Yeshaya
42 Talayi! Mufubi ande andi mukuatshishene!
Muntu ande andi musangule, andi mukumiine!
Nemutuule kikudi kiande muadi;
Akatuadila miilo kululama.
2 T’akeele misaase sunga kukaamisha eyi diaye,
Na takakitshi biashi eyi diaye dipushikie mu kilayi.
3 T’akatshokola elengie disosekie,
Na t’akashimi mushinga uki’awifitshi miishi.
Akafuisha kululama kua binyibinyi.
4 T’akakooko sunga kusooshibua mpa na pakatuulu kululama pa nsenga;
Na bisangi abitungunuka na kutengiela muiya* waye.
5 Bino nyi bibakula Efile Mukulu a binyibinyi, Yehowa,
Mupangi a eyilu na Efile Mukulu Mukata muidiolole,
Yawa mukite* nsenga na bintu biayituusha,
Yawa apeyaa bantu bashale panka muwa
Na apeyaa bantu abatambuka panka kikudi:
6 “Ami Yehowa ne mukuitanyine mu kululama;
Ne mukukuate ku mboko.
Nakulama na kukutuusha bu kilombeno bua bantu
Na bu etaata dia miilo,
7 Buashi obuule ba mpofu meso,
Buashi otuushe bena lukano mu lukano lua muushi mua nsenga
Na buashi otuushe baba bashale mu mufito mu lukano.
8 Nnami Yehowa, diadia nyi eshina diande;
Ntampeyaa ungi muntu* ntumbo yande,
Sunga kupa ma nkishi kutumbishibua kuande.
9 Talayi, mianda ya kumpala ibakitshika;
Binobino naukisha mianda ipia.
Kumpala kuashi ituukie nenulungula yanka.”
10 Imbilayi Yehowa loono lupia,
Imbayi ntumbo yaye kukatukila ku nfundiilo kua nsenga,
Anue abatambukilaa pa kalunga ka mema na bioso biuule muanka,
Anue bisangi na bantu bashale muanka.
11 Kabaaka na bibundi biako bikaamishe eyi diabo,
Tu bibundi mushale Kedare.
Bantu bashale mu lubuebue beele misaase ya muloo;
Beele misaase na eyi di bukopo kukatukila ku nsongo kua miengie.
12 Bipe Yehowa ntumbo
Na biukishe kutumbishibua kuaye mu bisangi.
13 Yehowa akatuuku nka bu muntu e bukome.
Akabuusha kisumi kiaye nka bu kilobo kia ngoshi.
Akeele musaase, oolo akeele musaase wa ngoshi;
Akalesha’shi e bukome kukila beshikuanyi baye.
14 “Nashala talalaa kipindi ki bula.
Nekeele mushale muumine na muikande.
Nka bu muana mukashi kuete kutanda,
Nakadidi, nakapuwakana, na muwa awunfudiila mususa umune.
15 Nakaluisha miengie na tu miengie
Na kuumisha lubishi luayo loso.
Nakekasha miela bu bisangi*
Na kuumisha mashiba a mema e na malengie.
16 Nakakunkusha ba mpofu mu eshinda dia bashabauku
Nakakitshi biashi batambukile mu mashinda abashabauku.
Nakaluula mufito wi kumpala kuabo bu etaata
Nakaluula nsenga ishi ishalame bu nsenga ibaate.
Bino nyi mbiakebakitshina na ntakebasumbushena.”
17 Baba bakulupile mui ma nkishi,
Baba abalungula ma nkishi a kilonda’shi:* “Nui b’efile betu.”
Abakalushibua kunyima na abakakuatshika buufu.
18 Teemeshayi anue ba nshikue;
Talayi na numone anue ba mpofu.
19 Nanyi muikale mpofu su ta mufubi ande?
Nanyi muikale nshikue bu mukiendi antumu?
Nanyi muikale mpofu bu muntu mupete efuto?
Nanyi muikale mpofu bu mufubi a Yehowa?
20 Bomono mianda ibungi, anka tue mutuule binangu ku yanka.
Bofungula matui oobe anka tue muteemeshe.
21 Pa muanda wa kululama kuaye,
Yehowa mmusankile kutumbisha muiya na kuiwikasha na ntumbo.
22 Anka bano bantu mbebapaule na mbebanyengie bintu;
Boso buabo mbakuatshibue mu mena na mbafuame mu nkano.
Mbebapaule kushi muntu akuibapaasha,
Na mbebanyengie kushi muntu akula’shi: “Ebalusheyi.”
23 Nanyi munkatshi muenu akapusha bino?
Nanyi a katee matui na kuteemesha na kulonga mianda bua mafuku aafiki?
24 Nanyi mutuushe Yakobo bua’shi bamunyengie bintu
Na mutuushe Isalele kui bantu abapaula bintu?
Nta Yehowa, Yawa atudi bakitshine miluisho?
Babaadi bapele kutambukila mu mashinda aaye,
Na ta mbakookiele miiya yaye nya.
25 Biabia batungunukile na kumupongoluela nsungu ibukopo,
Baadi mumuleshe bi nsungu yaye na amutadila bua’shi akiengie bua ngoshi.
Ngitaatshishe bintu bioso bimuifunyishe, anka ta mutuule binangu kuanka.
Ngimutembele bu kaalo, anka ta muibituule kuishimba.