Yoshua
2 Akupu Yoshua muana a Nune nkutuma bana balume babidi mu bufiefie bu ba mpuupa kukatukila ku Shitime. Ebalungula’shi: “Ndayi nukatale nsenga, bikishekishe Yeriko.” Biabia babayile na bafika ku nshibo ya ndumba e n’eshina bu Rahabe, na abo nkushala kuakua. 2 Abo nkulungula nfumu a Yeriko’shi: “Bana balume bena Isalele babafiki muno buno bufuku mu kupuupa nsenga.” 3 Nyi nfumu a Yeriko nkutumina Rahabe eyi’shi: “Tuusha bana balume bafikie na bashale mu nshibo yobe, muanda mbafikie mu kupuupa nsenga yoso.”
4 Anka yawa muana mukashi batshile baba bana balume babidi ebafuamisha. Akupu aye nkuakula’shi: “Oolo, bana balume babidi bafikile kuandi, anka tangukanga ku’abakatukilanga. 5 Patapelanga mufito, nsaa itabakanga kiibi kia kibundi baba bana balume batuukile. Tanguku kuende baba bana balume, anka su nuebalonda bukidi anuibabanga.” 6 (Aku namu baadi muibakaamishe ku musaka na ebafuamisha munkatshi mua tu mitshi tua lin tubaadi mulongie ku musaka.) 7 Biabia baba bantu nkuibalonda muishinda dia ku Yordane mu ma mbalo abasabukila lua ngua, na babaadi bafungie kiibi kia kibundi nka baba bantu babaadi abebalondo baki’abatuuku.
8 Kumpala kua’shi baba ba mpuupa babidi balale, yawa muana mukashi bakaamine mu musaka mubaabadi. 9 Aye nkulungula baba bana balume’shi: “Nauku’shi Yehowa enupa ino nsenga na’shi nuibetukuatshishe moo. Bantu boso ba mu ino nsenga mbabofule ku mashimba pa muanda wenu, 10 muanda tuibapushe bibaadi Yehowa mukamishe mema a Kalunga Kamonga kumpala kuenu pabaanudi bakatukie mu Ejipitu, na bibaanudi bakite ba nfumu babidi ba bena Amore, Sihone na Oge, babaanudi babutule abuaa bungi bushiya* bua Yordane. 11 Patupushishe bianka, tuikeele babofule ku mashimba, na takui muntu su ngumune munyingie eshimba* pa muanda wenu, muanda Yehowa Efile Mukulu eenu nyi Efile Mukulu amuaa muiyilu mula na pano pa nsenga. 12 Binobino nenuseendela namu, etshipeyi kuandi muishina dia Yehowa’shi, pa muanda nenulesha kifulo kia lulamato, anue namu anulesha nshibo ya nshami kifulo kia lulamato; na abitungu numpe kitunduilo akishinkamisha’shi anukakumbasha eyi* dienu. 13 Abitungu nupaashe muwa wa nshami na wa nyinami, na miuwa ya bakuetu balume na bakashi, na ya boso babadi nabo, na abitungu nuitupaashe* ku lufu.”
14 Biabia baba bana balume nkumulungula’shi: “Atutuusha miuwa yetu buenu!* Su tue muakule pabitale kiatudi bafuile, paapa atukakulesha kifulo kia lulamato na lulamato apetupa Yehowa ino nsenga.” 15 Kunyima kua biabia baadi muibayishe p’edidishi na moshi, muanda nshibo yaye ibaadi ilamate ku mudimba wa kibundi. Baadi mushale ku mudimba. 16 Akupu aye nkuibalungula’shi: “Ndayi ku miengie na nufuame kuakua munda mua mafuku asatu, bua’shi baba abenulondo tabenupetanga. Biabia apalukiila baba abenulondo, nui balombene kutungunuka na luendo luenu.”
17 Baba bana balume nkumulungula’shi: “Atukalombasha uno mutshipo ubuetutshipisha 18 nka su p’atutuele muiumbo buanya uno moshi wa buanda bumonga pididii kuididishi kubuetuishisha. Abitungu obungie nshobe, nyinobe, bakuenu na ba mu nshibo ya nshobe boso mu nshibo mobe. 19 Su muntu atuuka paasha pa nshibo yobe, mase aaye aekala pa mutue waye, na atue tatuikala na muanda. Anka su muanda wi bubi wafikila* muntu su ngumune ashala nobe mu nshibo, mase aaye aekala pa mitue yetu. 20 Anka su wakula kiatudi bafuile, t’atukalombasha mutshipo wekeele muitutshipishe.” 21 Aye nkuibalula’shi: “Bikitshikie muyile mayi eenu.”
Akupu aye nkuibatadiila na abo nkuenda. Kunyima aye nkuanya moshi umonga pididii kuididishi. 22 Biabia babakatukile na benda ku miengie na bashala kuakua munda mua mafuku asatu, mpa na pabalukiile baba babaadi abebalondo. Bantu babaadi abebalondo babaadi bebakimbe mu mashinda oso anka ta babaadi bebapete. 23 Akupu baba bana balume babidi nkuika ku miengie na nkusabuka muela, nkufika kui Yoshua muana a Nune. Abo nkumulondela mianda yoso ibaadi ibakitshikile. 24 Abo nkulungula Yoshua’shi: “Yehowa betupa nsenga ishima. Bantu boso ba mu ino nsenga mbabofule ku mashimba pa muanda wetu.”