Mwanda wa 114
Nfudiilo a myanda yooso ibubi
NKINYI kyokwete kumona pano? Mbeena ngoshi bashaale pa mpunda itooka. Kadi tala mbalo yabakwete kutuuka. Mpunda ikwete kusuuka lubilo ayituuku mu makumbi mwiyilu! Ino nyi mpunda ya binyibinyi su?
Nya, ino ta mpunda ya binyibinyi. Atwakula bino mwanda mpunda tangilombeene kutambuka mu makumbi nya, ta nabyo su? Kadi mu Bible abakula pabitale mpunda mwiyilu. Ouku shi mbwakinyi?
Mwanda, mafuku a kala babaadi abende na mpunda mu kulwa ngoshi. Byabya mu Bible abakula pabitale bantu bakamine pa mpunda bakwete kufika mwiyilu bwa kulesha shi Efile Mukulu alu ngoshi na bantu be pa nsenga. Ouku byabetamina mbalo yabalwila yaaya ngoshi ? Abeyitamina bu Armagedone. Yaaya ngoshi i kwanka bwa kukaasha bubi booso bwi pa nsenga.
Yesu, Aye ndjo akyebe kukunkusha yaaya ngoshi ku Armagedone. Tentekyesha shi, Yesu nnaye abadi basangule kwi Yehowa bwashi ekale nfumu a guvernema Aye. Nyi bwakinyi Yesu mmufwale kifulu kya bufumu. Na lupete lwadi nalo alulesha shi akyebe kwipaa beshikwanyi booso b’Efile Mukulu. Twi balombeene kukanya shi Efile Mukulu akyebe kubutula bantu bebubi booso be pa nsenga su?
Banda kutala mwisaki aditulondela Mwanda wa 10. Nkinyi kyabetulondela mwanka? Abakula pabitale Mpeshi a kabutu bayipayile bantu bebubi. Nnanyi baadi munokyeshe yawa Mpeshi a kabutu? Nyi Yehowa Efile Mukulu. Binobino tala esaki aditulondela Mwanda wa 15. Nkinyi kikwete kukitshika panka? Bakwete kubutula Sodome na Gomore kwi kaalo kababadi batume kwi Yehowa.
Buula esaki aditulondela Mwanda wa 33. Tala kikwete kukitshikila mpunda na matempu a ngoshi a beena Ejiipitu. Nnanyi baadi mutume mema bwashi afikye mu kwibapulukila? Nyi Yehowa. Bakitshine byabya bwa kukalwila mwilo waaye. Tala esaki aditulondela Mwanda wa 76. Mu dyadya esaki okyebe kumona mushindo ubaadi Yehowa mutadiile bwashi mwilo waaye, beena Isaleele, ubutudibwe pa mwanda wa bubi bwawo.
Byabya, dingi, tabitungu tukanye patupusha shi Yehowa akyebe kutuma beena ngoshi baaye be mwiyilu bwa kupudisha bubi booso bwi pa nsenga. Kadi banda kunangushena pabitale mushindo wabikakitshika! Tutale mwisaki adilondo.