Yeshaya
7 Mu mafuku akumunana kua Akaze muana a Yotame muana a Oziase, nfumu a Yunda, Nfumu Resine a Siri na Peka muana a Remaliya nfumu a Isalele, babakaamine bua kulua na Yelusalema ngoshi, anka tabaadi* bia kumukuata. 2 Babalunguile ba mu nshibo ya Davide’shi: “Kiluilo kia Siri nkisangie na kiluilo kia Efraime bua kuituluisha ngoshi.”
Biabia Akaze na bantu baye bababangile kupusha moo na kusuusa nka bu mitshi ya mu mutamba ayipuku na lupapi.
3 Nyi Yehowa nkulungula Yeshaya’shi: “Nda namu okafumankane na Akaze, obe na muana oobe Sheare-yashube,* ku nfudiilo kua mukola wa eshiba dia kunundu pepi na eshinda dikata dia efuba dia muntu atumpaa bilamba. 4 Abitungu omulungule’shi: ‘Kita mobe moso bua’shi oshaale mumiine. Na tobofulanga kuishimba pa muanda wa bino bipindi bibidi bia nteete abifitshi miishi, muanda wa nsungu i bukopo ya Resine, Siri na muana a Remaliya. 5 Muanda Siri na Efraime na muana a Remaliya mbadie lukuku bua nkukitshina bibubi, bamba’shi: 6 “Tukaamineyi tuende mu kuluisha Yunda ngoshi, tumutshibuule mu bipindi na tumutshimune* bua’shi ekale eetu, na tutuule muana a Tabele bu nfumu aaye.”
7 “‘Muanana Mukile Bukata Yehowa bakula’shi:
“T’abikalombana,
Na t’abikakitshika.
8 Muanda mutue wa Siri nyi Damase,
Na mutue wa Damase nyi Resine.
Munda mua penda bipua 65
Efraime akabutudibua oso na takekala dingi muilo.
9 Mutue wa Efraime nyi Samadiya
Na mutue wa Samadiya nyi muana a Remaliya.
Su tanui na lukumiino lui bukopo,
Tanukanyingi ngofu.”’”
10 Yehowa batungunukile na kuisamba na Akaze’shi: 11 “Teka Yehowa Efile Mukulu oobe kitunduilo, sunga kiekala bula bu Mashama* sunga bula bu makumbi.” 12 Anka Akaze bakuile’shi: “Ntantekie kitunduilo, sunga kutuula Yehowa mu kutompibua.”
13 Yeshaya bakuile’shi: “Teemeshayi namu anue ba mu nshibo ya Davide. Bianukuete kubepuula luishinko lua bantu ntambikumbane? Anukiebe kubepuula dingi mpa na luishinko lu’Efile Mukulu? 14 Nyi buakinyi Yehowa aye nabene akenupa kitunduilo: Talayi! Nsonguakashi* akayimita na akatanda muana mulume, akamudika bu Emanuele.* 15 Akadi manteka na buuki nsaa yakauku bia kupela mianda i bubi na kusangula mianda i buwa. 16 Muanda kumpala kua’shi, nsongualume aukie bia kuleka mianda i bubi na asangule mianda i buwa, eumbo dia ba nfumu babidi diokuete kutshina adikasumbushenua dioso. 17 Yehowa akakufuishila obe na muilo oobe na nshibo ya nshobe kipungo ki bukopo kishekeele kuanka kubanga muifuku dibaadi Efraime muitshibuule na Yunda, muanda Aye akatumu nfumu a Asiri.
18 Mu diadia efuku Yehowa akeele tupudi bua kuitanyisha nshishidi kukatukila ku tu miela tui kula tua Nile a mu Ejipitu na bua kuitanyisha nyuki ya mu Asiri. 19 Ayikafiki yoso yikile mu ma ngalala a mu mabanda,* pa mitanta ya mbuebue, pa milobo yoso na pa ma mbalo oso abatapilaa mema.
20 Mu diadia efuku Yehowa akakuula ku mutue na kukuula buaa bua ku mikoolo, na kutshiba miefu na kabuembe kabadi baate ku kibundi kia Muela* kukiila kui nfumu a Asiri.
21 “Mu diadia efuku, muntu akalama na muwa muana a ngombe mukashi a mu kikutu na mikooko ibidi. 22 Na pa muanda wa mabeele e bungi, akadi manteka, muanda muntu oso mushaale muiumbo akadi manteka na buuki.
23 Mu diadia efuku mbalo yoso ibaadi mitshi 1 000 ya nfinyo ibaadi na muulo wa shekele 1 000 ya kiamo kia arja ayikekala nka penda milobo na lubishi. 24 Bantu abakende kuanka na buta na mulumbu, muanda eumbo dioso adikela milobo na lubishi. 25 Na tokefubuila pepi na miengie yoso ibaabadi abadimi na lukasu, pa muanda wa moo wa milobo na lubishi; ayikafiki mbalo ayidiilaa ngombe na mbalo ayifuntaa mikooko.”