Abaabutula Yelusalema

Muilo wa Yunda ubaadi ulekie Yehowa misango ibungi bua kulanguila b’efile ba madimi. Munda mua bipua bibungi, Yehowa baadi apimi kui bakuasha. Baadi ebatumina batemuki bebungi bua kuibadimusha, ta babaadi abebapushisha nya. Abaadi ababepuula batemuki. Yehowa baadi muimikie lulanguilo luabo lua ma nkishi naminyi?

Nabukondonosore nfumu a Babilone baadi atshokola bisamba kimune ku kimune. Musango wa kumpala ubaadi mutshokole Yelusalema, baadi mukuate Nfumu Yoyakine, ba nfumu ba miilo, basalayi na ba-sha binangu enda nabo mu Babilone. Baatshile na bupeta boso bubaadi mu ntempelo a Yehowa. Akupu Nabukondonosore batudile Sedekiya bu nfumu a Yunda.

Ku mbangilo, Sedekiya baadi akookiela Nabukondonosore. Kadi miilo ibaadi mu buipi buaye na batemuki ba madimi nkudimusha Sedekiya bua kutombokiela Babilone. Kadi Yelemiya nkumudimusha’shi: ‘Su otomboka, akuikala kuipayisheena, nsala na bipupa mu Yunda.’

Kunyima kua kubikala munda mua bipua muanda, Sedekiya baadi mutombokiele Babilone. Aye nkuteka basalayi ba mu Ejipitu bua kumukuasha. Nabukondonosore batumine basalayi baye buabadia kukuata Yelusalema, abo nkushaala mu buipi bua kibundi. Yelemiya nkulungula Sedekiya’shi: ‘Pusha bibaakula Yehowa, su okelambula kui bena Babilone, obe na kibundi anukapanda. Kadi su okutua kukita biabia, bena Babilone abakiebe kushiika Yelusalema na kuinutuala bu bena lukano.’ Sedekiya nkuakula’shi: ‘Nta neelambula nya!’

Kunyima kua kipua na kipindi, basalayi ba bena Babilone abaadi babumbule midimba ya Yelusalema abo nkushiika kibundi kaalo. Abashiikile dingi ntempelo, abo nkuipaa bantu bebungi na kutuala binunu bia bantu mu lukano.

Sedekiya nkusuuka mu Yelusalema, kadi bena Babilone nkumulonda. Abo nkumukuatshila pa buipi na Yeeriko, nkumutuala kui Nabukondonosore. Nfumu a Babilone nkutuula Sedekiya buadia kumona kuabepaa bana baaye. Akupu Nabukondonosore nkutunya Sedekiya meso, amuela mu lukano mubaadi mufuile kunyima kua mafuku. Kadi Yehowa baadi mulee bena Yunda’shi: ‘Kunyima kua bipua 70, Nakenualusha kuenu mu Yelusalema.’

Nkinyi kibaadia kufikila ba nsongualume babaabadi bakuate mu lukano mu Babilone? Abaadia kushala na lulamato kui Yehowa su?