Mukata a basalayi na ka nsonguakashi

Kubaadi kangi ka nsonguakashi mu kibundi kia Siri, kabaadi kula na kuabo. Abaadi bekakatushe mu kifuko kiabo kui basalayi ba mu Siri, ako nkufika bu kena mudimo ka mukashi a mukata a basalayi abetanyina bu Namane. Kano ka nsonguakashi kabaadi akalanguila Yehowa, sunga biekala’shi bangi bantu beekefuunyishe tababaadi abamulanguila.

Namane baadi mukumbe maladi a nsudi abaadi aamukiengiesha bikata. Kano ka nsonguakashi kabaadi akakimbi kumukuasha. Kabalunguile mukashi a Namane’shi: ‘Nauku muntu e kuikasha mulume obe bibuwa. Mu Isalele mui mutemuki a Yehowa e n’eshina bu Elisha. Mulombene kubuka mulum’oobe.’

Mukashi nkulungula mulum’aye. Bu bibaadi akumiina kukita kioso kiabamulungula bua kupanda, Namane bayile kui Elisha mu Isalele. Namane nkukulupila’shi Elisha amutambula bu muntu mukata. Kadi, pamutue wa kuisamba naye, Elisha batumine mufubi aaye bua kuimuna Namane na kumulungula’shi: ‘Enda okeyele misango musambo mu Muela wa Yordane. Akupu opashiibua.’

Tabibaadi bisangashe Namane nya. Bambile‘shi: ‘Namonanga’shi mutemuki ampaasha pa kuitanyina Efile Mukulu aaye na kukisha eyasa pe mukumbo. Binobino andungula bua kuenda ku muela wa mu Isalele. Aku namu tui na miela ibuwa mu Siri. Buakinyi ntshi nadia kuenda kuakua?’ Namane nkukuata nsungu, aye nkukatuka ku nshibo ya Elisha.

Bafubi ba Namane nkumukuasha buadia kunangushena. Abo nkumulungula’shi: ‘Su abaadia nkulungula bua kukita kintu kikile bukopo, tobodia kuikikita? Kadi bibakulungula ta bi bukopo nya. Buakinyi tue mulombene kuibikita?’ Namane nkuibapushiisha. Aye nkuenda mu kuiyina misango musambo mu Muela wa Yordane. Kunyima kuaye kuiyina misango musambo, batundubukile mu mema kushi mukumbo. Baadi na lutumbu lukata, aye nkualuka kua Elisha mu nkamutumbula. Namane nkuakula’shi: ‘Binobino nauku’shi nkapenda Yehowa, nyi Efile Mukulu a binyibinyi.’ Omono’shi ka nsonguakashi kabapushiishe naminyi pabaadi Namane mualukiile kushi mukumbo?