Mwanda wa 116

Twi balombeene kwikala na muwa wa looso

OUKU kikwete kubadika kano ka nsongwakashi na beenaye su? Nguno mukanda okwete kubadika: Mukanda awitulondela myanda i mu Bible. Na bakwete kubadika uno mwanda okwete namu kubadika​—“Twi balombeene kwikala na muwa wa looso.”

Ouku kyabakwete kulonga su? Kya kumpala, abalongo shi abitungu kuuka Yehowa na Mwana aaye Yesu bwa kupeta muwa wa looso. Mu Bible abetulesha shi: ‘Muwa wa looso ngi’shi bantu bawukye Efile a binyibinyi nkapenda umune, na Mwana aye abatumine pa nsenga, Yesu Kidishitu.’

Twi balombeene kulonga pabitale Yehowa Efile Mukulu na Mwana aaye Yesu naminyi? Ungi mushindo wa kuuka Efile Mukulu na Mwana aaye nyi nkubadika Mukanda awitulondela myanda i mu Bible kubanga ku mbangilo mpa na ku nfudiilo. Awitulongyesha myanda ibungi pabitale Yehowa na Yesu, ta nabyo su? Na awitulungula myanda ibungi pabitale bintu byabadi bakite na byabakyebe kukita. Kadi abitungu tukite bibungi kushi penda kubadika uno mukanda.

Okwete kumona ungi mukanda wabadi batule pashi su? Wawa mukanda nyi Bible. Teka muntu bwashi akubadikile ma mbalo a mu Bible mwabadi baate myanda i mu uno mukanda. Mu Bible abetulungula myanda yooso yatudi na kya kukita bwa kufubila Yehowa mu mushindo wibuwa bwa kupeta muwa wa looso. Byabya abitungu twikale na kiubishi kya kulonganga Bible misusa yooso.

Anka tabitungu penda kulonga myanda itale Yehowa Efile Mukulu na Yesu Kidishitu nya. Twi bakumbeene kuuka Yehowa na Yesu kalolo na malongyesha abo, anka twakutwa kupeta muwa wa looso. Ouku kingi kintu akitungu kukita su?

Abitungu twikale na nshalelo mwipushene na myanda yatukwete kulonga. Okyotentekyesha Yuudase Iskaryote su? Baadi umune a ku balongi 12 bababadi basangule kwi Yesu bwashi bekale batumibwa baaye. Yuudase baadi auku Yehowa na Yesu kalolo. Kadi ouku kibaadi kimufikile su? Kunyima kwa mafuku babangile kwitatula, na bapanyine Yesu kwi beshikwanyi ku nfwalanga 30. Byabya, Yuudase takapete muwa wa looso nya.

Okyotentekyesha Gekazi, yawa muntu atwikalanga balongye mu Mwanda wa 69 su? Baadi akumina kupeta bingi bilamba na makuta ashibaadi aaye. Aye nkudimba bwashi apete byabya bintu. Kadi Yehowa baadi mumunyokye. Na etunyoko namu su tubapele kukokyela miiya yaaye.

Anka kwi bantu bebungi babaadi bafubile Yehowa na bululame booso. Abitungu tulonde kileshesho kyabo, ta nabyo su? Samwele mwana mukinga nkileshesho kibuwa kya kulonda. Tentekyesha shi, bu byatwikalanga bamone mwisaki aditulondela Mwanda wa 55, baadi penda na bipwa binanka sunga bitano pababangile kufubila Yehowa ku tabernakele. Byabya, sunga wekala mukinga naminyi, twe mushadile menemene bwa kufubila Yehowa nya.

Eyendo, atwe bantu booso abitungu tulonde kileshesho kya Yesu Kidishitu. Sunga pabaadi ki mwana mukinga, bu byabetulesha mwisaki aditulondela Mwanda wa 87, baadi ku ntempelo kwete kwisamba na bangi bantu pabitale Nshaaye a mwiyilu. Tulondeyi kileshesho kyaaye. Tukiteyi mwetu mooso bwa kulungula bantu pabitale Efile Mukulu etu Yehowa na Mwana aaye Yesu Kidishitu. Su tubakitshi byabya, twi bakumbeene kupeta muwa wa looso mu mpaladiso mupya a Efile Mukulu pa nsenga.

Yowano 17:3; Misambo 145:1-21.