka mbalo ya kuengiela tukuba tua nfinyo.
Akupu baadi akulupila’shi adimutuushiisha tukuba tua nfinyo tui buwa,
Anka adio nkumutushiisha penda tukuba tua nfinyo tui bubi.
3 “Binonbino, anue bashale mu Yelusalema na bantu ba mu Yunda,
Tshibayi namu muanda pankatshi pande na efuba diande dia nfinyo.
4 Nkinyi kingi kinadia kukitshina efuba diande dia nfinyo
Kiashambandile kukita?
Buakinyi panyikalanga mukulupile tukuba tua nfinyo tui buwa,
Ndituushiishe penda tukuba tua nfinyo tui bubi?
5 Binobino ntadiileyi namu nenulungule
Nkiakakitshina efuba diande dia nfinyo:
Nakakatusha lupango luadio,
Na adikashikiibua kaalo.
Nakabumbula mudimba wadio wa mabue,
Na abakediashina.
6 N’akedikasha bu nsenga ishi ishadibue;
T’abakemusosuela sunga kuimudima.
Amukauulu milobo na bisuku,
Na nakatumina makumbi eyi bua’shi taanokieshanga mpeshi muanka.
7 Muanda efuba dia nfinyo dia Yehowa a biluilo nyi nshibo ya Isalele;
Bantu ba mu Yunda nyi efuba dibaadi mufule ngofu.
Baadi akulupila’shi abatshibi kiimu na kululama,
Anka kubaadi kuipa kua miiya;
Baadi akulupila’shi akuikala kululama,
Anka kubaadi kudila kua dikienga.”
8 Malua kui baba abakumbasha nshibo imune ku ingi
Na abakumbasha efuba dimune ku dingi
Mpa na pakush’akushala dingi mbalo
Na anuishalela anue banabene muiumbo!
9 Yehowa a biluilo betshipi mu matui muande’shi
Mashibo ebungi, sunga bia adi bukata na buwa,
Aakekala kintu akitshinyisha,
Kushi muntu mushale muanka.
10 Muanda ektare inanka ya efuba dia nfinyo ayikatuusha penda kipimo kia mbaafu* kimune,
Na kipimo kia omere* kimune kia ntete akikatuusha penda kipimo kia efa* kimune.
11 Malua kui baba ababuuku namashika buee bua kutoma malofu aakoluana,
Baba abayisha mpa na ku kamuilua nshobe mpa na apebatakula nfinyo mu kukita mianda bukitekite!
12 Be na luseese, kiombuanga kia mioshi,
Etumba, mulengie na nfinyo ku misangelo yabo;
Anka tabeele binangu ku mufubo wa Yehowa,
Na tabamono mufubo wa maasa aaye.
13 Biabia abakakuata bantu bande bende nabo
Muanda wa kukutua kiukilo;
Bantu babo ba ntumbo abakakiengie na nsala,
Na bantu babo boso abakakiengie na nyota.
14 Mashama* abatama
Na ababuula mukanua muao bikata kushi mpuilo;
Ntumbo yaye,* bisaka biaye bia bantu bia tuleo, na bantu baye bafule miloo
Abakayiki muanka binyibinyi.
15 Na muntu akayinama,
Muntu akayishiibua,
Na meso a bantu basha kuikaamisha aakayishiibua.
16 Yehowa a biluilo akatumbishibua kukiila ku kutshiba kuaye kua kiimu;*
Efile Mukulu a binyibinyi, Eselele, akeyikasha a kishila kukiila ku kululama.
17 Bana ba mikooko abakadi nka bu mu mapia aabo akudiila lubishi;
Bantu benyi abakadi mu ma mbalo ashale bisumanga a nyema idishibue kalolo.
18 Malua kui baba abakaka kupiila kuabo na mioshi ya madimi
Na abakaka muluisho wabo na mioshi y’etempu;
19 Baba abakula’shi: “Efile Mukulu akite mufubo waye bukidibukidi;
Ufikie bukidibukidi bua’shi tuiumone.
Mpango* ya Eselele a Isalele ilombane
Bua’shi tuiyiukie!”
20 Malua kui baba abakula’shi buwa mbubi, na’shi bubi mbuwa,
Baba abatuulu mufito pa mbalo y’etaata na etaata pa mbalo ya mufito,
Baba abatuulu buulo pa mbalo ya nsaasa na nsaasa pa mbalo ya buulo!
21 Malua kui baba abemono abo banabene bu ba sha binangu
Na abemono abo banabene bu badimukie!
22 Malua kui baba be bukome mu kutoma kua nfinyo
Na kui bantu be bukome mu kusanga kua malofu aakoluana,
23 Baba ababingisha muntu ebubi pa muanda wa kutshiba milomo
Na baba abapiisha muntu mululame!
24 Nyi buakinyi, nka bi ludimi lua kaalo alutatshishaa nsonyi
Na bi lubishi luume alutaataa mu ndimi ya kaalo,
Mishi yabo ayikanyanga,
Na bilongo biabo abikapalakana bu lufufi,
Muanda mbasumbushene muiya* wa Yehowa a biluilo
Na ntambanemekie eyi dia Eselele a Isalele.
25 Nyi buakinyi nsungu ya Yehowa ngitembele bantu baye bu kaalo,
Na akebuesha eyasa diaye bua kuibanyoka.
Miengie ayikatshinkatshinka,
Na bitanda biabo abikekala bu butshiafu mu bilayi.
Pa muanda wa bino bioso, nsungu yaye nta ngipue,
Ki’nka muibueshe eyasa diaye bua kunyoka.
26 Mmuimikie kitunduilo bua muilo wi kula;
Mmuibelele kapudi bua’shi bafikie kukatukila ku nfundiilo kua nsenga;
Na tala! Bakuete kufika lubilo lukile.
27 Takui muntu su ngumune a munkatshi muabo mukookie sunga akokola.
Takui muntu su ngumune kuete kubunguta sunga mulaale.
Mukaba wi mu kifuka kiabo tanguangukie,
Sunga mioshi ya nsandale yabo tangitshibikie.
28 Mikietue yabo yoso nginonue,
Na mata aabo oso ngaleme.*
Mikona ya nfualasa yabo i nka bu mabue ebukopo,
Na bipombo biayo bi nka bu kipapi ki bukopo.
29 Kukungula kuabo kui’nka bu kua ntambue;
Abakungula nka bu ntambue yana.*
Abakakungula na bakuate nyema a kudia
Bende naye kushi muntu a kumupaasha.
30 Mu diadia efuku abakamukunguila
Nka bu mukungulo wa kalunga ka mema.
Muntu oso akatala nsenga akamono mufito autshinyisha;
Mpa na etaata dibafiki mufito pa muanda wa makumbi.