Yobo
29 Yobo batungunukile na muisambo* waye, akula’shi:
2 “Su nadia kuikala sunga mu mieshi ipue kukila,
Mu mafuku abaadi Efile Mukulu andama,
3 Pabaadi mukite bia’shi kimunyi kiaye kimunyikie ku mutue wande,
Panaadi mukidile mu mufito ku bukuashi bua etaata diaye,
4 Panaadi nki nsongua na bukome,
Pabaadi bukuuku bu’Efile Mukulu abupushika mu kashibo kande k’epema,
5 Pabaadi Sha Bukome Boso ki’nka nami,
Pabaadi bana* bande boso banyifunyishe,
6 Pabaadi ngua yande ayitumpibua mu manteka,
Na mbuebue ayimpongoluela miela ya muimu.
7 Panaadi na kiubishi kia kutuuka ku kiibi kia kibundi
Na kushala mu mbalo ya bantu boso,
8 Ba nsongualume babaadi abammono na abekumbu ku lupese,*
Mpa na bantu banunu babaadi abeboo na abashala bemane.
9 Bakunkushi babaadi abekoko bua kuakula;
Babaadi abatuulu maasa aabo kukanua kuabo.
10 Mayi a bantu ba kinemo taabaadi aapushika;
Ludimi luabo lubaadi lulamate ku kilakalaka kia mukanua muabo.
11 Muntu oso baadi mumpushe baadi akula bi buwa pa muanda wande,
Na baba babaadi bammone babaadi abatuusha bukamonyi pa muanda wande.
12 Muanda naadi napaasha mulanda baadi atekie bukuashi,
Pamune na muana a nshiye* na muntu oso shibaadi na akumukuasha.
13 Muntu baadi pepi na kufua baadi angielela miabi,
Na naadi musankishe eshimba dia mukashi kilele.
14 Naadi mufuale kululama nka bu kilamba kiande;
Kululama kuande kubaadi nka bu nkadio* na bu lubango.
15 Nafikile meso bua ba mpofu
Na mikoolo bua bantu balemane.
16 Naadi nshaye na balanda;
Naadi nalondoola kilumbu kia bantu banshi naadi nauku.
17 Naadi natshokola mbanga ya nkitshishi a bubi
Na kunyenga kiakia kiadi mukuate ku meno aaye.
18 Naadi na kiubishi kia kuakula’shi: ‘Nankafuila mu nshibo muande,
Na mafuku ande aakekala bungi nka bu lusenga.
19 Mishi yande ayikapalakana mpa na mu mema,
Na lume luande alukashala ku ntabi yande bufuku bushima.
20 Ntumbo yande i kuete ayifiki ipia misango yoso,
Na buta bui muiyasa diande bukuete abutungunuka na kuasa.’
21 Bantu babaadi abanteemesha na kalolo koso,
Babaadi abashala baumine bua kutengiela elango diande.
22 Kunyima ku’ami kuakula, tababaadi dingi na kia kuakula;
Mayi ande abaadi aebasankisha.
23 Abaadi abantengiela nka bu bi’abatengiela mpeshi;
Abaadi na lukalo lua kupusha mayi ande nka bu muntu ekalakasha bua mpeshi a nfudiilo.
24 Panaadi nebasepesha, babaadi abamono bu bisha kukitshika;
Etaata dia mpala yande dibaadi adibashinkamiisha bianka.*
25 Naadi nebakunkusha nka bu nfumu aabo,
Naadi mushale bu nfumu munkatshi mua bisaka biaye bia basalayi,
Nka bu muntu asamba baba abadidi.