Mwanda wa 1

Efile Mukulu babanga kupanga

BINTU bibuwa byooso byatudi nabyo mbifikye kwi Efile Mukulu. Mukite nguba bwa kwitupa etaata mu kanya, mweshi na nyenyenyi bwa kwitumunyika bufuku. Na dingi Efile Mukulu bapangile nsenga bwashi tushaale mwanka.

Kadi Efile Mukulu tabakitshine nka penda nguba, mweshi, nyenyenyi na nsenga kumpala kwa bintu byooso nya. Ouku kibaadi mukite kumpala su? Efile Mukulu bapangile bantu be bu byadi aye nabeene. Tatwi balombeene kumona baaba bantu nya, anka bu byatushi balombeene kumona Efile Mukulu. Mu Bible baba bantu abebetanyina bu miikeyilu. Efile Mukulu bakitshine miikeyilu bwashi ishale naaye mwiyilu.

Mwikeyilu a kumpala ababapangile kwi Efile Mukulu baadi mwilekeene na ingi yooso. Baadi Mwana mbedi a Efile Mukulu na baadi mutumikye pamune na Nshaaye. Baadi mukwashe Efile Mukulu bwashi akite bingi bintu byooso. Baadi mukwashe Efile Mukulu bwashi akite nguba, mweshi, nyenyenyi na nsenga.

Nsenga ibaadi naminyi? Ku kibangilo muntu tabaadi mulombeene kushala pa nsenga nya. Nka penda mema ndjo abaadi apute nsenga ishima. Kadi Efile Mukulu baadi akumina shi bantu bashale pa nsenga. Nyi bwakinyi babangile kwitulumbulwila nsenga. Nkinyi kibakitshine?

Kya kumpala nsenga ibaadi na lukalo lwa etaata. Ndjo Efile Mukulu nkukita shi etaata dya nguba dimunyikye nsenga. Bakitshine bwashi kwikale bufuku na kanya. Akupu Efile Mukulu nkwibwesha nsenga kunundu kwa mema.

Ta kubaadi kintu su nkimune pa nsenga nya. Ibaadi nka byomono mu kino kifwatulo. Ta kubaadi bilongo sunga mitshi sunga nyema. Ta kubaadi sunga mushipa umune mu mema. Efile Mukulu baadi na mudimo ukata wa kukita bwashi nsenga ikale mbalo ibuwa bwashi nyema na bantu bemushaale.

Yeelemiya 10:12; Beena-Kolose 1:15-17; Kibangilo 1:1-10.