Eyasa adifundu ku mudimba

Muenda mafuku, Belshasare bafikile nfumu a Babilone. Dingi efuku bufuku, baadi muitanyishe bantu ba kineemo bebungi ba muiumbo ku madio. Aye nkulungula bafubi baye bua kutuusha makopo a ôlo abaadi Nabukondonosore muate mu ntempelo a Yehowa. Belshasare na beenyi baye abaadi batomene mu aa makopo na kutumbisha b’efile babo. Eyasa dia muntu dibaatukile musango umune, adio nkubanga kufunda bishima bishabipushika ku mudimba wa nshibo ya kudiila.

Belshasare bakuatshikilue na moo. Aye nkuitanyisha ba-sha malenganyi baye, na kuibala’shi: ‘Su muntu apatuula bino bishima, namutuulu bu muntu mukata a kasatu mu Babilone.’ Abo nkupima, kadi takubaadi su ngumune baadi mobeshe kupatuula biabia bishima nya. Akupu ndalamumba batuele akula’shi: ‘Kui muntu e n’eshina bu Ndanyele baadi apatuluila Nabukondonosore mianda. Mulombene nkupatuluila bino bishima.’

Ndanyele nkutuela mui nfumu. Belshasare nkumulungula’shi: ‘Su obadika bino bishima na kuibipatuula nankupa kikano kia mu nshingo kia ôlo na nkutuula bu muntu mukata a kasatu mu Babilone.’ Ndanyele bambile’shi: ‘Ntshi na lukalo na bia buntu biobe nya, anka nakulungula akipushiisha bino bishima. Nshobe Nabukondonosore baadi na kuitatula, kadi Yehowa baadi mumuishe. Weuku mianda yoso ibaadi imufikile, anka bokutua kunemeka Yehowa pa kutomena maalua mu makopo a ôlo a mu ntempelo Aaye. Nyi buakinyi Efile Mukulu bafundu bino bishima’shi: Mene, Mene, Tekel na Parsin. Abipatuula’shi bena Mede na bena Pelese abakatshokola Babilone na t’okekala dingi nfumu nya.’

Bibaadi abimueneka nka bu kushi muntu e kutshokola Babilone. Kibundi kibaadi kikaluilue na midimba ibula na muela ukata. Kadi munkatshi’abufuku, bena Mede na bena Pelese abaadi bakuate Babilone. Siruse Nfumu a bena Pelese baadi mulalule muela bua’shi basalayi bakile kushi lukalakashi bua kufika ku biibi bia kibundi. Pababadi bafikie kuakua, abapetele biibi bishitule! Basalayi nkutuela, abo nkukuata kibundi, nkuipaa mpa na nfumu. Akupu Siruse nkubanga kumunana bu nfumu a mu Babilone.

Mu kipua kimune, Siruse baadi muakule’shi: ‘Yehowa bandungula bua kuibakuula ntempelo aye mu Yelusalema. Oso a ku bafubi baaye akumiina kukuasha e bulungantu.’ Nka bu bibalayile Yehowa, bena Yunda bebungi babaadi balukiile ku mashibo abo kunyima kua bipua 70 na Yelusalema kubutudiibua. Siruse nkualusha makopo a ôlo na a kiamo kiebakanyi na bintu bibaadi Nabukondonosore muate mu ntempelo. We mulombene kumona bibaadi Yehowa mufube na Siruse bua kukuasha muilo Waye su?