Yeshaya
41 “Shalayi baumine nuteemeshe,* anue bisangi;
Miilo ipetuule bukome buayo.
Ifubuile pepi; akupu yakule.
Tuibungie pamune bua kiimu.
2 Nnanyi muibueshe muntu dia kutunduka nguba,
Amuitanyina mu kululama bua kumufubila,
Bua kumupa miilo
Na kuikasha ba nfumu ku matalua aaye?
Nanyi muibekashe bu lufufi kumpala kua lupete luaye lua ngoshi,
Bu kisosua ki’abapepula kui lupapi kumpala kua buta buaye?
3 Ebalondo, akilanga kushi lukalakashi
Mu mashinda ashabandile ngua yaye kutambukila.
4 Nanyi mukite na mukumbashe bino,
Ayitanyisha bipungo kubanga ku kibangilo?
Ami Yehowa, ne a Kumpala;
Na kui baba ba nfudiilo na kekala nka mumune.”
5 Bisangi mbibimone na bibakuatshika na moo.
Nfudiilo ya nsenga ibabangile kusuusa.
Babefubuila pepi na babafiki.
6 Muntu oso akuasha muinaye
Na alungula mukuabo mulume’shi: “Kankamana.”
7 Biabia nsendue anyingisha nsendue a kilonda;
Yawa abaata na kitotua
Anyingisha yawa atotola pa kiamo kia kutotuela.
Akula pabitale kulungakasha kua biamo’shi: “Kui buwa.”
Akupu abekinyingisha bibukopo na misumadi bua’shi takiponanga.
8 “Anka obe, Ô Isalele we mufubi ande,
Ô Yakobo, obe andi musangule,
Lutandua* lua Abalahama kuuku ande,
9 Obe andi muate kukatukila ku nfudiilo kua nsenga,
Na obe andi muitanyine kukatukila ku bipindi biayo bi kula ngofu.
Ne mukulungule’shi: ‘We mufubi ande;
Ne mukusangule; ntshi mukusumbushene.
10 Totshinanga, muanda ne nobe.
Tuekalakashanga, muanda ne Efile Mukulu oobe.
Nakunyingisha, oolo nakukuasha,
Mbinyibinyi na kukuata na mboko yande ibalume ya kululama.’
11 Tala! Baba boso bakukuatshile nsungu abakakuatshishua buufu na kuishibua milongo.
Baba bakuete kulua nobe abakekala bu kintu kia bisumanga na abakashimina.
12 Okakimbi bantu abalu nobe, anka tokebapete;
Bantu abalu nobe abakekala nka bu kintu kisha kikalaa kuanka, bu kintu kia bisumanga.
13 Muanda ami, Yehowa Efile Mukulu oobe, ne mukuate mboko yobe ibalume bibukopo,
Ami akulungula’shi: ‘Totshinanga. Nakukuasha.’
14 Totshinanga obe Yakobo musanda,
Anue bantu ba Isalele, nakukuasha,” nyi abiakula Yehowa, mukuudi oobe, Eselele a Isalele.
15 “Tala! Nakuikasha bu kintu kia kupuula nakio ntete,
Kintu kia kupuula nakio ntete kipia ki na maashi mpese ibidi.
Okafuntu miengie na kuiyisosa
Na okekasha tu miengie bu bipusu.
16 Okeyipeepula ,
Na kipapi akikende nayo;
Kipapi kibukopo akikeyipalakasha.
Okasankila mui Yehowa,
Oketumbisha mui Eselele a Isalele.”
17 “Bantu abakiengie na balanda bakuete kukimba mema, anka ta e kuanka.
Ludimi luabo nduume na nyota.
Ami Yehowa nakebaluula.
Ami Efile Mukulu a Isalele, tankebasubushena nya.
18 Nakakitshi biashi miela yalale ku tu miengie tushi na kintu
Na nsulo ya mema mu mabanda.
Nakaluula kabaaka bu eshiba dia mema di na malengie
Na nsenga ishi na mema bu nsulo ya mema.
19 Nakakunu mutshi wa sedre,
Mutshi wa akasia, mutshi wa mirte na mutshi wa muimu mu kabaaka.
Nakakunu mutshi wa jenevriye,
Pamune na mutshi wa frene na wa sipre mu mapia a kabaaka,
20 Bua’shi bantu boso bamone na baukie
Batee matui na bapushe’shi
Eyasa dia Yehowa nyi dibakitshi bino,
Na’shi Eselele a Isalele nyi muibipangie.
21 Yehowa bakula’shi: “Fikayi na kilumbu kienu.”
Nfumu a Yakobo bakula’shi: “Tuushayi bienu binangu.”
22 Tuushayi bishinkamisho na nuitulungule mianda ayikakitshika.
Etulunguleyi mianda ya kala,*
Bua’shi tunangushene pa yanka na tuukie biayikafudiila.
Sunga kuitulungula mianda ayifiki.
23 Etulunguleyi mianda ayikakitshika mu mafuku aafiki,
Bua’shi tuukie’shi nui b’efile.
Oolo, kitayi kintu kampanda, kibuwa sunga kibubi,
Bua’shi tukaanye patuikimono.
24 Talayi! Nui kintu kish’akikala kuanka,
Na mufubo wenu ngua bisumanga.
Muntu oso enusangula, nyi nkintu kia kushikua.
25 Nemuibueshe muntu dia kunundu, na afiki,
Muntu kukatukila dia kutunduka nguba akayitanyina eshina diande.
Akafuntu bakunkushi nka bu’shi bekeele bu ema.
Nka bu mbuufi afuntu ema ditaale.
26 Nnanyi baadi muakule bino kubanga ku kibangilo, bua’shi tuibiukie,
Sunga kubanga mu mafuku a kala, bua’shi tuakule’shi, ‘Mmuakule bia binyibinyi’?
Mbinyibinyi, takui muntu muibiukishe!
Takui muntu muibiakule!
Takui muntu mupushe muanda kuanudi!”
27 Naadi a kumpala kulungula Siyona’shi: “Tala! Biabadi’bi!”
Na nakatumu mulungudi a mukandu wibuwa ku Yelusalema.
28 Anka naadi nka natala, na takubaadi muntu su ngumune;
Takubaadi muntu su ngumune munkatshi muabo akutuusha elango.
Na naadi nka nebepusha bua’shi batuushe lualulo.
29 Tala! Boso buabo be nka bu kintu kishi kuanka.
Mifubo yabo ngia bisumanga.
Ma nkishi aabo a kilonda nyi ndupapi na kintu kish’akikala kuanka.