Mwanda wa 7

Mulume baadi mukome eshimba

PABABANGA bantu kufiima pa nsenga, bebungi ba kwabadi abakitshine myanda ibubi bu Kaayine. Kadi kubaadi muntu umune baadi mwilekene nabo. Uno muntu abamwitanyina bu Henoke. Henoke baadi muntu shi na moo. Bantu booso abaadi pepi naaye abaadi abakitshi myanda ikile bubi, kadi Henoke baadi atungunuka na kufubila Efile Mukulu.

Ouku bwa kinyi baba bantu abaadi abakitshi myanda ibubi su? Oolo, banda kwela binangu, nanyi baadi mutakule Adame na Eeva mu kukutwa kukokyela Efile Mukulu na kudya kikuba kibebatosheshe Efile Mukulu shi tabadyanga? Nyi mwikeyilu ebubi. Mu Bible abamwitanyina bu Satana. Na kwete kukimba mushindo wa kutakula bantu booso mu kukita myanda ibubi.

Dingi efuku Yehowa Efile Mukulu balungwile Henoke shi alungule bantu mwanda wabashibaadi abakumiina kuteemesha. Bambile shi: ‘Kwi efuku adikyebe Efile Mukulu kubutula bantu booso bebubi.’ Pangi bantu abafiitshile munda ngofu pabapushishe wawa mwanda. Abimweneka shi abaadi abakimbi mushindo wa kwipaa Henoke. Nyi bwakinyi bibaadi abitungu shi Henoke ekale na eshimba di bukopo bwa kulungula bantu kibaadi akikyebe kukita Efile Mukulu bwa bantu.

Efile Mukulu tabaadi mutadiile Henoke bwashi ashaale mafuku ebungi munkatshi mwa baba bantu bebubi nya. Henoke bekeele kwanka munda mwa bipwa penda 365. Bwa kinyi atwamba shi “penda bipwa 365”? Mwanda bantu ba mu aa mafuku abaadi na bukome kukila ano mafuku na abaadi abapu bipwa bibungi. Nyi bwakinyi, Metushela mwana a Henoke baadi mupwe bipwa 969!

Byabya, kunyima kwa lufu lwa Henoke, bantu abaadi abende na kulwila. Mu Bible abamba shi ‘nguba ooso, binangu byabo bibaadi nka ku milwisho,’ na shi ‘nsenga ibaadi iule na bukitekite.’

Ouku bwakinyi kubaadi nkalakasho ibungi pa nsenga mu aa mafuku su? Mwanda Satana baadi na angi mayele a kudimba nawo bantu bwashi bakite myanda ibubi. Atukyebe kulonga byanka mu kipindji akilondo.

Kibangilo 5:21-24, 27; 6:5; Beena-Ebreeyi 11:5; Yuude 14, 15.