Yeshaya
24 Talayi! Yehowa kuete kuleka nsenga bisumanga na kukita bia’shi ishale kushi kintu.
Kuete kuiyifuudika* na kupalakasha bantu bashale muanka.
2 Abikekala mumune bua bantu boso:
Bua bantu na bua tshite muakuidi,
Bua mufubi na bua nfumu aaye,
Bua mufubi mukashi na bua nfumu aaye mukashi,
Bua muntu audisha na bua muntu aulu,
Bua muntu eyapusha na bua muntu eyapula,
Bua muntu apaana ebasa na bua muntu aata ebasa.
3 Abakalekie nsenga yoso bisumanga;
Abakeyipaula yoso,
Muanda Yehowa nyi bakula dino eyi.
4 Nsenga ikuete kudila;* ikuete kuluila.
Nsenga ayituushaa bintu ikuete kuuma; ikuete kuluila.
Bantu ba kinemo ba pa nsenga bakuete kubofula.
5 Bantu bashale pa nsenga mbeyiluishe,
Muanda ta mbakokiele miiya,
Mbashintuule miiya,
Na mbayipee kilombeno kia loso.*
6 Nyi buakinyi mulua ukuete kubutula nsenga,
Na baba bashale muanka mbapiile.
Nyi buakinyi bantu bashale mu nsenga babapeele,
Na bantu bapeela ngofu nyi babashala.
7 Nfinyo ipia ikuete kudila,* mutshi wa nfinyo ukuete kuuma,
Na baba boso be na muloo kuishimba bakuete kudila.
8 Muloo wa matumba ubalekie;
Tuleo tua bantu bafule miloo tubafudiila;
Tuleo tua muloo tua luseese tubalekie.
9 Bakuete kutoma nfinyo kushi loono,
Na malofu aakoluanaa aapushika buulo kui baba bakuete kuiatoma.
10 Kibundi kishale kushi bantu nkibumbukie;
Nshibo yoso ngishite bua’shi muntu su ngumune te mutuelanga.
11 Bakuete kuela misaase pabitale nfinyo mu bilayi.
Miloo yoso ibashimina;
Muloo wa nsenga ubapu.
12 Kibundi kibashala kikulu;
Kibelo kibasasudibua, kibafiki mututo wa bintu biluishibue.
13 Muanda bino nyi biabikekala mu nsenga, mukantshi mua miilo:
Nka bu p’abakuukula tukuba ku mutshi wa olive,
Nka bu kupumbuula apafiki kuumbula kua tukuba tua nfinyo ku nfudiilo.
14 Abakakaamisha mayi aabo,
Abakele misaase ya muloo.
Abakaukisha ntumbo ya Yehowa kukatukila ku kalunga ka mema.*
15 Nyi buakinyi abakatumbisha Yehowa mu nsenga ya etaata;*
Abakatumbisha eshina dia Yehowa Efile Mukulu a Isalele mu bisangi bia kalunga ka mema.
16 Kukatukila ku nfudiilo kua nsenga tukuete kupusha ngono ayamba’shi:
“Ntumbo* kui Yawa Mululame!”
Anka nakula’shi: “Nakooko, nakooko!
Malua kuandi! Ba nsesa babakitshi mianda ya bu nsesa;
Na bu nsesa, ba nsesa babakitshi mianda ya bu nsesa.”
17 Moo wibukopo, meena na miteo bikuete kukutengiela, obe muntu mushale muiumbo.
18 Muntu oso akasuuku tuleo tua moo wibukopo akapono mu buina,
Na yawa oso akatuuku mu buina akapono mu muteo.
Muanda biibi bia mema bia muiyilu abikakanguka,
Na bitako bia nsenga abikatshinkantshika.
19 Nsenga ibatanyika;
Nsenga ibatshinkishua;
Nsenga ikuete kutshinkatshinka bibukopo.
20 Nsenga ikuete kulunduka nka bu muntu mukolue malofu,
Ikuete kuenda aku na aku nka bu kitanda ki mu lupapi.
Bilubilo biayo bibeele bushito bui bukopo kuayidi,
Ayikapono na tayikabuuku dingi.
21 Mu diadia efuku Yehowa akatuulu binangu biaye kui kiluilo kia muiyilu
Na kui ba nfumu ba pa nsenga.
22 Na abakebabungu pamune
Nka bu bena lukano babadi babungie mu buina,
Abakebafungila mu lukano lua muushi mua nsenga;
Kunyima kua mafuku e bungi abakebatuudila binangu.
23 Yehowa a biluilo bafiki Nfumu ku muengie wa Siyona na mu Yelusalema,
Akamunana na ntumbo kumpala kua bakulu ba muilo waye.*
Kumpala kua kumunana kuaye kua ntumbo, mpa na mueshi ushima aukamueneka mufito,
Mpa na nguba amunyika takamunyika dingi.