Yobo
14 “Muntu mutandibue na muana mukashi,
Ekalaa na mafuku a muwa apeela na mmuule na nkalakashi.*
2 Atuuka nka bu kilongo na akupu afumbu;*
Asuuka nka bu mutaala na ashimina.
3 Binyibinyi, wemushimikie eyiso diobe padi,
Na wende naye* mu kusamba.
4 Nanyi e bia kutuusha muntu mutooshibue ku muntu shi mutooshibue?
Takui muntu su ngumune!
5 Su mbamutshibile mafuku,
Bungi bua mieshi yaye bui kodi;
We mumuelele mukalo washi bia kusabuka.
6 Kaasha meso oobe odi mumushimikie bua’shi ayikishe,
Mpa na p’apudisha efuku diaye, bu muntu abadi baate ku mufubo.
7 Muanda kui lukulupilo mpa na bua mutshi.
Su beutshiba, aumene dingi,
Na ntonga yao ayitungunuka na kukula.
8 Su mishi yao ibanunupa mu nsenga
Na kishishi kiao ki baafu mu nsenga,
9 Nka uki’aupusha eshiko dia mema aumene;
Na autuusha ntabi nka bu mutshi upia.
10 Anka muntu afu na alala shi na bukome;
Apatuulu muntu eshimba, e kunyi?
11 Mema aashimina mu kalunga ka mema,
Na muela aukama na aumu.
12 Muntu alala dingi paashi na t’abuuku.
T’abakabuuku mpa na pash’apekala eyilu kuanka,
Sunga tabakebabuusha ku tulo tuabo.
13 Ayi baabo! Su bodia kunfia sunga mu Mashama,*
Sunga kunfuamisha mpa na apakidi nsungu yobe,
Sunga kuntshibila kipungo bua kuntentekiesha!
14 Su muntu baafu, mmulombene kupetuula dingi muwa su?
Nakatengiela mafuku oso a mufubo wande wa pabukopo
Mpa na apakafiki kupososhibua kuande.
15 Okayitanyina, na nakakualula.
Okekala na lukalo lui bukopo lua kumona dingi mufubo wa maasa oobe.
16 Anka bua binobino, okuete kutungunuka na kubadika etabula diande dioso;
Okuete kutala penda muluisho wande.
17 Kilubilo kiande nkifungilue mu kibuta,
Na wemulamikie kilubilo kiande na kole.
18 Nka bu abipono muengie na aufingakana
Na abikatuka ebue pa mbalo yadio,
19 Nka bu mema aapelula mabue
Na mieleeshi yao ayikatusha lufuinkinyi pa nsenga,
Biabia nyi biodi muluishe lukulupilo lua muntu afuiyaa.
20 Otungunuka na kumukila bukome mpa na p’afu;
Oshintula mmuenekielo aaye, na omutumu mu mashama.
21 Bana baye abanemekibua, anka t’ebiuku;
Babafiki bu bantu ba bisumanga, anka t’ebitundula.
22 Apusha busungu nka penda pa ki na muwa;
Adidi* nka penda pa ki na muwa.”