Mueshi wa 2

Pabaadi nfumu Ezekiase na maladi e bukopo, baadi muisendeele Yehowa bua’shi amupaashe. Na Yehowa namu bamupashiishe. (2 Bf. 20:1-6) Ku lungi lupese namu, pa bakumbile Mpoolo mutumibua, ateka Yehowa bua’shi amukatushe “mulobo mu mbidi” Yehowa ta baadi mumupaashe ku luno lukalakashi nya. (2 Ko. 12:7-9) Yakobo na Mpiele, booso babidi babaadi abakiebe kuibayipa kui Mfumu Erode. Anka Yakobo babamuipayile. Mpiele namu bamupaasha kui muikeyilu. (Bik. 12:1-11) Tui kuiyipusha’shi: ‘Buakinyi Yehowa bapaashiishe Mpiele, kadi ta mupaashe Yakobo?’ Bible ta muibiakule nya. Kiatudi balombene kushinkamisha nkia’shi Yehowa “ta mukutue bululame.” (Miy. 32:4) Ingi nsaa, Yehowa mmulombene kukutua kualuula nteko yetu mu mushindo w’atukulupilanga. Pa muanda wa’shi tui bashinkamishe’shi misuusa yooso Yehowa aluulaa ku nteko yetu na kifulo na kululama, ta tui balombene kuikalakasha bua mushindo w’akumiina kualuula ku nteko yetu nya.​—Yob. 33:13. w23.11 21 ¶6

Mutumibua Yakobo baadi muyokielue bafundile’shi binangu bi kui bantu be na “bukidi bua kukookiela.” Nangushena ku ki’abipushisha. Abitungu tuikale belumbuule na kukumiina kukookiela baaba booso, babadi bape matalua a kukunkusha kui Yehowa. Biabia, Yehowa t’etutekie bua’shi tukookiele baaba abetutekie bua kupela kukookiela miya Yaye nya. (Bik. 4:18-20) Abitungu tunyiishe kukookiela Yehowa, pamutue pa kukookiela bantu. Muanda Yehowa etupeyaa misuusa yooso buludiki bupuidikie. (Mis. 19:7) Anka bantu baadi mupe matalua a kukunkusha ta mbapuidikie nya, sunga mbiabia Nshetu a muiyilu mukulupile baaba booso baadi mupe matalua, baledi, bakata ba mbulamatadi, na bakulu mu kakongie. (Nki. 6:20; 1 Te. 5:12; 1 Mp. 2:13, 14) Su tubebakookiela, atukookiela Yehowa binyibinyi. w23.10 6 ¶2-3

Mushindo umune wa kunyingisha lukumiino luetu, mpa kunangushena bi bukome bua Yehowa. E na bukome bua kulombasha kintu kioso kiadi mulee bua kukita. Yehowa mmulombene kukita bino, muanda nnaye Efile Mukulu Sha bukome booso. (Yob. 42:2; Mak. 10:27; Ef. 3:20) Baadi mushinkamiishe Abrahame na Sara’shi abakapete muana ku bununu buabo. (Kib. 17:15-17) Baadi dingi mulungule Abrahame’shi bekulu baaye, akebapa nsenga ya Kanaana. Munda a bipua bi bungi, bekulu ba Abrahame, bena Isaleele babaadi mu bupika mu Ejipitu, bibaadi abimueneka’shi uno mulayilo ta wanaalombane. Yehowa balunguile dingi Mariya mukashi kamame’shi, akatanda Muana aaye’ye nabene, bino bioso bibaadi bikitshikie, Yehowa tabaadi mupue kuibilaa munda a bipua binunu kumpala muifuba dia Edene, uno ngungi mulayilo upue kulombana! (Kib. 3:15) P’atunangushena pabitale milayilo yooso ya Yehowa, na mushindo wa kuete kuiyilombasha, atupusha kalolo’shi e na bukome bui bungi, dingi lukumiino luetu mu uno mulayilo wa nsenga ipia, alunyiisha kunyinga.​—Yos. 23:14; Yesh. 55:10, 11. w23.04 28 ¶10-12

Yehowa baluluile ku nteko ya Davide bua kumupaasha. (1 Sam. 19:10, 18-20; 2 Sam. 5:17-25) N’atue namu tui kuikala na kino kishinkamiisho. (Mis. 145:18) Yehowa ta mmulombene kualuula ku nteko yetu nka mu mushindo w’atutengielanga nya. Mpoolo mutumibua batekiele Efile Mukulu bua’shi amukatushe ‘mulobo mu mbidi.’ Mpoolo mutumibua batekiele misuusa ikile pa isatu, bikishekishe pabitale luno lukalakashi. Baadi mualuule nteko yaye su? Oolo, kadi kushi mu mushindo ubaadi Mpoolo akulupila. Pa mutue pa kukatusha lualua lukalakashi lubaadi nalo, Yehowa bamupeele bukome bubaadi nabo lukalo bua kutungunuka na kumufubila na lulamato. (2 Ko. 12:7-10, EEM) Na atue namu tui kupeta ngaluulo ku nteko yetu mu mishindo yatush’abatengielanga. Tui balombene kushinkamisha’shi Yehowa auku mushindo wi buwa wadi mulombene kuitukuasha. Yehowa mmulombene “kukita ngofu bikile biabia bioso biatutekye sungwa biatupwandjikisha.” (Ef. 3:20, Kilombeeno Kipya 2014) Ngi buakinyi lualuulo luaye ku nteko yetu, ndulombene kufika mu nsaa sunga mu mushindo watush’abatengielanga. w23.05 8-9 ¶4-6

Nsaa yooso, atukitshi kalolo p’atunangushena ku mulayilo wa mu Bible, wa lusangukilo lua mu mafuku aafiki. Buakinyi? Ku muanda t’atuukaa nsaa yatudi balombene kupeta maladi e bukopo, sunga kufuisha muntu atudi bafule mu kabasamushi. (Mul. 9:11; Yak. 4:13, 14) Lukulupilo luetu lua lusangukilo, ndulombene kuitukuasha buatudia kunyingiila ino nkalakashi. (1 Tes. 4:13) Bifundue abitushinkamiisha’shi, Nshetu e muiyilu etuuku kalolo na mmuitufule ngofu. (Luk. 12:7) Yehowa Efile Mukulu, etuuku kalolo kakile mu mushindo wa’shi aketusangula, nka na buabua bumuntu buetu bumune, na binangu bietu bimune. Yehowa mmuitufule ngofu, na mmuitupe mushindo watudia kuikala na muwa wa ikalaika, sunga tuafua aketusangula! Buakinyi tui balombene kukumiina mu mulayilo wa lusangukilo? Muanda tuibashinkamishe’shi yawa muntu muiwulee e na lukalo lui buwa na bukome, sunga ngobesha ya kuiwulombasha. w23.04 8-9 ¶2-4

Yosefe na Mariya babaadi abafubu dingi pamune bua kulama kipuano kiabo ki bukopo na Yehowa. Babaadi bapushe bi muulo wa kulanguila Yehowa pamune mu kifuko. (Luk. 2:22-24; 4:16) Kino nyi kileshesho ki buwa bukile kui beyibakishene lelo uno! Su nuekala na bana, bu bibaadi Yosefe na Mariya bi kuinuelela bukopo buanudia kutuela mu bisangilo, sunga bua kuikala na programe a kukita lulanguilo lua mu kifuko. Bi kuinuelela dingi bukopo bua kupeta nsaa ya kuibadikila sunga kukita luteko pamune mu kifuko. Biabia, tentekieshayi’shi nsaa y’anulanguila Yehowa pamune, anuifubuila peepi naaye na kuanudi anue banabene. Biabia tuulayi lulanguilo pa mbalo ya kumpala. Su muiyibakishi dienu mui bilumbu kinangu kia kukita lulanguilo lua mu kifulo pamune ki kumueneka bu kishi buwa. Su mbiabia, bangayi na kutaluula mianda mu kikoso na ilombene kusankisha. Dino etabula ndilombene kunyingisha kipuano kienu na lukalo luenu lua kukita mianda ya mu kikudi pamune. w23.05 22 ¶7-8

Uno moo wibuwa ubaadi ukuashe Obadya naminyi? Bua kintu kimune. Ubaadi umuikashe bu muntu mululame, na a kukulupilua. Biabia, nfumu bamupeele matalua adia kulama nshibo yoso ya bufumu. (Puandikisha na Neemiya 7:2.) Moo wibuwa wa Obadya ubamupeele dingi eshimba dinyingie mu mushindo wa kukaanya, eyikashi dibaadi nadio lukalo ngofu. Obadya baadi mushaale mu kipungo kia Nfumu Akabe. (1 Bf. 16:30) Na dingi Yezabele mukashi a Akabe baadi alanguila Baale. Baadi mushikue Yehowa ngofu, baadi mutompe mpaa na kuimika tubila ekumi tua bufumu bua bena Isaleele buabadia kuleka kulanguila Yehowa. Baadi mpaa na muipee batemuki be bungi b’Efile Mukulu. (1 Bf. 18:4) Nsaa ibabangile Yezabele kukuata batemuki b’Efile Mukulu na kuibayipa, Obadya batshile batemuki lukama ba kuabadi aye nkuibafia ‘amu makumi atâno, amu makumi atâno mu lubuebue. Bádi ebatumina bya kudya na mema a kutoma.’ (1 Bf. 18:13, 14, EEM) Su eshimba dinyingie dia Obadya dibadia kuukibua, mu binyibinyi badia kuipayibua. Sunga mbiabia, Obadya baadi na moo, na tabaadi akumiina kufua nya. Anka Obadya baadi mufule Yehowa na boso babaadi abamufubila, kukila bibaadi muifule aye nabene. w23.06 16 ¶9-10

Yehowa kuete kutungunuka na kukunkusha muilo waye lelo uno nka bu bibaadi mukunkushe mafuku a kala. Kuete kuibikita ku bukuashi bua Eyi diaye na Muana’ye muikale mutue wa kakongie. Tukuete kumona bishinkamisho abilesha’shi Yehowa kuete kutungunuka na kufubisha bantu abalesha mpala yaye su? Oolo. Bu kileshesho, tubande kunangushena bibaadi bikitshikie kunyima kua kipua kia 1870. Mukuetu Charles Taze Russell na benaye bababangile kushinguula’shi kipua kia 1914 akikala kipua ki na muulo ukata pabitale kutudibua kua Bufumu bu’Efile Mukulu. (Nda. 4:25, 26) Babafikile mu kuibishinguula muanda babaadi abakimbuula mu Bible na kukulupila’shi babadi na kia kumona akulombana matemuki a mu Bible. Yehowa baadi akunkusha kukimbuula kuabo kua mu Bible su? Oolo, badi ebakunkusha kalolo. Mu kipua kia 1914 mianda ibaadi ikitshikie pa nsenga ibaadi ishinkamishe’shi Bufumu bu’Efile Mukulu bubabanga kumunana. Ngoshi ya kumpala ya nsenga ishima ibabangile, ilondene na bipupa, kutshinkatshinka kua nsenga na bipupa bia nsala. (Luk. 21:10, 11) Yehowa badi mufubishe bano balongi ba Bible buabadia kukuasha muilo waye. w24.02 22 ¶11

Bu biatudi muilo wa Yehowa, atuuku’shi mmuitufule, na akumiina’shi tuikale na nshalelo e buwa. (Lom. 8:35-39) Tui bashinkamishe dingi’shi mayi a kulonda a mu Bible aetukuashaa misuusa yooso nsaa y’atuiatumikila. (Yesh. 48:17, 18) Bi kuikala naminyi su tuapeta nkalakashi yatush’abatengielanga? Nkalakashi kinyi yatudi balombene kufumankana nayo, na ino nkalakashi ngilombene kuitutakula mu kuiyela nkonko kinyi? Bu kileshesho, bena kifuko be kuituinyongosha mu ungi mushindo. Tui balombene kupeta mukumbo wi bukopo, ulombene kuitukutshishua kukita bi bungi mu mudimo wa Yehowa. Tui balombene kupeta bukitshishi bui bubi abutukila ku bintu bipangibue. Sunga’shi tui balombene kubinguabingua pa muanda wa nkumiino yeetu. Nsaa y’atupete nkalakashi i bino, tui balombene kuiyipusha’shi: ‘Buakinyi bino bibamfikila?’ Ne mukite kintu ki bubi su? Bino abilesha’shi Yehowa t’angielela miabi? Obe namu tobopushishe uno mushindo su? Su ngi biabidi, totshobolokanga. Bafubi be bungi ba Yehowa baasha lulamato, mbanyingiile ino nkalakashi i mumune, na abapushaa nabo nka biabia.​—Mis. 22:1, 2; Aba. 1:2, 3. w23.04 14 ¶1-2

P’atupete kitompuanga, abitungu musuusa umune tukatushe kinangu kioso sunga kikitshiino kilombene kuluisha kipuano kietu n’Efile Mukulu. Yehowa etutekie buatudia kuikala atukookiela “n’eshimba dimune.” (Lom. 6:17) Buludiki bua Yehowa abuikalaa kuanka misuusa yooso nka bua buwa buetu, na miiya yaye ta tui balombene kuiyishintula. (Yesh. 48:17, 18; 1 Ko. 6:9, 10) Diabulu afuishaa buluishi bua ku mbidi na bua mu binangu, na kepatshila ka’shi abofushe kitshibilo kietu kia kukookiela. Lukalo luaye ndua “kuitudia,” na kuluisha kipuano kietu na Yehowa. (1 Mp. 5:8) Bena Nkidishitu ba mu siekele a kumpala, babaadi abebakitshiina mianda bi bubi, kukupilua, kuipayibua pa muanda wa kitshibilo kiabo kia kushaala bashimate. (Bik. 5:27, 28, 40; 7:54-60) Lelo uno, Satana ki’atungunuka nka na kufubisha kuno kubinguabingua. Tukuete kumona buno buluishi, mu mushindo wa bakuete kukitshiina bakuetu balume na bakashi mianda bi bubi mu Russie, mu bingi bibundi, na mu buluishi bua pa bupenka bu’atupetaa kui beshikuanyi netu. Satana kuete afubisha “mayele e bubi” bua kuitubingabinga.​—Ef. 6:11. w23.07 15-16 ¶6-9

P’onyiisha kulonga Eyi di’Efile Mukulu, onyiisha kutamisha kifulo kiobe bua Yehowa. Kiakia kifulo akikutakula bodia kutumikila yaya mianda y’olongo. Wata bitshibilo bibuwa biimeene pa mayi a kulonda a mu Bible. Olesha’shi we na kinangu ki buwa na muikeelo wibuwa muanda okumiina kusankisha Efile Mukulu. Nka bu muana bi’ambulaa nshaye sha kifulo, ekitshishe bua kuambula Nshobe e muiyilu. (Ef. 5:1, 2) Tui kuiyipusha atue banabene’shi: ‘Kifulo kiande bua Yehowa nkinyingie ngofu binobino kukila pa naadi nkiambanga kuikala bu muina Nkidishitu su? Kasha napua kubatshishibua, mushindo wande wa kunangushena na bikitshiino biande bi bu bia Yehowa, bikishekishe mu kulesha kua bakuetu balume na bakashi kifulo su?’ Su “kifulo kiboodi nakio ku mbangilo” omona’shi kibabofula totshobolokanga. Ngi bibaadi bikitshikile mpaa na bena Nkidishitu ba mu siekele a kumpala. Yesu tabaadi muibasumbushene nya, na t’aketusumbushena namu n’atue nya. (Kbf. 2:4, 7) Yesu awuku’shi tui kualushuula kifulo kibatudi nakio pabaatudi tuki’ababanga kulonga bia binyibinyi. w23.07 8 ¶2-3

Mpiele mutumibua baadi mukite bilubilo bi bungi. Kumpala, Mpiele baadi mushinkamishe’shi akashaala na lulamato kui Yesu sunga bangi balongi bamusumbushena. (Mak. 14:27-29) Kia kabidi, Mpiele bakutshilue bukome bua kushaala mupasukie. (Mak. 14:32, 37-41) Kia kasatu, Mpiele basuukile Yesu nsaa ibafikile kisaka kia bantu be na mpete na biengie bia kaalo bua kukuata Yesu. (Mak. 14:50) Na nfudiilo a bioso, Mpiele baadi mupele misuusa isatu’shi t’auku Yesu, akita mutshipo wa madimi. (Mak. 14:66-71) Mpiele bakitshine naminyi nsaa ibaukile’shi bakitshi muluisho ukata? Baadi mutapikie kuishimba na aye nkubanga kudila. (Mak. 14:72) Pa mutue pa’shi Yesu atentekiesha Mpiele bilubilo biaye, baadi mumulungule’shi okapete matshito e bungi. (Yo. 21:15-17) Mpiele baadi muukie’shi mmukite miluisho ikata kadi tabaadi mutshobolokie nya. Buakinyi? Muanda baadi mushinkamishe’shi Nfumu aaye Yesu ta mumusumbushene. Ndilongiesha kinyi diatupete? Yehowa akumiina’shi tuikale bashinkamishe bi kifulo kiaye na lusa luaye.​—Lom. 8:38, 39. w24.03 18-19 ¶13-15

Kutambuka lusandi kui kufuishisha muntu buufu, eyimi dioshotengielanga, na kutshiba bifuko. Bua kuakula kalolo, abitungu kupela kukumiina “luitanyino” lua mukashi mulôtakane. Kukatusha kufua mu kikudi, bantu be bungi ba ntambushi a lusandi mbapete mikumbo na kufua bukidibukidi. (Nki. 7:23) Nkindji Shapitre 9, verse 18 afudiisha’shi: ‘Bapwe kukatwela kwê, mbalâle mu kalunga nyembo.’ Buakinyi dingi bantu be bungi abakumiina luitanyino luaye, alutuala ku ano masaku akata? (Nki. 9:13-18, EEM) Muteo ukata mukuete kupona bantu be bungi, nyi pornografi. Bangi abanangushena’shi, kubandila pornografi ta kui masaku. Aku namu kubandila pornografi kui bubi ngofu, apu kineemo kiabo na kia bangi. Na dingi bi bukopo kuleka kumubandila. Bifuatulo bi bubi abikalaa na bukitshishi bui bukopo na abikala bukopo bua kuibikatusha mu binangu. Na dingi pornografi ta kuashaa bantu buabadia kupua lukalo luabo lua ku mbidi nya. Anka eluikashaa bukopo ngofu. (Kol. 3:5; Yak. 1:14, 15) Mu binyibinyi bantu be bungi ababandilaa pornografi, abafudilaa nka mu kukita lusandi. w23.06 23 ¶10-11

Sunga angi mafuku ingi miilo yatuuka Anglo-Americaine bukome bua mu nsenga ishima bilumbu, yaya miilo t’ayikebupiana. Atuuku’shi ku muanda “ebwe” adilesha Bufumu bu’Efile Mukulu adikafiki bua kusoosa ngua, kipindi kia nkishi kiabadi baleshe bu kipuano kia Anglo-Americaine. (Nda. 2:34, 35, 44, 45) We mushinkamishe’shi butemuki bua Ndaniele butale gua ya kiamo n’ema mbua binyibinyi su? Su mbiabia, bino abikala na bukitshishi mu nshalelo oobe. T’okatuulu dingi binangu biobe mu kuikitshisha bua kukimba makuta e bungi, sunga bintu bi bungi bia ku mbidi, muanda owuku’shi kubashaala mafuku apeela bua kuluisha uno ndumbuluilo binobino. (Luk. 12:16-21; 1 Yo. 2:15-17) Kupusha buno butemuki, akukakukuasha dingi bodia kumona muulo wa kulungula mukandu wi buwa na kulongiesha. (Mat. 6:33; 28:18-20) Kunyima kua kulonga buno butemuki, we kuiyipusha obe nabene luno lukonko aluamba’shi: ‘Bitshibilo biande abilesha’shi ne mushinkamishe’shi Bufumu bu’Efile Mukulu abufiki binobino bua kubutula ma guvernema ooso a bana ba bantu su?’ w23.08 11 ¶13-14

Na kuiyisha kooso kumiina’shi, bipua biobe, bukome bua mbidi yobe, nshalelo oodi naye, bi kuikala na mikalo ku biokuete kukita binobino. Nka bu Barzilaayi, abitungu tupele angi mashito nsaa yatumono’shi mbidi yetu tayidi na nkalakashi. (2 Sam. 19:35, 36) Nka bu Moyise, kumiina bukuashi, ope namu bangi mashito su kui mushindo. (Efi. 18:21, 22) Kuakua kuiyisha a ku kakukuasha bua kupela kusemuna angi mashito a mianda ish’ayilombana, i bia kubofusha lubilo loobe. T’abitungu dingi tusemune bushito bua bitshibilo bi bubi biabadi baate kui bangi. Ta tui balombene kuatshila bangi bitshibilo, mbiatushi balombene nsaa yooso kui bakaluila bua bitshibilo biabo bi bubi biabadi baate. Bu kileshesho, nsongualume sunga nsonguakashi, e kuata kitshibilo kia kupela kufubila Yehowa. Kino kitshibilo ki kuinyongosha ba nambutuile ngofu. Biabia, ba nambutuile tanusashilanga bana benu bua bitshibilo biabo bi bubi bia besemuina. Nta Yehowa bakumiina’shi basemune buabua bushito bui biabia nya. w23.08 29 ¶11-12

Samesone baadi mukutue kupuidika nka bu atue, na ingi nsaa baadi aata bitshibilo bi bubi. Kitshibilo kimune ki bubi kibaadi muate kibaadi kituushe masaku e bubi. Kunyima kua Samesone kufuba bu nsushi munda a mafuku e bungi, “bafudile mwana mukashi a mwibanda dya Soleka kifulo, eshina dyê mbu Ndelila.” Kumpala, Samesone baadi akimbi bia kuibakila muana mukashi a bena Filistine, anka dino eyibakishi dibaadi “adifiki kwi Yehowa,” baadi “akimbi pa kumweshêsha bena Filistine malwa.” Kunyima, Samesone bakashaleele mu nshibo ya muana mukashi ndumba a bena Filistine a mu kibundi kia Gaza. Uno musuusa, Efile Mukulu bapeele Samesone bukome bua kutukula kiibi kia kibundi na kuikisemuna, kibundi kibashadile kushi muntu a kuikikaluila. (Bans. 14:1-4; 16:1-3) Biabia Dalila baadi nka bu muina Isaleele, eyibakishi diaye na Samesone tadibadia kupa Samesone mushindo wa kulua na bena Filistine nya. Dalila baadi mukumiine makuta e bungi a bena Filistine buadia kualulukila Samesone na kumuluishiisha. w23.09 5 ¶12-13

Kapatupatu nkalombene kuitukuasha buatudia kuikala bapopeele. Muntu sha kapatupatu aleshaa luishinko nsaa y’afumankana na nkalakashi itale nkumiino yaaye. Misuusa ibungi nsaa ayituele bantu nkonko, t’abetulungulaa kabingilo ka buakinyi abetuelaa yaya nkonko. Tulekie kukimba bia kuuka kibatakula yawa muntu bua kuela lukonko. (Nki. 16:23) Tutaleyi bibakitshine Gideone bua kualuula bana balume bena Efraime. Babamuipuishe na nsungu buakinyi ta muibetanyine bua’shi bamukuashe bua kulua ngoshi na beshikuanyi ba bena Isaleele. Babaadi namu na kabingilo ka kufiita munda su? Pangi nkuitatula? Sunga bibaabadi bakite bino, Gideone baadi munemekie mueneno aabo, na aye nkuibaluula na kupopeela. Mbipeta kinyi bibatukile? Babatudile bina ngoshi, nsungu yabo “yaituka.”​—Bans. 8:1-3. w23.09 16 ¶8-9

Yehowa na Yesu be mu kipuano ki bukopo nka bu kiakia akikalaa pankatshi pa nshe muana na muana aaye. Kushi mpaka, lubaadi lukalakashi lukata bua Yehowa pa kumona Muana aaye akiengieshibua mu kiakia kipaso. Muledi ooso mupue kufuisha muana, aukaa kenyongoshi akapushaa muntu mufuishe muana. Tui na lukumiino lui bukopo mu lusangukilo, anka nsaa ayifu muntu atudi bafule, atupushaa kenyongoshi kakata muishimba. Kino kileshesho akitukuasha bua kupusha mushindo ubaadi Yehowa muipushe, nsaa ibaadi amono Muana aaye a kifulo akiengie na kufua mu diadia efuku dia kipua kia 33, bino bipungo bietu B.B. (Mat. 3:17) Kubanga binobino mpaa na mu kipungo kia Kitentekiesho, ekitshishe bua kuilongiela ngofu pabitale nkuulo pa bupenka sunga mu lulanguilo lua mu kifuko. Efuku dia Kitentekiesho, t’olubanga kutala programe a Lulanguilo lua kunakashika a efuku dia Kitentekiesho. Nsaa y’atulumbuula eshimba dietu bua kutuela mu Kitentekiesho, atuikala na mushindo wa kukuasha namu bangi bua’shi bemutuele.​—Es. 7:10. w24.01 11 ¶10-12

Mushindo umune watudi balombene kupeta bukome abufiki kui Yehowa, mpa kuifubuila kuadi mu luteko. Yehowa p’aluula ku nteko yetu, mmulombene kuitupa “bukome bukile bua mafuku oso.” (2 Ko. 4:7) Tui kuikala dingi na bukome p’atubadika Eyi diaye na kunangushena ku bi’atubadika. (Mis. 86:11) Mukandu wa Yehowa wi mu Bible “wi na bukome” kuatudi. (Eb. 4:12) Nsaa y’otekie Yehowa na kubadika Eyi diaye, okapete bukome boodi nabo lukalo bua kunyingiila, kulama muloo oobe, na kulombasha midimo i bukopo. Tala bibaadi Yehowa mupe mutemuki Yona bukome. Baadi na moo wa kuenda mbalo ibaabadi bamutume kui Yehowa, ngi aye nkukaamina mu buato bu baadi abuende ingi mbalo. Pa muanda wa bino, aye na bantu babaadi nabo mu buato babaadi peepi na kufua pa muanda wa kipapi kikata. Nsaa ibaabadi bamuase mu meema, Yona nabene baadi muisangane mu mbalo yashafikile kashaa, munda a mushipa ukata mui mufito wi moo. Yona bakitshinyi kinyi pabaadi mu mbalo ya bupenka, na i mufito? Batekiele.​—Yon. 2:1, 2, 7. w23.10 13 ¶4-6

Mpiele baadi mufunde mikanda yaye bua bena Nkidishitu ba mu siekele a kumpala. Yehowa baadi mufundishe ino mikanda Muiyi diaye. N’atue namu ino mikanda i kuitukuasha lelo uno. (Lom. 15:4) Tui befunyishue na bantu bashii na lukumiino mu matemuki a mu Bible. Beshikuanyi netu abetusepaa atue muanda tuibakule munda a bipua bi bungi’shinfudiilo ayifiki. Bangi bantu abakula’shi nfudiilo tayanafikie. (2 Mp. 3:3, 4) Su tuapusha muntu atulungula mukandu wibuwa, muina mudimo netu, sunga muina kifuko netu akula bino, lukumiino luetu lui kubofula. Mpiele baadi mupatuule kilombene kuitukuasha. Bangi be kumona’shi Yehowa e na lotoolo lua kufuisha nfudiilo a uno ndumbuluilo e bubi. Mayi a Mpiele e kuitukuasha, muanda aetutenkiesha’shi mmueneno a Yehowa pabitale bipungo mmuilekeene ngofu na eetu. (2 Mp. 3:8, 9) Muanda bua Yehowa, bipua kinunu bi nka bu efuku dimune. Yehowa e na luishinko lukata, na t’akumiina’shi muntu su ngumune abutudibue. Apakafiki efuku diaye, uno ndumbuluilo a mianda akabutudibua. w23.09 26-27 ¶2-5

Buakinyi Mpoolo mutumibua baadi mufundile bena Nkidishitu Bena Ebelu babaadi mu Yudeya uno mukanda? Abimueneka’shi mbua tubingilo tubidi tukata. Ka kumpala, mbua kuibanyingisha. Kumpala kua’shi bafikie bena Nkidishitu, be bungi ba kuabadi babaadi mu bipuilo bia bena Yuda. Bakata babo ba bipuilo babaadi bebabepuule muanda babafiki bena Nkidishitu. Buakinyi? Muanda bena Nkidishitu ta babaadi na ntempelo e buwa a kulanguila Efile Mukulu, bilambuilo bia kukitshina milambu y’Efile Mukulu, sunga ba tshite muakuidi ba kuibakuasha. Bino bibaadi bilombene kutshiobolosha balongi ba Nkidishitu na kubofosha lukumiino luabo. (Eb. 3:12, 14) Bangi ba kuabadi babaadi abanangushena’shi balukile mu lulanguilo lua bena Yuda. Kia kabidi, Mpoolo baadi mutopekie bena Nkidishitu ba mu Ebelu bashibaadi abetatshisha bua kupusha malongiesha apia na e na muulo wi bukopo, abetanyinaa bu “biakudia bibukopo” bi’atupete Muiyi di’Efile Mukulu. (Eb. 5:11-14) Biabia, bangi ba kuabadi babatungunukile’nka na kulonda Muiya wa Moyise. w23.10 24-25 ¶3-4

Bangi bana bakashi mbaate kitshibilo kia kupela kuibakilua. (Mat. 19:10-12) Ikala mushinkamishe’shi Yehowa na Yesu tababepulaa bena Nkidishitu pa muanda wa’shi be bukupi nya. Mu nsenga ishima bakuetu be bukupi, be na bukitshishi bui buwa mu kakongie. Kifulo na kupasukila kuabo kua bangi, abitakulaa bano bakuetu bakashi bena Nkidishitu, buabadia kufika bu bakuetu bakashi ba mu kifuko, na bu bakuetu bakashi ba mu kikudi, na bu baledi ba bana be bungi ba mu kikudi. (Mak. 10:29, 30) Bangi mbekale bafubi ba nsaa yooso. Bakuetu bena Nkidishitu, bakuete kukita bi bungi mu mudimo wa kulungula mukandu wi buwa mu nsenga ishima. (Mis. 68:11) We kuata namu mpango binobino ya kutuela mu mudimo wa nsaa yooso su? We kufuba bu mbala-mashinda, kukuasha ku mudimo wa luibako, sunga ku Betele. Teka bua kepatshila koobe. Lungula bangi bapue kulombasha kaaka kepatshila, bua’shi opete mushindo odia kulombasha ngikashi itekibue. Eatshile mpango yodia kulombasha kaaka kepatshila. Kulombasha kepatshila koobe akukufunguila mishindo i bungi yodi mulombene kufuba mu mudimo wa Yehowa. w23.12 22 ¶16-17

Bu bibanyiisha kuifubuila mpombo ikata peepi, bi na muulo ukata buatudia kutentekiesha’shi abitungu tukookiele bua kukita mudimo wa mukandu wi buwa lubilolubilo. Tui kumona bu bi bukopo kutuula binangu bietu ku mudimo wa bulungudi, bikishekishe su atukiengie pa muanda wa kukutua makuta, sunga’shi atufumankana na buluishi abutukila ku mudimo wa kulungula mukandu wi buwa. Nkinyi ki bia kuitukuasha bua kutuula midimo ya Bufumu pa mbalo ya kumpala? Abitungu tushaale bakulupile’shi: “Yehowa sha biluilo” e ku lupese luetu. Etukuatshishena nka su tubatungunuka na kutuula midimo ya Bufumu pa mbalo ya kumpala mu nshalelo eetu. Biabia, ta tui na kintu su nkimune kia kutshiina. (Ang. 2:4) Akumiina’shi tutuule binangu bietu ku mudimo aupaasha miuwa wa kuikasha bantu bu balongi. Angai balunguile muilo w’Efile Mukulu buaudia kubanga mudimo wa kuibaka ntempelo dingi. Yehowa baadi muibalee’shi su babakitshi biabia, “akebelela miabi.” (Ang. 2:18, 19, EEM) N’atue namu tui balombene kushinkamisha’shi Yehowa aketuelela miabi bua kuikitshisha kuetu, su tubatuulu kukita mudimo w’abetupa pa mbalo ya kumpala. w23.11 16 ¶8; 17 ¶11

Mu mukanda waye kui Bena Loma, Mpoolo mutumibua bakuile’shi, bantu boso mbakite muluisho. Mmushindo kinyi ulombene kumueneka muntu ooso bu mululame na bu shina na matope na ku kuminyibua dingi n’Efile Mukulu? Bua kukuasha bena Nkidishitu boso be na mashimba alulame bua kualuula luno lukonko, Mpoolo baadi mufubishe kileshesho kia Abalahama. Yehowa bayitanyine Abalahama bu muntu mululame sunga bibaadi Abalahama mushaale mu nsenga ya Kanaana. Buakinyi Yehowa bayitanyine Abalahama bu muntu mululame? Mpa muanda Abalahama baadi akookiela Muiya wa Moise kalolo su? Nya ta mbiabia. (Lom. 4:13) Wawa muiya babaadi bewelele muilo wa Isalele bipua bikile pa 400, kunyima ku’Efile Mukulu kuitanyina Abalahama bu muntu mululame. Biabia nkukidila ku kinyi kubaadi Efile Mukulu muitanyine Abalahama bu muntu mululame? Nkukiila ku kalolo kaaye ngi kubaadi Yehowa muitanyine Abalahama bu muntu mululame pa muanda wa lukumiino luaye.​—Lom. 4:2-4. w23.12 3 ¶4-5

Bufuku bwa dyadya efuku, Yehowa balunguile Natane’shi, Davide ta mmulombene kungibakila ntempelo nya. (1 Mya. 17:3, 4, 11, 12, EEM) Davide bakitshiine naminyi pa bapushishe uno mukandu? Baadi mukongole makuta na bintu bibaadi abitungu bua’shi muana aaye Solomone akite wawa mudimo. (1 Mya. 29:1-5) Musuusa umune kunyima kuabo kulungula Davide’shi ta naye akebaka ntempelo, Yehowa baadi mukite naye kilombeeno. Yehowa baadi mulee Davide’shi umune a ku bekulu baaye ngi akamunana losoo. (2 Sam. 7:16) Nangushena Davide bi’akekadika na muloo mu nsenga ipia p’akauku’shi e na muwa wa ikalaika mu bipua kinunu bia kumunana bia Yesu, Nfumu atukila ku lutandua luaye! Uno muanda awitukuasha buatudia kumona’shi su ta tui bakite kintu ki’atukumiinanga kukita bua Yehowa, Efile Mukulu eetu mmulombene kuitupa bingi bintu bi buwa biatush’abatengielanga. w23.04 16 ¶8-10

We kumona’shi kui bipindi kampanda bia mu Bible, abikukankamika ngofu nsaa y’okuete kupusha moo. Bu kileshesho, we kupeta mayi aakunyingisha mu ino mikanda: Yoobo, Misambo, Nkindji, na mayi a Yesu atupete mu mukanda wa Mateo shapitre 6. Nsaa y’otekie Yehowa na kubadika Eyi diaye, opusha kunyingishibua. Tui balombene kushinkamisha’shi Yehowa aketupasukila misuusa yooso mu kipungo kiatudi mu nkalakashi. Ta tu’anekale bupenka nya. (Mis. 23:4) Yehowa etulaa bua kuitulama, kuituikasha bash’abaponeshua, kuitukuasha, na kuitunyingisha. Pabitale Yehowa, mukanda wa Yeeshaya 26:3 awamba’shi: “Okalama baaba bakukulupile ngofu, okebapa butaale buyididiile, muanda lukulupilo luabo looso mbelutuule koodi, (NWT.)” Biabia kulupila mui Yehowa, na wekitshishe bua’shi opete bukuashi buaye booso. Su bokitshi bino, okapete bukome sunga wekala mu kipungo kia nkalakashi ibukopo. w24.01 25 ¶16-17

Ano mayi ayokelue e mu Kifundue ki kunundu akuete kulombana lelo uno. Ano mayi aalondo aakankamika akuete kulombana dingi mu kino kipungo kietu, aamba’shi: ‘Bana bobe boso balume abakeekala balongi ba Yehowa, dingi abakekala mu butaale, okekala pa mbalo ya kululama dingi tokekala na moo wa kintu sunga nkimune, kutshina akwende kula noobe, t’akuisesela dimo peepi noobe.’ (Yesh. 54:13, 14) Sunga “efile a uno ndumbuluilo,” Satana ta mulombene kuimika mudimo wa muilo wa Yehowa wa bakuete kukita bua kulongiesha bangi pabitale Yehowa. (2 Ko. 4:4) Mbapue kualusha lulanguilo luiselele na dingi ta luana kitshikie bu bishabikumiina Yehowa. Ndupue kuikala kuanka bua losoo. Kilonda kioso kifushibue bua kulua netu ngoshi t’akikitshi kintu’kio! w24.02 4 ¶10

Atue bena Nkidishitu, atuataa mutshipo wetu ubatudi bakite kui Yehowa na muulo ukata. Bino bi na bukitshishi ku bitshibilo bietu na ku bikitshino bietu kui bena kifuko netu. Atukitaa muetu moso bua kulombasha nkalo ya kifuko kietu, kadi t’atutadilaa bua’shi kulombasha nkalo ya bena kifuko kietu kukile kumpala kua abitutekie Yehowa. (Mat. 10:35-36; 1 Ti. 5:8) Ingi nsaa tui kuata bitshibilo bish’abisankisha bena kifuko netu, aku namu biabia bitshibilo abisankisha Yehowa. Yehowa nyi baadi mupangie kifuko, na akumiina’shi tuikale mu kifuko kia muloo. (Ef. 3:14, 15) Su atukumiina kuikala na muloo wa binyibinyi, abitungu tukite mianda mu mushindo w’akumiina. Ikala mushinkamishe’shi Yehowa aata na muulo ukata kuitatshisha kobe bua kumulanguila, aku namu opasukila kifuko kiobe na kuibakitshina mianda na kifulo na kanemo.​—Lom. 12:10. w24.02 18 ¶11, 13