Yeshaya
40 Efile Mukulu eenu amba’shi: “Sambayi, sambayi muilo wande.”
2 “Lungulayi eshimba* dia Yelusalema,
Na numuukishe’shi, mufubo waye wa pa bukopo ubapu,
N’ashi mbafute bua kupiila kuaye.
Mmupete efuto diaye dioso* ku eyasa dia Yehowa bua miluisho yaye yoso.”
3 Eyi dia muntu kuete eele musaase mu kabaaka’shi:
“Lumbuulayi eshinda dia Yehowa!
Lulamishayi eshinda dikata mu kabaaka bua Efile Mukulu eetu.
4 Ebanda dioso dikaamishibue,
Na muengie oso na ka muengie koso biyishibue.
Abitungu babaate nsenga i na bipoko,
Na nsenga ishi ishalame ayikekala mapia.
5 Ntumbo ya Yehowa ayikafumbulua,
Na bantu boso abakeyimono pamune,
Muanda mukanua mua Yehowa nyi mubebiakula.”
6 Teemesha! Muntu akula’shi: “Ela musase!”
Ungi ayipusha’shi: “Neele musase wa kinyi?”
“Bantu boso be bu lubishi.
Kifulo kiabo kioso kia lulamato ki nka bu kilongo kia mu mapia.
Mbinyibinyi bantu mbekale penda lubishi.
8 Lubishi aluumu,
Kilongo akifumbu,
Anka eyi dia Efile Mukulu eetu adishala kuanka bua loso.”
9 Kaamina ku muengie ula,
Obe muana mukashi atuala mukandu wi buwa bua Siyona.
Kaamisha eyi diobe na bukome,
Obe muana mukashi atuala mukandu wi buwa bua Yelusalema.
Edikaamishe, totshinanga.
Ukisha bibundi bia Yunda’shi: “Efile Mukulu eenu biadi’bi.”
10 Talayi! Muanana Mukile Bukata Yehowa akafiki na bukome,
Na mboko yaye ayikunkusha buaye.
Talayi! Efuto diaye di kuadi,
Na efuto di’afutu di kumpala kuaye.
11 Akapasukila* lombe luaye lua mikooko nka bu mulami a mikooko.
Akabungu bana ba mikooko na mboko yaye,
Na akebasemuna mu kiadi kiaye.
Akakunkusha na kalolo yaya ikuete komesha tuana tuayo.
12 Nnanyi mupime mema muiyasa diaye
Na mupime eyilu na eyasa diaye dibaale?*
Nnanyi mubungie lufufi lua nsenga mu kipimino
Sunga mupime bushito bua miengie mu bipimino
Na mupime tu miengie mu bipimino?
13 Nnanyi mupime* kikudi kia Yehowa,
Na naanyi e kumupa malango na kumulongiesha muanda kampanda?
14 Nnanyi aadi muipushe bua kupeta lushinguluilo,
Sunga’shi nnanyi mumulongieshe eshinda dia kululama,
Sunga kumulongiesha kiukilo,
Sunga kumulesha eshinda dia lushinguluilo lua binyibinyi?
15 Talayi! Miilo inka bu ekopola dia mema adikatuka mu mbeketshi adipono,
Na abeyimona nka bu lufufi ku bipimino.
Talayi! Ebuesha bisangi nka bu lufufi.
16 Sunga Lebanone takumbana bua kulama kaalo akatembe,*
Na nyema yaye ya mu kisuku tayikumbana bua mulambu wa kushiika kaalo.
17 Miilo yoso inka bu kintu kishi kuanka kumpala kuaye;
Ebamonaa nka bu kushi kintu, nka bu kintu kish’akikalaa kuanka.
18 Nuikupuandikisha Efile Mukulu na nnanyi?
Nui kuakula’shi mmuifuanene na kinyi?
20 Muntu asangula mutshi bua mulambu waye,
Mutshi ushaunyanga.
Akimbi nsendue auku kufuba kalolo
Bua kulumbuula nkishi shi bia kupona.
21 Tanuibiuku su?
Tanubaadi bebipushe?
Tababaadi benulungule bianka kubanga ku kibangilo?
Tanubaadi bebipushe kubanga ku kibangilo kia nsenga?
22 Kui Muntu mushale panundu pa kifunda kia nsenga,
Na bepashale be nka bu mpasu.
Molole eyilu nka bu kilamba kipelepele,
Na mmuadishe eyilu nka bu kashibo k’epema ka kushala.
23 Ekasha bantu bakata bu kintu kia bisumanga
Na ekasha ba nsushi* ba pa nsenga bu kintu kish’akikalaa kuanka.
24 Nka bakia bakatuka mu kuibakuna,
Nka bakia bakatuka mu kuibamiamina,
Nka bishishi biabo bikia bimene mishi mu nsenga,
Abebapepula na abaumu,
Na lupapi aluibatuala nka bu bisosua.
25 A Kishila amba’shi: “Nui balombene kumpuandikisha na nanyi bua’shi nekale mumune naye?”
26 “Kaamishayi meso eenu muiyilu na numone.
Nanyi mupangie bino bintu?
Nyi Ngiawa ebituushaa bu kiluilo muyile bungi buabio.
Ebitanyina bioso muishina diabio.
Pa muanda wa bukome buaye buibungi na bukome buaye abutshinyisha,
Takui su nkimune kia ku bianka kikutshikue.
27 Ô Yakobo buakinyi wakula, Ô Isalele buakinyi wamba’shi:
‘Eshinda diande ndifuame ku meso kua Yehowa,
Na Efile Mukulu ta mbingisha’?
28 Touku su? Tuemupushe su?
Yehowa mupangi a bintu bioso bi pa nsenga, nyi Efile Mukulu bua ikalayika.
Takokaa sunga kubofula.
Lushinguluilo luaye talui bia kupusha.
29 Apeyaa muntu mukookie bukome
Na baba bashi na bukome ebapeyaa bukome buibungi.
30 Bana balume abakakooko na kubofula,
Na ba nsongualume abakakokola na bapone,
31 Anka baba bakulupile mui Yehowa abakapetuula bukome.
Abakapapama na mbaba nka bu miumba.
Abakasuuku lubilo na tababofula;
Abakatambuka na tabakooko.”