Yehowa batumu Yelemiya bua kulungula mukandu

Yehowa baadi musangule Yelemiya bua kuikala mutemuki a muilo wa Yunda. Baadi mumutume na mukandu wa kudimusha bantu bua kuleka kukita mianda ibubi. Anka Yelemiya bakuile shi: ‘Yehowa, ne’nka muana mukinga. Ta nguuku bia kuakula kui bantu nya.’ Yehowa nkumulungula shi: ‘Totshiinanga nya. Nakakulungula biodia kuakula. Nakakukuasha.’

Yehowa nkulungula Yelemiya bua kubunga bakulu ba muilo, na buadia kutanya ebuka kumpala kuabo na kuakula’shi: ‘Nyi bi’abakasooso Yelusalema nka bu dino ebuka.’ Pa bakitshiine Yelemiya bibaadi Yehowa mumulungule, bakulu ba muilo abafiitshile munda bikata. Ungi tshite muakuidi abetamina bu Pashure baadi mukupile Yelemiya aye nkumuela mu moomba. Yelemiya tabaadi sunga bia kusaana bufuku bushima nya. Pashure bafikile mu kumutuusha butookie namashika. Yelemiya bambile’shi: ‘Ta ngobesha dingi bino nya. Nalekie kulungula mukandu wa Yehowa.’ Baadi mukookie kuiulungula su? Nya. Pabaadi munangushene dingi kalolo bua wawa muanda, Yelemiya bambile’shi: ‘Eyi dia Yehowa di nka bu kaalo akatembe munda muande. Ntshi mulombene kuimika kulungula nya.’ Yelemiya baadi mutungunukie na kudimusha bantu.

Kunyima kua bipua, kubekeele ungi nfumu mu Yunda. Ba tshite muakuidi na batemuki ba madimi babaadi bashikue mukandu wa Yelemiya. Abo nkulungula ba nfumu’shi: ‘Abitungu kuipaa uno muntu.’ Yelemiya kuibalungula’shi: ‘Su nubangipaa, anusemuna mase a muntu shi musoole. Muanda mukandu wa ngakula nta nguande, ngua Yehowa.’ Pabapushishe ba nfumu biabia, abambile’shi: ‘Uno muntu nta nga kuipaa nya.’

Yelemiya nkutungunuka na kulungula mukandu wa kiimu, ba nfumu ba muilo abafiitshile munda bikata. Abo nkuteka nfumu bua kuipaa Yelemiya. Nfumu kuibalungula’shi be kukita kioso kiabakumiina na Yelemiya. Abo nkukuata Yelemiya, nkumuela mu buina bua matekie na baadi abakulupila’shi afuila muamua. Yelemiya nkubanga kukulukila mu matekie.

Ungi mukata a muibalasa dia nfumu abetamina bu Ebede-Meleke nkulungula nfumu’shi: ‘Ba nfumu ba muilo abeele Yelemiya mu buina! Su tuamuleka muamua afu.’ Nfumu nkulungula Ebede-Meleke bua kuata bantu 30 bua’shi bakatushe Yelemiya mu buina. Ta tui balombene kuikala namu bu Yelemiya, shi baadi mutadiile kintu su nkimune buakidia kumukutshishua kulungula mukandu su?