Yeshaya
1 Kimonua kibaadi Yeshaya* muana a Amoze mumone kibaadi kitale Yunda na Yelusalema mu mafuku a Oziase, Yotame, Akaze, na Ezekiya, ba nfumu ba Yunda nkino:
2 Teemesha, obe eyilu na tee matui, obe nsenga,
Muanda Yehowa mmuakule’shi:
“Bana banaadi mudiishe na mukushe,
Mbantombokiele.
3 Ngombe aukaa kalolo yawa mumuule,
Na mpunda aukaa kalolo kidiilo kia nfumu aaye
Anka Isalele tanguuku* nya,
Muilo wande aukitshi mianda kushi lushinguluilo.”
4 Malua kui muilo aukitaa miluisho,
Bantu banemeshibue bushito na bilubilo,
Lutandua lua bantu be bubi, bana baluile!
Mbasumbushene Yehowa;
Mbakitshine Eselele a Isalele mianda kushi kanemo;
Mbamutape mongo.
5 Mbalo kinyi dingi y’abenukupila bu bi’anufuimisha buntomboshi buenu?
Mutue oso ukuete kukumba,
Na eshimba dioso dikuete kukumba.
6 Kubanga muushi mua ngua mpa na ku mutue, takui mbalo ish’ayikumbu.
Kui malonda, mikambalo na malonda akata,
Ta mbeabukie* sunga kuiaanya sunga kuiabofusha na muimu.
7 Eumbo dienu ndishale bisumanga.
Bibundi bienu mbishikiibue kaalo.
Benyi bakuete kuluisha eumbo dienu mu meso muenu.
Di nka bu nsenga yabadi baluishe ngofu kui benyi.
8 Muana mukashi a mu Siyona mbamulekie bu mbalo ya kufuamina* muifuba dia nfinyo,
Bu kitanda ki muifuba dia makaaka,
Na bu lupata luabadi befunyishe.
9 Su Yehowa a biluilo tabadia kuitulekiela bantu bapeela bapande,
Tubadia kuikala bafikie nka bu Sodome,
Na tubadia kuifuanena na Gomore.
10 Pushayi eyi dia Yehowa anue bakunkushi ba Sodome be na mianda ibukopo.
Teeyi matui ku muiya* w’Efile Mukulu eetu, anue bantu ba mu Gomore.
11 Yehowa bakula’shi: “Milambu yenu ibungi ina bukuashi kinyi kuandi?”
“Milambu yenu ya kushiika kaalo ya mikooko ilume na muimu wa nyema idishibue kalolo ibantondo,
Na tansankila mase a ngombe yana, a mikooko yana na a mbushi.
12 P’anufiki bua kumueneka kumpala kuande,
Nanyi muinutekie bua kuibikita,
Mbua kuashina mpango yande su?
13 Lekayi kufika na milambu ya ntete.
Ne mushikue kabanda kenu.
Nukuete kukita misangelo ya mieshi ipia, kukokiela sabato, na kukita bikongeno.
Anka ntshimulombene kukumiina mianda ya malenganyi pamune na bikongeno bienu bia kishila.
14 Ne mushikue misangelo yenu ya mieshi ipia na ingi misangelo yenu.
Ibankidi bushito;
Nakooko kuiyisemuna.
15 Panuele maboko eenu muiyilu,
Ntantala kuanudi.
Sunga bia nukuete kuela nteko ibungi,
Nta mpusha;
Maasa eenu ngauule na mase.
16 Etumpeyi, nuitooshe;
Katushayi bikitshino bienu bibubi kumpala kuande;
Lekayi kukita mianda ibubi.
17 Longayi bia kukita mianda ibuwa, kimbayi kululama,
Ludikayi muntu akiengieshenaa,
Akuilayi muana a nshiye,*
Sambayi bua kukuatshishena mukashi kilele.”
18 Yehowa akula’shi: “Binobino fikayi, na tulumbuule mianda pankatshi petu.
Sunga miluisho yenu yekala imongie bu mase,
Ayifiki itooka nka bu neje;
Sunga yekala imongie bu kilamba kimongie pididii,
Ayifiki itooka nka bu buaa bua mikooko.
19 Su nubakumiina kukookiela na kuteemesha,
Anukadi bintu bibuwa bia muiumbo.
20 Anka su nubapele na nubatomboka,
Anukafu ku lupete lua ngoshi,
Muanda mukanua mua Yehowa nyi mubebiakula.”
21 Tala bibafiki kibundi kia lulamato bu ndumba!
Mubaadi muule kululama;
Kululama kubaadi akushala muanka,
Anka binobino ba ngipayishanyi nyi be muanka.
22 Kiamo kiobe kia arja kibafiki butshafu,
Na malofu* oobe mbeasoboloshe na mema.
23 Bakunkushi bobe be na mutue wi bukopo na be mu kipuano na ba ngifi.
Muntu oso a kuabadi mmufule kutshibibua kua milomo na akimbi nka kupeta bia buntu.
T’ababingishaa muana a nshiye,
Na t’abekalakashaa bua kilumbu kia mukashi kilele.
24 Nyi buakinyi Muanana a binyibinyi, Yehowa a biluilo,
Sha Bukome a Isalele, bakula’shi:
“Nakatusha ami nabene baluishi bande,
Na n’eobuela kui beshikuanyi bande.
25 Nakakunyoko,
Nakakatusha butshafu bobe na sabanga,
Nakakatusha butshafu bobe boso.
26 Nakalusha ba nsushi bobe nka bu ku mbangilo
Na bantu bobe abatuusha malango nka bu ku mbangilo.
Kunyima kua biabia abakakuitanyina bu Kibundi kia Kululama, Kibundi kia Lulamato.
27 Abakakuulu Siyona na kululama
Na bantu baye abalukiila, abakebakuulu na kululama.
28 Ba ntomboshi na ba nkitshishi ba miluisho abakatshokolua pamune,
Na baba abalekie Yehowa abakafudiila.
29 Abakapusha buufu pa muanda wa mitshi ibukome yanudi balakile,
Na anukakuatshika buufu pa muanda wa mafuba* anudi basangule.
30 Muanda anukekala bu mutshi ukata wi na mapupua aume,
Na bu efuba dishi na mema.
31 Muntu sha bukome akekala bu kisosua kiume,
Na mufubo waye aukekala nka bu ntolontolo ya kaalo;
Bioso abikatembe kaalo pamune,
Kushi muntu akuibishima.”