MUISAMBO WA KULONGA 52
Kuasha bangi buabadia kunyingiila bipungo bi bukopo
“Topelanga kukitshiina muntu noobe kalolo kaadi nako lukalo, su we mulombeene kwibikita.”—NKI. 3:27.
LOONO 103 Balami—mbantu bekale bya buntu
KI’ABAKUILA MUANKAa
1. Mmushindo kinyi awaluulaa Yehowa ku nteko ya bafubi baaye?
OUKU’SHI Yehowa mmulombene nkufubisha bodia kuikala bu lualuulo ku nteko ya muntu kampanda su? bino mbia binyibinyi su we muikale mukulu, mufubi a midimo, mbala-mashinda, sunga mulungudi a mukandu wi buwa mu kakongie. Bino dingi mbia binyibinyi su we muikale nsongua, muntu mununu, mukuetu mulume sunga mukuetu mukashi. Su muntu kampanda mufule Yehowa amutekie bukuashi, Efile Mukulu eetu mulombene kufubisha bakulu, sunga bangi bafubi baaye baasha lulamato be kuanka bua “kuikala bu nsulo ya kusambibua kukata” kui yawa muntu. (Kol. 4:11, NWT) Nyi kineemo kikata kia kufubila Yehowa na bakuetu mu uno mushindo! Tui kupeta mushindo wa kukuasha na kusamba bakuetu, nsaa ayituuku bipupa bia mikumbo, masaku aatukila ku bintu bipangibue, na kubinguabingua.
KUASHA BANGI BE MU BIPUPA BIA MIKUMBO
2. Buakinyi mbilombene kuikala bukopo bua kukuasha bangi nsaa y’abapete bipupa bia mikumbo?
2 Su tui mu kipupa sunga na maladi bikuituikeela bukopo buatudia kuikuashena. Bu kileshesho, tui kukumiina’shi tukatembele ba kuuku beetu, anka tuakutua mushindo wa kuibikita pa muanda wa maladi. Tui kukumiina’shi tuitanyine bakuetu be na makuta apeela buabadia kufika ku nshibo kuetu bua’shi tudie kidibua pamune, anka bino dingi tui kukutua mushindo wa kuibikita. Tui kukumiina kukuasha bangi anka biekala lukalakashi su be na kifuko neetu bakuete kukienga. Sunga mbiabia, atukumiina kukuasha bakuetu, na Yehowa kuete kusanka nsaa y’atuikitshisha mupunda ngobesha yeetu bua’shi tumone bia kuibakuasha. (Nki. 3:27; 19:17) Tui kukita kinyi?
3. Nkinyi kiatudi balombene kulongiela ku kileshesho kia bakulu ba mu kakongie ka Desi? (Yeelemiya 23:4)
3 Mianda ayitungu’shi bakulu bakite. Su we mukulu abitungu weukie mikooko kalolo. (Badika Yeelemiya 23:4.) Desi mukuetu mukashi atudi batemune mu muisambo ushaale akula’shi, “Misuusa i bungi bakulu ba mu kasaka keetu ka bulungudi babaadi abakisha nami nsaa pamune, abende nami mu bulungudi, mpaa na mu ingi midimo ya ku mbidi.”b Kuitatshisha kua bano balami ba mikooko kubaadi kuibabofuishe buabadia kukuasha Desi kunyima kua kipupa kia Corona-Virus kutuuka na pabaadi mushimishe bakuabo ba mu kifuko mu kino kipupa.
4. Bakulu babaadi na mushindo wa kukuasha Desi naminyi, na ndilongiesha kinyi diatuimupete?
4 Desi apatuula’shi, “Pa muanda naadi namono bakulu bu ba kuuku bande bibaadi bibofule buandia kuibalungula mushindo wanepusha, na mianda ayinkalakasha.” Dilongiesha bua bakulu. Balami ba mikooko, pasukilayi baaba booso be ku matalua eenu kumpala kua’shi nkalakashi i bukopo tayebafikidiile. Ikala kuuku aabo. Su kui kipupa akikukutshishua mushindo wa kutembela bantu pa bupenka, ku mashibo aabo, we kukimba ungi mushindo wa kuibakuasha bwa kuibikita. Desi amba’shi: “Ingi nsaa bakulu be bungi belekeenelekeene babaadi abangitamina sunga kuntumina mesaje mu diadia efuku dimune, bifundue bibaabadi abantumina bibaadi abinkumu kuishimba ngofu, sunga binaadi muukie ano ma verse ooso kalolo.”
5. Bakulu bekuuka mianda i nayo bakuetu balume na bakashi naminyi, na be kuibakuasha naminyi?
5 Mushindo umune odi mulombene kuuka mianda i nayo bakuenu balume na bakashi, mpa kuifubuila kuabadi na kuibela nkonko isha ibayisha milongo. (Nki. 20:5) Be na biakudia bilombane, na manga, sunga bingi bintu? Abimueneka’shi mudimo wabo aukiebe kupua sunga’shi ta be na makuta alombane akufutshila nshibo ya kushala? Be netu lukalo bua’shi tui bakuashe bua nkebatekiela bukuashi ku mbulamatadi su kui mushindo? Desi batambuile bintu bia ku mbidi bibaabadi bamukuashe nabio kui bakuabo bena Kidishitu. Kifulo kibaabadi bamuleshe kui bakulu na kunyingishibua akutuukila mu Bible kubaadi mupete, kubaadi kumukuashe ngofu nsaa ibaadi mu nkalakashi i bukopo. Akula’shi: “Bakulu babaadi beele nami luteko pamune. Sunga bianshi mulombene kutentekiesha bioso bibaabadi abakula mu luteko, kadi natentekiesha mushindo unaadi nepusha. Uno nyi mushindo ubaadi Yehowa andungula’shi ‘twe bupeenka.’”—Yesh. 41:10, 13.
Mukuetu mulume akunkusha Kitenta kia Mulami na e na muloo wa kupusha ngaluulo ainyingisha ya bakuetu be bungi be mu bisangilo, mpaa na mukuetu mulume e na maladi atuusha lualuulo kubukuashi bua vidéoconférence (Tala kikoso 6)
6. Abitungu bantu be bungi mu kakongie bakite kinyi bua kukuasha bangi? (Tala kifuatulo.)
6 Mianda ayitungu’shi bangi bakite. Atukambaa kutengiela nka’shi bakulu bapasukile bakuetu balume na bakashi mu kakongie. Anka Yehowa akumiina’shi booso buetu tunyingishe bangi na kuibakuasha. (Nga. 6:10) Sunga tuakita kantu kapeela bua kukuasha mukuetu e na maladi, mbilombene kumunyingisha ngofu. Muana mukinga e kufundila mukuetu e na maladi tu mayi atunyingisha sunga kuenda kuadi. Nsongua namu e kuenda mu kisalue munkaudila mukuetu mukashi bintu sunga kumukitshina ungi mudimo. Bangi mu kakongie mbalombene kuikala na mushindo wa kuteekiela muntu akumbu biakudia na kuenda mu nkamupa ku nshibo yaye. Nsaa yakudi kipupa kia mukumbo, muntu ooso e mu kakongie ekala na lukalo lua kunyingishibua. Pangi tui balombene kushaala kapindi kapeela kunyima kua bisangilo bua kuisamba na bakuetu balume na bakashi, mpala kua mpala, sunga ku vidéoconférences. Na bakulu namu be na lukalo na kunyingishibua. Bangi ba Tumonyi ba Yehowa mbatumine bakulu mikanda ya lutumbu, muanda abafubu ngofu bua kukuasha bakuetu balume na bakashi aku be na bi bungi bia kukita mu kipungo kia kipupa sunga maladi. Bi muloo ukata nsaa y’atuikitshisha bua ‘kwikankamisheena ku muntu na mwinaye na kwinyingisheena muntu na mwinaye’!—1 Tes. 5:11, Kilombeeno Kipya 2014.
KUASHA BANGI ABAFUMANKANA NA MASAKU AATUKILA KU BINTU BIPANGIBUE
7. Nkalakashi kinyi ilombene kumueneka kunyima kua masaku aatukila ku bintu bipangibue?
7 Masaku aatukila ku bintu bipangibue, ngalombene kuluisha nshalelo a muntu mu kapindi kapeela. Bangi bantu mbalombene kushimisha bintu biabo bia ku mbidi, mashibo aabo, sunga bantu babadi bafule. Ano masaku aatukila ku bintu bipangibue, ngalombene kufikila mpaa na bakuetu balume na bakashi. Tui kukita kinyi bua kuibakuasha?
8. Nkinyi kilombene kukita bakulu na ba mfumu ba bifuko kumpala kua’shi masaku aatukila ku bintu bipangibue amuenekie?
8 Mianda ayitungu’shi bakulu bakite. Bakulu kuashayi bakuenu buabadia kuilumbuula kumpala kua’shi, masaku aatukila ku bintu bipangibue taamuekiele. Nuikale bashinkamishe’shi bantu booso mu kakongie abauuku kiabadia kukita bua badia kupanda, na buabadia kuikala abesamba na bakulu. Margaret atudi batemune mu muisambo ushale amba’shi: “Bakulu babakitshine kipindi kia nkalo ya mu kakongie, betudimusha’shi kipungo kia kaalo akatuukaa mu mutamba takiapuile. Babakuile’shi bakata ba mbulamatadi mbalombene kutuma eyi bua’shi tukatukie, sunga’shi kui masaku, abitungu tukatukie kushi kunyengakana.” Bino bibaabadi betulungule bibaadi bifikie pa nsaa ilombane, muanda kaalo ka mutamba kabaatukile kunyima kua mbingo itano. Mu lulanguilo lua mu kifuko, ba mfumu ba bifuko mbalombene kuisamba pabitale akitungu’shi muntu ooso a mu kifuko akite. Su obe na bana boobe nui belumbuule, anukekala na butaale nsaa ayimueneka masaku aatukila ku bintu bipangibue.
9. Mmushindo kinyi ulombene kuilumbuula bakulu na kuikitshisha bua kuilumbuula kumpala na kunyima kua masaku aatukila ku bintu bipangibue?
9 Su we mukunkushi a kasaka ka bulungudi, ikala mushinkamishe’shi we na ma numero ooso a ma telefone a bantu ba mu kasaka ka bulungudi, na ma mbalo a bantu ba mu terituare eenu banulonga naabo. Na wekale mushinkamishe’shi we mukite bino kumpala kua’shi masaku aatukila ku bintu bipangibue taamuenekiele. Na ikala n’esaki diodi mufunde ano ma numero ooso, na wekale mushinkamishe’shi ma numero ooso a bantu aakidi, na dingi okekala na mushindo wa kuisamba na mulungudi ooso yawa, na kumona bi lukalo luadi naalo mu kipungo kia masaku aatukila ku bintu bipangibue. Uukisha mukunkushi a mianda ya kasaka ka bakulu yaya mianda kushi kunyengakana, aye namu alungule mukunkushi a kifunda. Su bano bakuetu booso babafubu pamune, abapete mushindo wa kukuasha bano be mulukalo kumpala kua nsaa. Kunyima kua kaalo, mukunkushi a kifunda a ba Margaret baadi mukite nsaa 36 kushii kulaala, ayitanyinanga bakulu buadia kuibapa buludiki bua’shi bamone bia kupasukila bakuetu balume na bakashi 450 babaadi balekie mashibo aabo. (2 Kod. 11:27) Biabia muntu ooso baadi na lukalo na mbalo ya kushaala babamupeele nshibo ya kushaala.
10. Buakinyi bakulu abaataa mudimo wa bu balami ba mikooko na muulo ukata? (Yowano 21:15)
10 Bakulu be na bushito bua kunyingisha bakuabo, na mianda ayitukila mu Bible, na kukuasha baaba booso be na tuinyongoshi. (1 Mp. 5:2) Nsaa yakudi masaku aatukila ku bintu bipangibue, kia kumpala abitungu bakulu bekale bashinkamishe’shi bakuetu balume na bakashi booso be na muwa, na’shi be na bidibua, bilamba, na mbalo ya kulaala. Anka mieshi i bungi kunyima kua masaku aatukila ku bintu bipangibue, baaba booso bapande mbalombene kuikala na lukalo lua bukuashi bua mu kikudi na bua mu binangu. (Badika Yowano 21:15.) Ungi mukuetu mulume afubaa mu Komite a Filiale, na mmufumankane na bakuetu be bungi balume na bakashi babaadi bapete masaku aatukila ku bintu bipangibue abetanyina bu Harold amba’shi: “Mbilombene kuata nsaa i bungi bua kulombasha ino nkalo yooso.” “Puebatembela mbalombene kubanga kuluba pabitale bakuabo babadi bashimishe, anka, p’abatentekiesha bakuabo bafue na bintu bi na muulo biabadi bashimishe, tuno tuinyongoshi ntulombene kuibalukiila dingi. Nsaa y’abatentekiesha bianka mbilombene kuibenyongosha dingi. Bino t’abilesha’shi muntu bashimisha lukumiino nya, muanda abifikilaa muntu ooso.”
11. Muenda mafuku bifuko mbilombene kuikala na lukalo lua kinyi?
11 Bakulu abakokielaa dino elango adiamba’shi, “nudile na baaba bakwete kudila.” (Lom. 12:15, Kilombeeno Kipya 2014) Abitungu bakulu, bashinkamishe’shi bano booso bapete masaku aatukila ku bintu bipangibue, Yehowa na bakuabo balume na bakashi bakiabatungunuka nka na kuibafula. Abitungu bakulu bakumiine kukuasha bifuko buabadia kulama biubishi biabo bia mu kikudi bu kuela luteko, kuibadikila, kutuela mu bisangilo, mpaa na kunyingiila mu mudimo wa kulungula mukandu wibuwa. Bakulu mbalombene dingi kukuasha baledi, bua’shi bakuashe bana baabo batuule binangu ku bintu biabashi balombene kuluisha kui masaku aatukila ku bintu bipangibue. Baledi, ikalayi anutentekiesha bana benu’shi Yehowa ekalaa efuku dioso kuuku aabo, na’shi ekalaa efuku dioso kuanka buabo. Na ebashinkamiisheyi pa kuibapatuluila’shi mbalombene kuikala mu kifuko kikata kia mu nsenga ishima kia bakuetu balume na bakashi bekuanka bua kuibakuasha nsaa yabadi mu lukalo.—1 Mp. 2:17.
We kukumiina kuipaana bua nkakuasha bangi kunyima kua masaku aatukila ku bintu bipangibue kumueneka mbalo yodi mushale su? (Tala kikoso 12)e
12. Bangi be kukita kinyi bua kuenda mu nkakuasha bantu bapete masaku aatukila ku bintu bipangibue? (Tala kifuatulo.)
12 Mianda ayitungu’shi bangi bakite. Su masaku aatukila ku bintu bipangibue akitshikila peepi na mbalo yatudi bashalele, abitungu tuipushe bakulu kiatudi balombene kukita bua kukuasha baaba bantu. Tui balombene kuibapa mbalo ya kushaala pangi bua mafuku apeela su mbafilukie baleka mashibo aabo. Sunga kukuasha baaba booso abakuasha bantu bapete masaku aatukila ku bintu bipangibue, buabadia kushaala ku nshibo yoobe nsaa yabakiabakitshi uno mudimo. We kupa balungudi be mu lukalo bidibua na bingi bintu su we na mushindo wa kuibikita. Su masaku aatukila ku bintu bipangibue abatukila kula na mbalo yodi mushale, we mulombene nka kuibakuasha. Mushindo kinyi? Pakuela luteko bua baaba booso bakuatshibue na ano masaku aatukila ku bintu bipangibue. (2 Kod. 1:8-11) We kuikala na mushindo wa kukuatshishena mudimo wetu wa kukuasha bantu bapete masaku wa mu nsenga ishima na bia buntu biobe. (2 Kod. 8:2-5) Su we na mushindo wa kuenda ku yaya mbalo itukie aa masaku bua nkakuasha, ipusha bakulu bakulungule kiodia kukita bua nkakuasha. Su babakutekie bua’shi wende bua nkakuasha abitungu bakupe bungi buludiki boodi mulombene nkafubisha ku yaya mbalo na mu nsaa yabadi na lukalo lukata.
KUASHA BAKUETU BUABADIA KUNYINGIILA KUBINGUABINGUA
13. Nkalakashi kinyi ibaadi ipete bakuetu mu ano ma mbalo abaabadi bakandikie mudimo wetu?
13 Mbalo yabadi bakandikie mudimo wetu, kubinguabingua akuikashaa nshalelo bukopo. Bakuetu be mu ano ma mbalo abekalaa na lukalakashi lua kupeta makuta, abapete mikumbo, na kufuisha bantu babadi bafule. Pa muanda wa’shi mudimo wetu mbeukandikie bakulu mbalombene kukutua mushindo wa kuenda mu nkakunka bakuetu na kuisamba na bano be na lukalo na kunyingishibua. Bino bibaadi bikitshikile Andrei atudi besambile mu muisambo ushaale. Ungi mukuetu mukashi a mu kasaka kabo ka bulungudi, baadi na lukalakashi lua kupeta makuta. Na dingi baadi mupete masaku ku mootoka. Bibaadi abitungu’shi munganga amubaale, aku namu tabaadi mulombene kufuba. Sunga bibaabadi bakandikie mudimo wetu, na bibaadi kipupa kia mukumbo, bakuetu babaadi bakite muyile ngobesha yabo buabadia kukuasha bangi na Yehowa namu baadi amono.
14. Bakulu mbalombene kuleka kileshesho ki buwa naminyi pa kukulupila mui Yehowa?
14 Mianda ayitungu’shi bakulu bakite. Andrei baadi muele luteko na aye nkukita muyile ngobesha yaye. Yehowa baadi mualuule ku luteko luaye naminyi? Yehowa batumine bangi bakuetu be bungi be na mushindo wa kutuuka ba mu kakongie bua’shi bende bakakuashe uno mukuetu mukashi. Bangi bakuetu bakashi babaadi batuale uno mukuetu ku lupitalo. Bangi babaadi batuushe makuta bua kumukuasha. Yehowa baadi muibatakule bua kukita muyile ngobesha yabo na baadi muibeelele muabi bua eshimba dinyingie na kuikitshisha kuabo. (Eb. 13:16) Bakulu, su mudimo wetu mbeukandikie, kimbayi bangi bantu banudia kutuma bua nkakuasha. (Yel. 36:5, 6) Kintu kikile bioso nkukulupila mui Yehowa. Mmulombene kuinukuasha buanudia kulombasha nkalo ya bakuetu balume na bakashi.
15. Mmushindo kinyi watudi balombene kulama buumune buetu bua buina Kidishitu nsaa y’abetubingibinga?
15 Mianda ayitungu’shi bangi bakite. Nsaa yabadi bemikie mudimo wetu, tui kupeta lukalakashi lua kuibunga pamune na bakuetu balume na bakashi mu tusaka tuetu tua bulungudi. Kintu ki na muulo ukata kiatudi balombene kukita nkulama butaale munkatashi muetu. Tulueyi na Satana, kushi kulua na bakuetu. Lekiela bilubilo bia bakuenu balume na bakashi, na su kui muanda tompayi kuiupua bukidibukidi. (Nki. 19:11; Ef. 4:26) Ata mpango ya kukuasha bangi. (Tt. 3:14) Bukuashi bubaabadi batuushe kui bangi bapa uno mukuetu mukashi baadi mu lukalo, mbutuushe bukitshishi bui buwa mu kasaka ka bulungudi. Mbekale mu buumune nka bu bena kifuko.—Mis. 133:1.
16. Mu kuipushena na Bena-Kolose 4:3, 18, mmushindo kinyi watudi balombene kukuasha bakuetu balume na bakashi ababinguabingua?
16 Binunu na binunu bia bakuetu balume na bakashi bena Kidishitu, bikuete kufubila Yehowa sunga biabadi bemikie mudimo wetu kui bena mbulamatadi. Bangi mbebeele mu nkano pa muanda wa lukumiino luabo. Tui balombene kuibatekiela, kutekiela bifuko biabo, na bano booso abatuulu muwa wabo mu masaku be na bulungantu bua kukuasha bano bakuetu balume na bakashi ku nkalo yabo ya mu kikudi, ya ku mbidi, na kuibakuila ku mbulamatadi.c (Badika Bena-Kolose 4:3, 18.) Tolubanga’shi nteko yoobe ngilombene kukuasha bano bakuetu booso balume na bakashi!—2 Tes. 3:1, 2; 1 Tim. 2:1, 2.
Mmushindo kinyi oodi mulombene kulumbuula kifuko kiobe kubanga lelo uno pabitale kubinguabingua? (Tala kikoso 17)
17. Mmushindo kinyi oodi mulombene kuilumbuula kubanga binobino pabitale kubinguabingua?
17 Obe na kifuko kiobe nui balombene kubanga kuilumbuula binobino pabitale kubinguabingua. (Bik. 14:22) Tokumanga kunangushena pabitale mianda yooso i bubi ilombene nkakitshika nya. Pa mutue pa kukita biabia, nyingisha kipuano kiobe na Yehowa, okuashe bana boobe buabadia kukita nabo biabia. Su ingi nsaa bopusha kenyongoshi funguila Yehowa eshimba diobe. (Mis. 62:7, 8) Mu kifuko esambileyi tubingilo tooso tua buakinyi nui balombene kukulupila mui Yehowa.d Nsaa i masaku aatukila ku bintu bipangibue, kuilumbuula koobe, na lukulupilo lobe mui Yehowa, abikenukuasha na bana boobe, buanudia kuikala n’eshimba dinyingie na butaale.
18. Nkinyi ki’atutengiela mu mafuku e kumpala?
18 Butaale bu’Efile Mukulu abuitukuasha bua kuipusha mu bulami. (Fid. 4:6, 7) Ku bukuashi bua butaale bu’Efile Mukulu, Yehowa kuete ataadisha eshimba dietu, sunga biatukuete kupeta bipupa bia mikumbo, masaku aatukila ku bintu bipangibue, na mu kubinguabingua kuatupete lelo uno. Kuete afubisha bakulu abafubu ngofu bu balami beetu. Na mmuitupe atue booso kineemo kia kuikuashena ku muntu na mukuabo. Mu kino kipungo kia butaale kiatudi binobino akitulumbuula bua nkalakashi i bukopo ayikafiki, sunga “mbompo ikata.” (Mat. 24:21) Mu kiakia kipungo akifiki atukeekala na lukalo lua kulama butaale buetu na kukuasha namu bangi buabadia kulama buabo. Kunyima kua ino mianda yooso, t’atukapete dingi nkalakashi i bukopo ayiketupa dingi tuiyongoshi nya. Na ku mfudiilo a bioso atukasangeela mianda i buwa y’akumiina mafuku ooso’shi tuikale nayo, kuamba’shi kupuidika na butaale bua ikalaika.—Yesh. 26:3, 4.
LOONO 109 Efuleneyi bikata mu mashimba enu
a Yehowa kuete afubisha bafubi baaye baasha lulamato buabadia kukuasha bangi be mu bipungo bi bukopo. Mmulombene nkufubisha mpa n’obe bodia kuikala bu nsulo ya kunyingisha bakuenu balume na bakashi. Biabia tutaluuleyi mushindo watudi balombene kukuasha bangi nsaa yabadi mu lukalo.
b Angi mashina mbeashitule.
c Bi bukopo bua’shi Komite a Filiale sunga baaba bakuetu booso be ku Biro bietu bikata bia nsenga ishima kuata mikanda y’abafundu kui bakuetu buabadia kuiyitumina bangi bakuetu balume na bakashi be mu nkano.
d Tala muisambo awamba’shi: “Banga kwilumbuula binobino ku kubingwabingwa” wi mu Kitenta kia Mulami kia mueshi wa 7/2019.
e BI MU BIFUATULO: Mulume na mukashi abatuadila kingi kifuko bidibua kishale mu kashibo k’epema, kunyima kua masaku aatukila ku bintu bipangibue kumueneka.