Mwanda wa 61

Daavide bafiki nfumu

SAULE atompo dingi mushindo wa kukwata Daavide. Baata basalayi baaye 3 000 bwa kumulonda. Daavide pabapusha bino, batumu bantu bwa nkatala mbalo ilale Saule na bantu baaye bufuku. Akupu Daavide bayipusha bantu baaye babidi shi: ‘Nnaanyi akyebe kwenda naami mpa na kwi Saule mu mbalo yaadi mushaale?’

Abishao baluula shi: ‘Ami, nende noobe.’ Abishao nyi mwana a Zeruya nkasha naaye na Daavide. Nsaa i Saule na basalayi baaye mbalale, Daavide na Abishao abende lubilo mu bufyebufye pa mbalo yabadi balaale. Abaata mulumbu na kasupa ka mema ka Saule, kabadi batuule pepi na mutwe wa Saule. Takwi muntu su ngumune bebamono sunga kwibapusha mwanda booso be mu tulo twi bukopo.

Talanga binobino Daavide na Abishao. Abaapu kwenda kwibula na abo be mu bulungantu kunundu kwa mwengye. Daavide beele musase kwi mukata a basalayi ba beena Isaleele shi: ‘Abenere, bwakinyi twe mulame mulopwe nfumu oobe? Tala binobino! Mulumbu na kasupa kaaye ka mema bikunyi?’

Saule babuuku. Batundula eyi dya Daavide na bepusha shi: ‘Dyady’eyi ndyoobe nyi mwana ande Daavide?’ Okwete kumona Saule na Abenere kuno kuushi su?

Daavide balulwile Saule shi: ‘Eyi ndyande mwanana nfumwami.’ Na Daavide bayipusha shi: ‘Bwakinyi okwete kwibingena naami bwa ku nkwata? Mbubi kinyi bwandi mukite? Tala mulumbu oobe mwanana. Umune a ku bafubi boobe afikye ewate.’

Saule bambile shi: ‘Nee mulwishe. Nemukite bu sha moombe.’ Paapa Daavide bende dyaaye eshinda, Saule naamu balukila ku nshibo. Kadi Daavide bakula munda mwaye shi: ‘Efuku kampanda Saule akyebe kungipaa. Abitungu nsuukile kwiumbo dya beena Filistina.’ Daavide basuukila kwakwa. Na e na mushindo wa kudimba beena Filistina na kwibakuminyisha shi binobino e ku lupese lwabo.

Kunyima kwa mafuku apela beena Filistina abende mu kulwa ngoshi na beena Isaleele. Ku yaaya ngoshi, Saule na Yonatane abaafu. Bino bibenyongosha Daavide ngofu, ndjo bafundu loono lwibuwa, mu lwalwa loono bayimbi bino shi: ‘Mpombo kinyi yandi nayo boobe Yonatane mukwetu. Naadi mukufule bi kasha!’

Kunyima kwa bino byooso Daavide balukila kwi beena Isaleele mu lupata lwa Hebrone. Kwakwa kubatuuku ngoshi munkatshi mwa bantu abaasangula Ishiboshete mwana a Saule bu nfumu na bano abakumiina shi Daavide ekale nfumu. Kadi ku nfudiilo bantu ba Daavide abatshokola ngoshi. Nsaa yabatuulu Daavide ku bufumu e na bipwa 30. Bamunu mu Hebrone munda mwa bipwa musambobidi. Mashina a bangi baana babatandile ngano: Amenone, Absalome na Adonyase.

Nsaa ibalombana yashi Daavide na bantu baaye bende mu kukwata eumbo dibuwa dya Yeelusaleme. Yoabe mwana a Seruya ungi nkashy’a naaye na Daavide bakidi kumpala bwa kukunkusha ngoshi. Paapa Daavide baapa Yoabe bwedi paaye kumutuula bu mukata a basalayi baaye. Binobino Daavide babanga kukunkusha mu Yeelusaleme.

1 Samwele 26:1-25; 27:1-7; 31:1-6; 2 Samwele 1:26; 3:1-21; 5:1-10; 1 Myanda 11:1-9.