Mwanda wa 74

Mulume umune shibaadi na moo

TALA bantu bakwete kusenga uno nsongwalume. Ouku eshina dyaye? Eshina dyaye nyi Yeelemiya. Nyi mutemuki mukata a Efile Mukulu.

Kunyima kwa Nfumu Yosyase kubanga kukaasha ma nkishi mwiumbo, Yehowa balungwile Yeelemiya bwashi ekale mutemuki Aye. Kadi, Yeelemiya bapwandikiishe shi kii mukile bukinga bwa kwikala mutemuki. Sunga mbyabya Yehowa bamulungula shi akyebe kumukwasha.

Yeelemiya balungula beena Isaleele bwa kuleka kukita myanda ibubi. Bamba shi: ‘B’efile babalangwila kwi ingi miilo mba madimi.’ Kadi beena Isaleele bebungi abakumina kulangwila ma nkishi pamutwe pa kulangwila Yehowa, Efile a binyibinyi. Yeelemiya pabalungwile mwilo shi Efile Mukulu akyebe kwibanyoka mwanda wa bubi bwabo, abaadi abamusepe.

Bipwa bibungi bibakidile. Yosyase nkufwa, na kunyima kwa myeshi isatu mwana aye mulume Yoyakime bafikile nfumu. Yeelemiya batungunukile na kulungula mwilo shi: ‘Su tanwibashintuule nshalelo enu, Yeelusaleme akyebe kubutudibwa.’ Batshiite-mwakwidi abakwatshile Yeelemiya abo nkwela misase shi: ‘Bopu kwikimbila lufu pa kwakula yaaya myanda.’ Ndjo abo nkulungula bakata ba mwilo shi: ‘Abitungu kwipa Yeelemiya, mwanda mutemukile lupata lwetu myanda ibubi.’

Binobino Yeelemiya akyebe kukita kinyi? Takwete kutshina nya! Bebalungula shi: ‘Yehowa bantumu bwa kwinulungula ino myanda. Su tanwi bashintuule nshalelo enu ebubi, Yehowa akyebe kubutula Yeelusaleme. Kadi uukayi kalolo shi: Su nwangipa, anwipa muntu shi mukite mwanda wibubi.’

Bakata ba mwilo abalekyele Yeelemiya na muwa, kadi beena Isaleele tababaadi bashintuule nshalelo abo nya. Kunyima kwa byabya Nabukodonosore, nfumu a mu Babilone, bafikile mu kulwa na Yeelusaleme. Akupu Nabukodonosore bekeshe beena Isaleele bu bafubi baye. Batwadile bebungi ba kwabadi mu Babilone. Banda kwela binangu byodi mukumbeene kupusha su mwilo wa bantu ba dingi eumbo benukaasha mwiumbo dyenu na kwinutwala mu dingi eumbo!

Yeelemiya 1:1-8; 10:1-5; 26:1-16; 2 Banfumu 24:1-17.