Mwanda wa 69
Kansongwakashi kabakwasha mulume sha bukome
OUKU kikwete kwakula kano kasongwakashi? Kakwete kulungula uno mukashi pabitale Elisha, mutemuki a Yehowa, na myanda ibuwa yakwete kukita ku bukwashi bwa Yehowa. Uno mukashi tauku Yehowa mwanda ta mwina Isaleele nya. Tubande kutala, binobino bwakinyi kano kansongwakashi ke mu nshibo ya uno mukashi.
Uno mukashi nyi mwina Sirii. Mulume aaye nyi Naamane, mukata a basalayi ba beena Sirii. Beena Sirii abaadi bakwate kano kansongwakashi ka mu Isaleele, abo nkwikatwadila mukashi a Naamane bwashi kekale keena mudimo.
Naamane baadi na maladi ebubi abetanyinaa bu nsudi. Ano maladi ngakumbeene kutshiba bingi bipindji bya mbidi ya muntu. Byabya kano kansongwakashi kakwete kulungula mukashi a Naamane shi: ‘Su nfumwami mulume badya kwenda kwi mutemuki a Yehowa mu Isaleele, aye mukumbeene kumupaasha ku nsudi yaaye.’ Akupu mukashi balungwile mulume aaye wawa mwanda.
Naamane e na lukalo lukata lwa kupanda; byabya baata kitshibilo kya kwenda mu Isaleele. Pabafikile mu Isaleele, bayile ku nshibo ya Elisha. Elisha batumine mufubi aaye bwashi akalungule Naamane shi ende mu kwiyina mu Mwela wa Yoordano misango musambobidi. Pabapushile byabya, Naamane bafitshile munda ngofu aye nkwamba shi: ‘Myela ya kwetu tangikile myela yooso ya mu Isaleele su?’ Akupu, Namaane balukile.
Kadi ungi mufubi aaye bamulungwile shi: ‘Nfumwami, su Elisha badya nkulungula bwa kukita kintu kikile bukopo, tobodya kwikita nyi? Binobino bwakinyi twe mukumbeene kwitumpa bu bibakulungula?’ Naamane bapushishe mufubi aaye na bayiile mu kwiyina mu Mwela wa Yoordano misusa musambobidi. Pabeyinyine, mbidi yaaye ibalongamine nka bu ya mwana mukinga!
Naamane basangala ngofu. Baluka kwi Elisha na bamulungula shi: ‘Binobino nauku shi takwi Efile Mukulu pa nsenga ishima kukasha penda mu Isaleele. Byabya, nakusendeela okumiine bwedi bwankupa.’ Kadi Elisha baluula shi: ‘Nya, ntantambula kintu su nkimune.’ Elisha baadi muukye shi bibubi kwata bwedi mwanda Yehowa nyi baadi mubukye Naamane. Kadi Gekazi, mufubi a Elisha, baadi na lukalo lwa kwata bwabwa bwedi.
Byabya nyi bibakitshine Gekazi. Kunyima kwa Naamane kwenda, Gekazi bamulondele lubilo bwa kumubanga. Aye nkumulungula shi: ‘Elisha bantumu bwa nkulungula shi e na lukalo na bingi bintu bya ku bwedi boobe bwa kupa benaye abafiki kwadi.’ Byabya byooso bibaadi bya madimi. Kadi Naamane tabaadi auku shi Gekazi badimbile nya; byabya aye nkumupa bingi bintu.
Pabalukile Gekazi ku nshibo, Elisha baadi muukye byooso bibaadi mukite. Yehowa baadi mumulungule byanka. Ndjo aye nkwamba shi: ‘Bu bibokitshi kino kintu kibubi, nsudi ya Naamane ayikyebe nkukwata.’ Ayo nkumukwata musango umune!
Uno mwanda ngukumbeene kwitulongyesha kinyi? Kya kumpala, abitungu twikale bu kano kansongwakashi pa kulungula bantu pabitale Yehowa. Mbikumbeene kwibakwasha ngofu. Kya kabidi, tabitungu shi twikale na kwitatula bu bibaadi Naamane kumpala nya, kadi abitungu tukokyele bafubi b’Efile Mukulu. Kya kasatu, tabitungu kudimba bu bibadimbile Gekazi nya. Tomono shi su atubadika Bible twi balombeene kulonga myanda ibungi su?