Kipindji kya 1

Kubanga pa kupanga mpa na ku mpeshi a kabutu

Eyilu na nsenga mbifikye kunyi? Mushindo kinyi ubaadi utukye nguba, mweshi, nyenyenyi, na bintu bibungi bi pa nsenga? Mu Bible abetwalula ku luno lukonko nsaa yabamba shi abaadi bebipangye kwi Efile Mukulu. Byabya uno mukanda wetu aubanga na myanda ayisamba Bible pabitale kupangibwa.

Bipangwa bya kumpala by’Efile Mukulu byatulongo nyi mbantu ba mu kikudi benka bu byadi aye nabeene. Baaba bantu mba miikeyilu. Kadi nsenga ibaadi ipangibwe bwa bantu bu atwe. Byabya Efile Mukulu bapangile mulume na mukashi ebaudika bu Adame na Eeva na dingi bebatudile mu lupango lwa Edene. Kadi abakutshile kukokyela Efile Mukulu abo nkushimisha matalwa a kwikala na muwa wa looso.

Kubanga kupangibwa kwa Adame mpa na ku Mpeshi mukata a kabutu kubaadi bipwa 1 656. Mu kyakya kipungo kubaadi bantu bebubi bebungi. Mwiyilu, mubaadi bantu ba mu kikudi basha bamweneka, Satana na miikeyilu yaaye ibubi. Pa nsenga, pabaadi Kaayine na bangi bantu bebungi bebubi, na bingi bilobo bibaadi bilekeene na bangi bantu booso. Kadi kubaadi dingi bantu bebuwa pa nsenga​—Abele, Henoke na Nowa. Mu kino Kipindji kya KUMPALA atukyebe kulonga bano bantu booso na myanda ibakitshikile mu aa mafuku.