Yesu ku bukinga buaye

Yosefe na Mariya abashaleele mu Nazarete na Yesu na bangi bana baabo balume na bakashi. Yosefe baadi alombasha nkalo ya kifuko kiaye pa kukita mufubo wa kusèe mabaaya, aye nkuibalongiesha pabitale Yehowa na Miya yaaye. Baadi ende na kifuko kiaye ku kitumbuilo nsaa yoso mu kulanguila na ku Yelusalema ku Kidiibua kia lukilo ku kipua kioso.

Yesu pabaloombeshe bipua 12, kifuko kiaaye kibayile luendo lula ku Yelusalema nka bu pa kiubishi. Lupata lubaadi luwule na bantu abaafikile ku musangeelo wa Kidibua kia lukilo. Kunyima, Yosefe na Mariya ababangile kualukiila ku nshibo na kuela binangu’shi Yesu baadi mu kisaka. P’ababatadile mui bakuabo, tababaadi bamumone nya.

Abo nkualukiila ku Yelusalema na nkukimba munda mua mafuku asatu. Ku nfudilo a bioso, abayiile mu ntempelo. Abapetele Yesu mmushaale munkatshi mua balambukishi, ebatemeesha kalolo na kuela nkonko i na muulo. Balongieshi abakaanyine pa kupusha Yesu, abo nkubanga kumuela nkonko. Abaadi bakeme bibaadi Yesu ebaluula. Abo nkushingula’shi Yesu baadi apusha Miya ya Yehowa.

Yosefe na Mariya abaadi benyongole. Mariya nkuakula’shi: ‘A muan’ande, tubakukimbi mbalo yoso! Wekeele kunyi?’ Yesu nkuakula’shi: ‘Tanuuku’shi ne na kia kuikala mu nshibo ya Nshaami?’

Yesu nkuenda na baledi baye ku Nazarete. Yosefe nkulongiesha Yesu mudimo wa mabaaya. Omono’shi Yesu baadi nsongualume a kipaso kinyi? Pabaadi ende na kukula, Yesu baadi akulu mu kinangu na kukuminyiibua kui Efile Mukulu na kui bantu.