Bya binyibinyi pabitale Yaya, Mwana, na Kikudi kiselele

BANTU bakumiine mu lulambukisho lwa Busatu bwiselele abamba shi Efile Mukulu e mu bantu basatu​—Yaya, Mwana na Kikudi kiselele. Abamba shi booso basatu bemumune, basha bukome booso, na bashi na mbangilo. Byabya, muyiile lulambukisho lwa Busatu bwiselele, Yaya, Mwana na Kikudi kiselele, booso mb’Efile, kadi kwi nka penda Efile umune.

Bantu bebungi abakumiina lulambukisho lwa Busatu bwiselele abashinkamisha shi ta mbalombeene kwilupatuula nya. Anka, mbalombeene kupwandikisha shi luno lulambukisho alutuukila mu Bible. Bibuwa tushinguule shi kishima “Busatu bwiselele” takii mu Bible nya. Kadi lulambukisho lwa Busatu bwiselele alusanganyibwa mwanka su? Bwa kwalula luno lukonko, tubande kutala maverse abatushaa kwi baaba abakumiina luno lulambukisho lwa Busatu bwiselele.

“EYI DIBAADI EFILE MUKULU”

Yowano 1:1 alesha shi: “Ku mbangilo kubaadi Eyi, Eyi dibaadi kwi Efile Mukulu dingi adyo dibaadi Efile Mukulu.” Kunyima nka mu shapitre umune yawa, Yowano mutumibwa balesheshe patooka shi “Eyi” nyi Yesu. (Yowano 1:14) Byabya bu byabetamina Eyi bu Efile Mukulu, bangi abashinkamisha shi Yaya na Mwana mbalombeene kwikala mu Efile umune.

Uka shi kino kipindji kya mu Bible kibaadi kifundjibwe bwa mususa wa kumpala mu kina Greke. Kunyima, abaadi baluule bifundwe bya mu kina Greke mu ingi ndimi. Kadi, bantu bebungi babalulwile Bible mu ingi ndimi, ta mbafunde shi “Eyi dibaadi Efile Mukulu” nya. Bwakinyi? Muyiile kiukilo kyabo kya kina Greke kya kala, baaba abalulwile Bible abamwene shi bibaadi abitungu kwaluula myaku ya kina Greke ayilesha shi “Eyi dibaadi Efile Mukulu” mu ungi mushindo. Mushindo kinyi? Tubande kutala bino bileshesho bipeela bya ma Bible a mu ingi ndimi: “Eyi dibaadi bi Efile.” (La Sainte Bible [1908], a L. Segond H. Oltramare). “Eyi dibaadi efile.” (The New Testament in an Improved Version) “Mwaku ubaadi n’Efile Mukulu na ubaadi byadi.” (La Bible du Centenaire) Muyiile ano ma Bible, Eyi tadibaadi Efile Mukulu aye nabeene nya.a Kadi bu bi Eyi di pa mbalo ikata munkatshi mwa bipangwa bya Yehowa nyi bwakinyi abeditamina bu “efile.” Pano kishima “efile” akilesha “sha bukome.”

KIMBA MUSHINDO WA KUUKA INGI MYANDA

Bantu bebungi tabauku kina Greke kya kala nya. Kadi mushindo kinyi oodi mukumbeene kuuka kibaadi akikyebe kwakula Yowano mutumibwa? Banda kwata kino kileshesho: Mulongyeshi kwete kupatulwila balongi mwanda kampanda. Kadi balongi be kwikala na binangu bilekeene pabitale mushindo wa kupatuula wawa mwanda. Balongi mbakumbeene kwiupatuula naminyi? Mbakumbeene kwipusha mulongyeshi bwashi ebapatulwile kalolo. Kushi mpaka, kulonga kwa ingi myanda ibungi nkukumbeene kwibakwasha bwa kupusha wawa mwanda kalolo. Bi mumune, bwa kupusha akipatuula Yowano 1:1, we mukumbeene kutala mu Mukandu wibuwa wa Yowano bwa kuuka ingi myanda pabitale Yesu. Kulonga kwa myanda ibungi pabitale uno mwanda akukyebe nkukwasha bwa kupeta mpushisho ebuwa.

Byabya, banda kutala bibaadi bifunde dingi Yowano mu shapitre 1, verse 18: “Ta kwi muntu su ngumune tabamwene Efile Mukulu [Sha-bukome booso].” Kadi bantu abamwene Yesu, Mwana, mwanda Yowano akula shi: “Eyi [Yesu] dibaatshile mbidi, adyo nkushaala munkatshi mwetu, atwe namu nkumona ntumbo yaaye.” (Yowano 1:14) Kadi, mushindo kinyi ulombeene Mwana kwikala mu Efile Sha-bukome booso? Yowano bakwile dingi shi Eyi dibaadi “n’Efile Mukulu.” Na dingi mushindo kinyi ulombeene muntu kwikala na muntu kampanda akupu aye nkwikala yawa muntu? Anka bu byabidi bifundjibwe mu Yowano 17:3, Yesu balesheshe patooka kwilekena kwi pankatshi paaye na Nshaaye e mwiyilu. Ayitamina Nshaye bu “Efile [umune] a binyibinyi.” Na ku nfudiilo kwa Mukandu wibuwa waye, Yowano bakwile mu kikoso shi: “Bino mbeebifunde bwa’shi nukumiine’shi Yesu nyi Kidishitu Mwan’Efile Mukulu.” (Yowano 20:31) Shinguula shi, Yesu tabamwitamina bu Efile Mukulu nya kadi abamwitamina bu Mwan’Efile Mukulu. Ino ingi myanda i mu Mukandu wibuwa wa Yowano ayilesha mushindo autungu kupusha Yowano 1:1. Yesu, Eyi, nyi “efile” mwanda e na mbalo ikata kadi te mumune na Efile Mukulu Sha-bukome booso nya.

KIMBA MUSHINDO WA KUSHINKAMISHA MYANDA

Banda kwela binangu dingi pabitale kileshesho kyetu kya mulongyeshi na balongi. Banda kwela binangu su bangi bakii na mpaka, sunga kunyima kwaye kwibapatulwila ingi myanda ibungi. Mbalombeene kukita kinyi? Mbalombeene kwenda kwi ungi mulongyeshi bwashi ebapatulwile ingi myanda pabitale uno mwanda. Su mulongyeshi a kabidi bashinkamisha byakwile mulongyeshi a kumpala, mukumbeene kupudisha mpaka ya balongi booso. Bi mumune, su tokumiina byabadi bafunde kwi Yowano, mufundji a Bible, pabitale kipwano ki pankatshi pa Yesu n’Efile Mukulu Sha-bukome booso, we mukumbeene kutala ungi mufundji a Bible bwa kutalula su byabadi bafunde mby’eyendo. Bu kileshesho, banda kutala bibafundjile Mateo. Pabitale nfudiilo a bya pano, baadi mwambuule bishima bya Yesu pabakwile shi: “Anka bwa dyaady’efuku na yaawa nguba takwi eebyuuku su ngumune, sunga miikeeyilu ya mwiyilu, sunga Mwana, kukaasha penda Yaya buupenka bwaye.” (Mateo 24:36) Mushindo kinyi aulesha bino bishima shi Yesu t’Efile Mukulu Sha-bukome booso?

Yesu bakwile shi Yaya auku bibungi kukila Mwana. Byabya su Yesu badya kwikala Efile Sha-bukome booso, badya kuuka myanda yooso ayiuku Nshaaye. Byabya Mwana ta mulombeene kwikala mumune na Nshaaye nya. Anka bangi mbalombeene kwamba shi: ‘Yesu e na nyikashi ibidi. Pano akula bu muntu.’ Kadi sunga bibadya kwikala byabya, twi kwamba naminyi pabitale kikudi kiselele? Su kibadya kwikala Efile Mukulu umune, Yaya, bwakinyi Yesu tabakwile shi akiuku abiuku Yaya?

Pokwete kutungunuka na kulonga kwa Bible, okyebe kwiubidishena na maverse ebungi a mu Bible atale uno mwanda. Aalesha bya binyibinyi pabitale Yaya, Mwana na kikudi kiselele.​—Misambo 90:2; Bikitshino 7:55; Beena-Kolose 1:15.

[Mwanda wi mushi mwesaki]