Yobo
2 Kunyima kua biabia efuku dibaadi bana ba Efile Mukulu a binyibinyi batuele bua kuimana kumpala kua Yehowa dibakumbene, na Satana namu batuelele munkatshi muabo bua kuimana kumpala kua Yehowa.
2 Biabia Yehowa bayipuishe Satana’shi: “Ofiki kunyi?” Satana baluluile Yehowa’shi: “Nafiki mu kuifunya na mukutambakana pa nsenga.” 3 Nyi Yehowa nkuipusha Satana’shi: “Bomono* mufubi ande Yobo su? Takui muntu su ngumune bu’ye pa nsenga. Mmuntu mululame e na lulamato, atshinaa Efile Mukulu na asuukaa kukita bubi. Ki nka na lulamato luibukopo, sunga biontompo nkutakula bua kumukiengiesha kushi muanda.” 4 Anka Satana nkualula Yehowa’shi: “Kikoba ku kikoba. Muntu akatuusha kioso kiadi nakio bua kukaluila muwa* waye. 5 Anka bua kushintula mianda, oola eyasa diobe, oluishe mifufua na mbidi yaye na akakupele binyibinyi.”
6 Akupu Yehowa nkulungula Satana’shi: “Tala! E muiyasa* diobe! Anka tomuipanga.” 7 Biabia Satana nkukatuka kumpala kua Yehowa na nkuela Yobo biuluanga abiele busungu kubanga muushi mua ngua mpa na ku mutue waye. 8 Na Yobo batshile kipese kia elondo ditanyikie bua kuinyee pa mbidi, na baadi mushale mu buto.
9 Nfudilo a bioso mukashi aye nkumulungula’shi: “Oki nka na lulamato luibukopo su? Pela Efile Mukulu na ofue!” 10 Anka aye nkumulungula’shi: “Okuete kuakula nka bu muana mukashi shi na binangu. Abitungu tukumiine nka penda mianda ibuwa ayifiki kui Efile Mukulu, t’abitungu tukumiine dingi mianda ibubi su?” Mu ino mianda yoso, Yobo tabaadi muakule muanda wibubi* su ngumune.
11 Bakuuku basatu ba Yobo babapushishe pabitale makienga oso abaadi amufikile, na oso a kuabadi nkukatuka kuaye: Elifaze muina Temane, Bildade muina Shuwa na Zofare muina Naama. Biabia abo nkuipushena bua kufumankana pamune bua kuenda mu kusamba Yobo na bua kumunyingisha. 12 Pababamunuene ku bula, tababaadi bamutundule nya. Bababangile kudila na eyi dibukopo na kusaana bilamba biabo, na abo kuela lufufi muiyilu na ku mitue yabo. 13 Akupu babashalele naye mu nsenga munda mua mafuku musambobidi, kanya na bufuku. Takui muntu baadi mumulungule muanda kampanda, muanda babaadi bamone’shi dikienga diaye dibaadi bukopo.