Mateo 6:34​—“Tanwikalanga na katshim’a-munda bwa maaloba”

“Tanwikalakashanga bwa maloba, mwanda maloba aekala na yao nkalakashi. Efuku dyoso di na yadyo myanda.”​—Mateo 6:34, Traduction du monde nouveau.

“Tanwikalanga na katshim’a-munda bwa malooba: maaloba ee naa aayo nkalakasho. Efuku dyooso dii naa yaadyo mpombo.”​—Mateo 6:34, Biible Bifundwe Biiselele.

Kipatulwilo kya Mateo 6:34

Yesu, pabaadi mwakule ano mayi badi mushinkamishe bantu babaadi abamuteemesha bwa’shi tabekalakashanga bikishekishe sunga kwikala na kenyongoshi kakilekile bwa mafuku e kumpala. Anka, su bekala abasanka na nshalelo a kwifuku n’efuku abekala na muloo.

Yesu tabadi mwambe t’abitungu twikale atupwandikisha by’atukitshi maloba sunga bwa mafuku e kumpala nya. (Nkindji 21:5) Anka, etukwasha bwa’shi tatwikalanga na katshim’a-munda, sunga kenyongoshi, pabitale kilombene kukitshika maloba. Kenyongoshi ke bino nkalombene kwitukutshisha muloo sunga kukatusha binangu byetu ku mudimo watudi nao. Tatwi balombene kupudisha myanda i kumpala su tukwete kwikalakasha bwayo lelo uno nya. Na dingi byabya by’atwikalakasha ngofu misusa ibungi t’abikitshikaa nya sunga’shi t’abikalaa nka bubi muyile byatupwandikisha.

Myanda yabadi besambile mu Mateo 6:34

Ano mayi a Yesu ngamune a ku mayi abakwile mu mwisambo waye wa pa Mwengye, e mu Mateo shapitre 5-7. Mu uno mwisambo, Yesu badi mupatuule’shi kwikalakasha kukilekile ta nkulombene kulongamisha nshalelo etu nya. (Mateo 6:27) Bakwile dingi’shi tu twi batuule Efile Mukulu pa mbalo ya kumpala mu muwa wetu, tatwi na kya kwikalakasha ngofu bwa maloba nya. Efile Mukulu apasukilaa bilongo na nyema, na apasukila dingi bantu bakwete kumufubila.​—Mateo 6:25, 26, 28-33.