Bufumu bui bu mutshi ukata

Dingi efuku bufuku, Nabukondonosore balootele kilootua kibamukuatshiishe moo. Baadi muitanyine bantu ba-sha binangu buabadia kumupatuluila. Anka, takubaadi su ngumune a kuabadi a kumupatuluila nya. Ku nfudiilo a bioso, nfumu baadi mulungule Ndanyele.

Nabukondonosore nkulungula Ndanyele’shi: ‘Mu kilootua kiande, namono mutshi. Ubakudile ao nkukakuma muiyilu. Ubaadi bia kumueneka mbalo yoso mu nsenga. Ubaadi na masaki na bikuba bibuwa. Nyema ibaadi ayishaala mu mutaala wao, na toonyi tua muiyilu tubaadi atuibaka masua mu ntabi yao. Akupu, muikeyilu nkufika muiyilu. Aye nkuakula’shi: ‘Shindaayi mutshi, tshibaayi ntabi yao. Anka kishishi na mishi yao, ekilekieyi mu nsenga, na lukano lua kiamo na lua munyinga usangue luikiifunyishe. Eshimba dia wawa mutshi adikashintuluka kubanga ku dia muntu na ku dia nyema, bipungo musambobidi abikidi pa mbidi pawo. Bantu boso abakatundula shi Efile Mukulu nyi Nfumu a bufumu bua bantu, eebupeyaa aakiebe.’

Yehowa nkuleesha Ndanyele bibaadi abipatuula kilootua. Pabaadi Ndanyele mupushe kilootua, bapushishe moo. Aye nkuakula shi: ‘Nfumuami, namonanga’shi kino kilootua nkia beshikuanyi noobe, kadi nkikutale. Mutshi ukata ubaadi ushindiibue, nnobe. Okashimisha bufumu boobe, okadi lubishi mu kisuku nka bu nyema a kisuku. Bu biakule muikeyilu bua kuleka kishishi na mishi yakio, okalukiila dingi bu nfumu.’

Kunyima kua kipua, Nabukondonosore baadi atambuka ku kitenta kia nshibo yaaye, na kukaanyisha kibundi kia Babilone, na kuakula’shi: ‘Tala luno lupata luandi muibakie bialudi buwa. Ne muiluibakie ku ntumbo ya bukata buande!’ Pabaadi kiakula, eyi dibatuukile muiyilu diamulungula’shi: ‘Nabukondonosore! Boshimisha bufumu boobe.’

Kubanga’nka yaaya nsaa, Nabukondonosore baadi mushimishe binangu biaye afika nka bu nyema a mu kisuku. Abamubingile muibalasa diaaye, aye nkuenda mu kushaala na nyema mu kisuku. Nyene ya Nabukondonosore ibakudile ayo nkufika’nka bu mafushi a konyi ka moombo na ngala yaaye bu ya konyi.

Kunyima kua bipua musambo, binangu bia Nabukondonosore bibaadi bimualukiile dingi, Yehowa nkumualushuula bu nfumu a Babilone. Akupu Nabukondonosore bambile’shi: ‘Natumbula Yehowa, Nfumu Sha-kuiyilu kula. Binobino nashinguula’shi Yehowa nyi Mukunkushi. Ayishaa ba-sha kuitatula, na mmulombene kupa bufumu muntu oso aakumiina kuibupa.’