Kuasha balongi ba Bible buabadia kuata kitshibilo kia kufubila Yehowa

1-2. (a) Buakinyi bangi balongi ba Bible be kuikoka bua kuata kitshibilo kia kufubila Yehowa? (b) Nkinyi kiatutaluula mu uno muisambo?

BOODI otshinyi kuikala Kamonyi ka Yehowa su? Pangi boodi otshinyi’shi tala bena mudimo, ba kuuku na bena kifuko nobe bakutombokiela. Sunga, boodi otshinyi’shi tobesha kukookiela miiya ya Yehowa mu mianda yoso. Su bi biabia, we kupusha buakinyi bangi balongi ba Bible abekoko na abibelela bukopo bua kuata kitshibilo kia kufubila Yehowa.

² Yesu baadi auku’shi moo wi bino wi kukutshishua muntu bua kuenda kumpala mu kikudi. (Mat. 13:20-22) Sunga mbiabia ta baadi mukookie kukuasha baaba abaadi abekoko bua kumulonda. Anka, baadi muleshe balongi baye mushindo wabadia kukuasha bantu be biabia bua (1) kutundula mianda ayibakutshishua kuenda kumpala mu kikudi, (2) kunyisha kufula Yehowa, (3) kutuula Yehowa pa mbalo ya kumpala, na (4) kukambila nkalakashi yabo. Mbikunyi biatudia kutumikila bino bibaadi Yesu mulungule balongi baye p’atufubisha mukanda wa We kuikala na muloo bua loso! nsaa y’atukuasha mulongi a Bible buadia kuata kitshibilo kia kufubila Yehowa?

KUASHA MULONGI OOBE BUADIA KUTUNDULA MIANDA AYIMUKUTSHISHUA KUENDA KUMPALA MU KIKUDI

3. Buakinyi bibaadi bielele Nikodeme bukopo bua kuikala mulongi a Yesu?

³ Nikodeme, baadi mukunkushi mukata mu Yunda, baadi mupete lukalakashi lua kuikala mulongi a Yesu. Yesu baadi mupue kulungula mukandu wi buwa munda mua mieshi isamombo, na Nikodeme batunduile’shi Yesu nyi Mesiya. (Yo. 3:1, 2) Anka, Nikodeme baadi muende mukuimonena na Yesu mbufiefie, “muanda wa kutshina bena Yunda.” (Yo. 7:13; 12:42) Baadi amono’shi ashimisha bintu bi bungi su bafiki mulongi a Yesu.a

4. Mbikunyi bibaadi Yesu mukuashe Nikodeme buadia kupusha kibaadi Efile Mukulu akumiina’shi akite?

⁴ Nikodeme baadi auku Miiya ya Moyise, anka baadi na lukalo lua kupusha kibaadi Yehowa akumiina’shi akite. Mushindo kinyi ubaadi Yesu mumukuashe? Yesu baadi akumiina kuisamba na Nikodeme mpa na bufuku. Na Yesu baadi mulungule Nikodeme patooka akitungu’shi akite bua kuikala mulongi aaye: kuilanga ku miluisho, kubatshishibua mu mema, na kulesha lukumiino mui Muana a Efile Mukulu.​—Yo. 3:5, 14-21.

5. Mushindo kinyi odia kukuasha mulongi a Bible buadia kutundula mianda ayimukutshishua kuenda kumpala mu kikudi?

⁵ Sunga mulongi a Bible ekala muukie Bifundue, mulombene kuikala na lukalo lua bukuashi bua kutundula mianda ayimukutshisha kuenda kumpala mu kikudi. Mudimo sunga kubinguabingua kua bena kifuko mbilombene kumukutshisha kukumbasha bipatshila bia mu kikudi. Biabia, nka bu Yesu, ata nsaa ya kukuasha mulongi oobe. Muitamine bua kukisha naye nsaa pamune. Yaya nsaa e nkulungula muanda aumukalakasha na omona bia kumukuasha. Nyingisha mulongi oobe bua’shi ashintuule ingi mianda, kushi bua nkusankisha, kadi bua kulesha’shi mufule Yehowa.

6. Mushindo kinyi odia kukuasha mulongi a Bibile buadia kunying’eshimba bua kutumikila mianda yalongo? (1 Bena Kodinda 16:13)

⁶ Su mulongi a Bible mushinkamishe’shi Yehowa amukuasha bua kuikala na nshalelo muipushene na miiya ya mu Bible, ekala n’eshimba dinyingie dia kutumikila biabia bi’alongo. (Badika 1 Bena Kodinda 16:13.) Mudimo oobe wi’nka bu wa mulongieshi. P’otentekiesha poboodi mu kalasa, mulongieshi kinyi oboodi mukumiine? Pangi mulongieshi baadi mukukuashe bua kuuka’shi, we na ngobesha ya kukita biabia bialongiesha. Mu mushindo umune, mulongieshi e buwa a Bible t’alongieshaa penda akikumiina Efile Mukulu’shi tukite, kadi ashinkamiishaa mulongi aaye’shi ku bukuashi bua Yehowa mulombene kushintuula ingi mianda mu nshalelo aaye. We kuibikita naminyi?

KUASHA MULONGI OOBE BUADIA KUNYISHA KUFULA YEHOWA

7. Mbikunyi bibaadi Yesu mukuasha baaba abaadi abamuteemesha bua kutamisha kifulo kiabo bua Yehowa?

⁷ Yesu baadi auku’shi kifulo bu’Efile Mukulu kibaadi na kia kutakula balongi baye bua kutumikila mianda ibabaadi abalongo. Baadi akamba kulongiesha mianda ibaadi na kiakukuasha balongi baye bua kutamisha kifulo kiabo bua Nshabo e muiyilu. Bu kileshesho, baadi mupuandikishe Yehowa na muntu baadi apa bana baye bintu bi buwa. (Mat. 7:9-11) Bangi bantu abaadi abateemesha Yesu ta babaadi na nshabo muibafule. Banda kunangushena bibabaadi bapushe nsaa ibaadi Yesu mutuushe kileshesho kia nshe-bana sha lusa, baadi mukukile muana aaye baadi mukite mianda i bungi i bubi. Abaadi bamone lusa lua Yehowa bua bana baye be pa nsenga.​—Luk. 15:20-24.

8. Mushino kinyi watudia kukuasha mulongi a Bible buadia kunyisha kutamisha kifulo kiaye bua Yehowa?

⁸ Nobe namu we kukuasha mulongi a Bible buadia kunyisha kutamisha kifulo kiaye bua Yehowa pa kukamba kuakuila nyikashi yaye p’olongiesha. Nsaa yoso y’anulongo, mukuashe bua kumona bi kuipushena kui pankatshi pa bianulongo na kifulo bua Yehowa. Shimika kasele pa mushindo wayidi imutale. (Lom. 5:8; 1 Yo. 4:10) Nsaa ayipusha mulongi a Bible mushindo umufule Yehowa pabupenka abimukuasha bua kunyisha kufula Yehowa.​—Nga. 2:20.

9. Nkinyi kibaadi kikuashe Michael bua kushintula nshalelo aaye?

⁹ Tala kileshesho kia Michael, a mu Indonesie. Baadi mukule mu bia binyibinyi, anka ta baadi mubatshishibue. Pabalombeshe bipua 18, bayile mu dingi eumbo bua nkafuba bu shofere a bi miotoka bikata. Balukiile mu Indonesie bua kuibakila, akupu aye nkualuka mu diadia eumbo bua kutungunuka na kufuba kula na kifuko kiaye. Mu aa mafuku, mukashi aaye na muana aaye mukashi, ababangile kulonga Bible na abo nkuenda kumpala mu kikudi. Kunyima kua lufu lua nyinaye, Michael baatshile kitshibilo kia kualuka kuabo bua kupasukila nshaye, na aye nkukumiina kulonga Bible. Nsaa ibabadi abataluula kipindi kia “Tukimbuule boso” mu dilongiesha 27 dia mukanda wa We kuikala na muloo bua loso!, bibaadi bikume Michael kuishimba ngofu. Pabaadi anangushena ku mushindo ubaadi winyongole Yehowa pa kumona abikiengie Muana aaye, Michael babangile kudila. Baadi na lutumbu lui bungi bua nkuulo, na aye nkushintula nshalelo aaye, na nkubatshishibua.

KUASHA MULONGI OOBE BUADIA KUTUULA YEHOWA PA MBALO YA KUMPALA

10. Mushindo kinyi ubaadi Yesu mukuashe balongi baye ba kumpala bua kuuka mianda i na muulo? (Luka 5:5-11) (Tala dingi kifuatulo.)

¹⁰ Balongi ba kumpala abaadi batundule’shi Yesu nyi Mesiya bukidi bukidi, anka bibaadi abitungu’shi bapushe muulo wa kutuula mudimo wa bulungudi pa mbalo ya kumpala. Mpiele na Andele babaadi bapue kuikala balongi kumpala kua’shi Yesu ebetamina buabadia kuikala balongi baye ba nsaa yoso. (Mat. 4:18, 19) Abo na Yakobo na Yowano, abaadi balobi ba mishipa, na abimueka’shi mudimo wabo ubaadi awende kumpala. (Mak. 1:16-20) Nsaa ibaadi Mpiele na Andele ‘balekie makondia aabo,’ abaadi pangi baate mpango ya kupasukila bifuko biabo nsaa ibabadi abalondo Yesu. Nkinyi kibaadi kibakuashe bua kuuka mianda i na muulo? Muisambo wi mu Luka aulesha’shi Yesu baadi mukite kilengieleshi kibaadi kinyingishe lukulupilo luabo mu ngobesha ya Yehowa ya kulombasha nkalo yabo.​—Badika Luka 5:5-11.

11. Nkinyi kiatudia kulungula mulongi a Bible bua kunyingisha lukumiino luaye?

¹¹ Ta tui bia kukita bilengieleshi bu bibaadi bikite Yesu, anka tuikulungula balongi betu mushindo ubaadi Yehowa mukuashe baaba abaadi bamutuule pa mbalo ya kumpala mu miuwa yabo. Bu kileshesho, otentekiesha bibaadi Yehowa mukukuashe nsaa ibobangile kutuela mu bisangilo su? Pangi bibaadi abitungu’shi w’esambe na mukata oobe, na omulungule buakinyi tuekala dingi ofubu kunyima kua nsaa ya mudimo su abikukutshisha kutuela mu bisangilo. Lungula mulongi oobe a Bible binyingie lukumiino lobe nsaa yodi mumone bikuelele Yehowa miabi p’obe kuata kitshibilo kia kumutuula pa mbalo ya kumpala.

12. (a) Buakinyi abitungu tuende na balungudi belekene mu kulonga na mulongi eetu a Bible? (b) Mushindo kinyi watudia kufubisha ma video kalolo bua kukuasha mulongi a Bible bua’shi atuule Yehowa pa mbalo ya kumpala? Tusha kileshesho.

¹² Mulongi oobe a Bible e kupeta dingi bukuashi pa kupusha mushindo ubaadi bangi bena Nkidishitu batuule Yehowa pa mbalo ya kumpala. Enda na balungudi belekene mu kulonga na mulongi oobe a Bible. Ebatekie buabadia kuakula mushindo ubabaadi bafikie mu bia binyibinyi na kiabadi bakite bua kutuula mudimo wa Yehowa pa mbalo ya kumpala mu muwa wabo. Na dingi, talayi ma video biabikala a mu kipindi kia “Tukimbuule boso,” sunga kia “Taluula dingi” kia mukanda wa We kuikala na muloo bua loso! Bu kileshesho, nsaa y’anulongo dilongiesha 37, we kushimika kasele pa mayi a kulonda e mu video amba’shi Yehowa etulombesha nkalo yetu.

KUASHA MULONGI OOBE A BIBLE BUADIA KUKAMBILA NKALAKASHI

13. Mushindo kinyi ubaadi Yesu mulumbuule balongi baye bua kunyingiila kubinguabingua?

¹³ Misango i bungi, Yesu baadi mulungule balongi baye’shi abakebabingabinga, mpa na kui bena kifuko nabo. (Mat. 5:11; 10:22, 36) Kumpala kua’shi Yesu afue, baadi mudimushe balongi baye’shi, mbalombene kuibayipa pa muanda wa’shi abalanguila Yehowa (Mat. 24:9; Yo. 15:20; 16:2) Baadi muibanyingishe bua kuikala na budimu mu bulungudi. Baadi muibalungule’shi, tabekakenanga na muntu akula bi bubi pabitale mianda yabakumiina bua’shi batungunukie na kulungula mukandu wi buwa.

14. Mbikunyi biatudia kukuasha mulongi a Bible bua kuilumbuula pabitale kubinguabingua? (2 Timote 3:12)

¹⁴ Nka bu Yesu, tuibalombene kuipusha mulongi a Bible abiakula balongi naye, ba kuuku baye na bena kifuko naye muanda kuete kulonga Bible. (Badika 2 Timote 3:12.) Bangi balongi naye mbalombene kumusenga muanda taadi na nshalelo muipushene na abilongiesha Bible. Bangi bena kifuko naye t’abasanka na mianda yakuete kulonga mu Bible. Bi buwa kulungula balongi betu ba Bible pabitale kubinguabingua bukidi bukidi, kukita bino akuibakuasha buabadia kuuka bia kuakula na kukita nsaa yabebabingabinga.

15. Nkinyi ki kukuasha mulongi a Bible bua kunyingiila kubinguabingua kua bena kifuko naye?

¹⁵ Pabitale kubinguabingua mu kifuko, nyingisha mulongi oobe buadia kunangushena buakinyi bena kifuko naye be kufiita munda. Be kunangushena’shi, Tumonyi tua Yehowa tukuete kumulongiesha mianda ya madimi, na’shi mbatu be bubi. Mpa na Yesu abaadi bamuambe kui bena kifuko naye’shi bashimisha binangu. (Mak. 3:21; Yo. 7:5) Longiesha mulongi oobe buadia kuikala na luishinko na mayele p’esamba na bangi, mpa na bena kifuko naye.

16. Mushindo kinyi odia kukuasha mulongi oobe a Bible buadia kulungula bangi mianda yakuete kulonga na mayele?

¹⁶ Nsaa i muina kifuko epusha mulongi a Bible pabitale mianda yakuete kulonga, t’abibuwa bua’shi mulongi amupatuluile mianda yoso musango umune. Bisumanga, muina kifuko naye amono nka bu amukalasha, bu kipeta, e kukimba kushintula muisambo. Nyingisha mulongi oobe bua’shi amulungule mianda yakuete kulonga mu mushindo wa’shi muina kifuko naye akumiine kuisamba naye ungi musango. (Kol. 4:6) Pangi e kumulesha bia kutuela mu jw.org. Bino abikuasha bena kifuko naye bua kuuka mianda i bungi pabitale Tumonyi tua Yehowa.

17. Mbikunyi biodia kukuasha mulongi oobe buadia kualuula ku nkonko y’abelaa pabitale Tumonyi tua Yehowa? (Tala dingi kifuatulo.)

¹⁷ We kufubisha kipindi ki mu jw.org akiamba’shi “Nkonko yabakambaa kwela” bua kukuasha mulongi oobe bua’shi ekale muilumbuule bua kualuula ku nkonko yabadi balombene kumuela kui bena kifuko sunga bena mudimo naye. (2 Ti. 2:24, 25) Ku nfudiilo kua dilongiesha dioso, taluulayi kipindi akiamba’shi “Bangi abamba’shi” ki mu mukanda wa We kuikala na muloo bua loso! Nyingisha mulongi oobe buadia kutuusha lualuulo mu bishima biaye. Dingi, tuekokanga kumupa mayele aamukuasha bua kupatuula mianda yakumiina. Nsaa yokitshi bino, omukuasha bua kukaluila lukumiino luaye kushi moo.

18. Mushindo kinyi odia kukuasha mulongi oobe buadia kufika mulungudi? (Mateo 10:27)

¹⁸ Yesu baadi munyingishe balongi baye buabadia kulungula mukandu wi buwa. (Badika Mateo 10:27.) Su mulongi a Bible abanga kulungula mukandu wi buwa kushi kunyengakana, alongo bia kukulupila Yehowa bukidi bukidi. Mushindo kinyi odia kukuasha mulongi a Bible bua’shi efundila kano kepatshila? Nsaa yabaukisha’shi kui kampanye kalumbuule kakongie, nyingisha mulongi oobe buadia kunangushena ku mushindo wadi mulombene kulombasha mianda itekibue bua kuikala bu mulungudi. Mupatuluile’shi bangi balungudi mbamone’shi mbibofule kubanga kulungula mukandu wi buwa mu kipungo kia kampanye. Mulombene dingi kupeta bukuashi, su abanga kukita midimo mu bisangilo bia munkatshi mua lubingo. Nsaa yakitshi bino, alongo bia kupatuula nkumiino yaye kushi moo.

LESHA’SHI WE MUKULUPILE MULONGI OOBE

19. Mushindo kinyi ubaadi Yesu muleshe’shi mukulupile balongi baye, na tuikumuambula naminyi?

¹⁹ Kumpala kua’shi Yesu ende muiyilu, balunguile balongi baye’shi eekala dingi nabo. Ta babaadi bapushe’shi Yesu baadi akuila kuenda kuabo kua muiyilu. Sunga biabashibaadi bapushe, Yesu baadi mushinkamishe’shi balongi baye abakumiina kumulonda. (Yo. 14:1-5, 8) Baadi auku’shi, abaadi na lukalo lua mafuku bua’shi bapushe ingi mianda, bu lukulupilo lua kuenda muiyilu. (Yo. 16:12) Nka bu Yesu, tui kulesha balongi betu’shi, atuuku’shi abakumiina kusankisha Yehowa.

20. Mushindo kinyi ubaadi mukuetu mukashi a mu Malawi muleshe’shi mukulupile mulongi aaye a Bible?

²⁰ Ikala mushinkamishe’shi mulongi oobe akiebe kukita mianda i buwa. Tala kileshesho kia Chifundo, mukuetu mukashi a mu Malawi. Babangile kulonga Bible na nsonguakashi muina Katolike, abetamina bu Alinafe, pakufubisha mukanda wa We kuikala na muloo bua loso! Pababapuile kulonga dilongiesha 14, Chifundo bamuipuishe bi mueneno aaye pabitale kufubisha bifuanyi mu lulanguilo. Alinafe bafitshile munda, aluula’shi, “Kiakia nkitshibilo kiande!” Chifundo baadi amono’shi kulonga kuabo kua Bible akuimena nka paapa. Anka na luishinko loso, batungunukile na kulonga na Alinafe, mukulupile’shi kunyima kua mafuku akapusha’shi kufubisha bifuanyi kui bubi. Mieshi ipeela kunyima, Chifundo bamuipuishe lukonko lui mu dilongiesha 34 aluamba’shi: “Kulonga kobe kua Bible na kuuka Efile a binyibinyi Yehowa, kubakukuasha naminyi?” Chifundo alondo bibaadi bimualuule Alinafe, amba’shi, “Baadi mulonde mianda i bungi ibaadi mulongie, umune wa kuyanka ngua’shi, Tumonyi tua Yehowa tatukita mianda ipele Bible.” Mafuku apela kunyima, Alinafe balekiele kufubisha bifuanyi na aye nkubatshishibua.

21. Mbikunyi biatudia kukuasha mulongi eetu buadia kuata kitshibilo kia kufubila Yehowa?

²¹ Sunga biabidi’shi Yehowa nyi ‘akusha,’ tui balombene kukuasha balongi ba Bible bua kuenda kumpala mu kikudi. (1 Ko. 3:7) Tatuimenanga nka penda pa kumulongiesha akikumiina Efile Mukulu’shi akite. Atumukuasha bua kunyisha kufula Yehowa. Atumunyingisha dingi bua kulesha kifulo kiaye bua Yehowa pa kumutuula pa mbalo ya kumpala. Na atumulongiesha bia kukulupila Yehowa mu nkalakashi. Su atulesha’shi tuibakulupile mulongi eetu a Bible, atumukuasha bua kuata kitshibilo kia kufubila Yehowa.