Mwanda wa 59
Bwakinyi Daavide basuuku?
KUNYIMA kwa Daavide kwipa Golyate, Abenere mukata a basalayi ba beena Isaleele bayile naaye kwi Saule. Saule baadi mukumiine Daavide ngofu. Bamupeele mwasu munkatshi mwa basalayi baaye aye nkumwata bwashi ashaale mu nshibo yaaye ya bufumu.
Akupu, nsaa ibalukiile kisaka kya basalayi mu ngoshi na beena Filistina, bakashi ababangile kuyimba shi: ‘Saule mwipee binunu, kadi Daavide nkwipaa nkama ya binunu.’ Bino bibapeele Saule kyutu, mwanda abapeele Daavide kineemo kukila Saule. Kadi Yonatane mwana a Saule tabaadi na kyutu nya. Baadi mufule Daavide ngofu na Daavide namu baadi mufule Yonatane. Bubidi bwabo abaadi badye bukuuku.
Daavide baadi ngomba mukata a kisaashi na Saule baadi mufule mizike ibayimbanga Daavide ngofu. Kadi dingi efuku kyutu kya Saule kibamutumine mu kukita kintu kimune kya kukanya. Pabaadi Daavide kwete kuyimba kisaashi, Saule batshile mulumbu aye nkwiwela bwa kumwasa na nkwamba shi: ‘Naabambika Daavide ku kimano!’ Kadi Daavide nkwepaa, mulumbu nkumutupilwa. Saule baadi mutupilwe dingi Daavide na mulumbu waaye. Byabya Daavide bamwene shi abitungu ekale mudimukye.
Otentekyesha kintu kibaadi Saule mulee su? Baadi mulee shi akyebe kupa mwana aaye mukashi bwashi ekale mukashi a muntu ayipaa Golyate. Kunyima Saule balungwile Daavide shi akyebe kumupa Mikale, kadi abitungu ayipee beena Filistina 100. Banda kutala wawa mwanda! Saule baadi mukulupile shi beena Filistina abakyebe kwipaa Daavide. Kadi tambamwipee nya, byabya Saule nkupa Daavide mwanaaye mukashi bwashi ekale mukashi aaye.
Dingi efuku Saule balungula Yonatane na bafubi baaye booso shi akyebe kwipaa Daavide. Kadi Yonatane nkulungula nshaaye shi: ‘Tolwishishanga Daavide mwanda ta mukulwishishe nya. Dingi myanda yooso yadi mukite ibaadi bwa buwa boobe. Bakuminyine kupana muwa waye bwa kwipaa mwina Filistina, na pobomwene byabya, boodi musangale.’
Saule bateemeshe bibakwile mwana aaye mulume, aye nkumulaa shi talwishisha Daavide nya. Abaadi balushe Daavide, aye nkubanga dimo kufubila Saule mu nshibo yaaye bu bibaadi akitshi kumpala. Dingi efuku, pabaadi kwete kuyimba mizike ku kisaashi kyaaye, Saule belele dingi Daavide mulumbu. Daavide bewepele na mulumbu ubekupiile ku kimano. Uno mmususa wa kasatu! Binobino Daavide bawuku shi abitungu asuukye!
Bwabwa bufuku Daavide bayile ku nshibo yaaye. Kadi Saule batumine bantu bwashi bende mu kumwipaa. Mikale bawukile shi nshaaye e na lukalo lwa kwipaa Daavide. Byabya aye nkulungula mulume aaye shi: ‘Su twe musuukye buno bufuku, pa kwamba shi butookye abakwipaa.’ Nka bwabwa bufuku Mikale batushile Daavide kwididishi bwashi asuukye. Daavide baadi ende na kusuuka mu ma mbalo elekeene munda mwa bipwa musambobidi, Saule tabaadi dingi na mushindo wa kumumona nya.