Efubwile pepi n’Efile Mukulu mu luteko

1, 2. Bwakinyi twi balombeene kumona luteko bu kinemo kikata kyatudi nakyo, na bwakinyi abitungu kuuka abilongyesha Bible pabitale uno mwanda?

PATUPWANDIKISHA nsenga na nyenyenyi ibungi, atumono shi nsenga ngikile bupeela ngofu. Byabya, ku meso kwa Yehowa, ‘Mupangi a eyilu na nsenga’ bisamba bya bantu bi nka bu ekopola dya mema adipono ku mbeketshi. (Misambo 115:15; Yeeshaya 40:15) Bible akula dingi shi: “Yehowa ee peepi na booso abamwididi, bano booso abamwididi mu biinyibiinyi. Akumbasha akikyebe abamutshiinyi, ateemesha misaase yaabo.” (Misambo 145:18, 19) Banda kwela binangu! Mupangi sha-bukome booso e pepi n’etu bwa kwituteemesha su ‘atumwididi mu biinyibiinyi.’ Twi na kinemo ki kata kya kwifubwila pepi n’Efile Mukulu mu luteko!

² Su atukumina shi Yehowa ateemeshe nteko y’etu, byabya, abitungu shi tweele nteko kwadi mu kipaso kyakumina. Tomono’shi twi bakumbeene kupusha bino byooso nka su, tubashinkamisha abilongyesha Bible pabitale luteko su? Bii na muulo bwashi tuukye akilongyesha Bifundwe pabitale luteko, mwanda nteko ayitukwasha bwa kwifubwila pepi na Yehowa.

BWAKINYI ABITUNGU KWELA NTEKO KWI YEHOWA?

3. Bwakinyi abitungu twele nteko yetu penda kwi Yehowa?

³ Kintu kya kumpala akilesha bwakinyi abitungu twele nteko kwi Yehowa, mwanda aye etutekye bwashi tukite byabya. Eyi dyaaye aditunyingisha bino shi: “Tanwikalanga mashimba kwiyilu pa kintu su nkimune, anka, nguba ooso, mu nteko, mu kwiyaaya na mu ntumbu, uukishaayi Efile Mukulu nkalo yeenu. Na butaale bw’Efile Mukulu, abo butabukile binangu byooso abulama mashimba eenu na binangu byeenu munda mwa Yesu Kidishitu.” (Beena-Fidipe 4:6, 7) Eyendo tatwi balombeene kulenguula yaaya mpango ikata yabadi betwatshile kwi Nfumu mukata a eyilu na nsenga.

4. Kwela kwa nteko kwi Yehowa efuku dyooso akunyingisha kipwano kyetu naaye naminyi?

⁴ Kingi kintu akitutakula mu kwela nteko kwi Yehowa efuku dyooso nyi mwanda kwela kwa nteko akunyingisha kipwano kyetu naaye. Bakuuku ba binyibinyi tabesambaa nka penda nsaa yabadi na lukalo lwa kupeta kintu kampanda nya. Bakuuku ba binyibinyi abetalenaa munkatshi mwabo, na kipwano kyabo akinyingi ngofu nsaa yabakwete kwilungushena myanda yabadi nayo mu binangu, ayibakalakasha, na yabadi nayo mu mashimba. Ingi nsaa, uno nshalelo emumune na kipwano kyatudi nakyo na Yehowa Efile Mukulu. Ku bukwashi bwa uno mukanda, we mulongye bibungi pabitale abilongyesha Bible pabitale Yehowa, bumuntu bwaye, na mpango yaaye. Binobino toodi omumono nka bu muntu a binyibinyi. Luteko alukupa mushindo odya kulungula Nshoobe e mwiyilu bi binangu byoobe na myanda yopusha mwishimba dyoobe. Su bokitshi byabya, wefubwila pepi na Yehowa.​—Jaake 4:8.

MYANDA KINYI AYITUTUNGU KULOMBASHA?

5. Nkinyi akilesha shi Yehowa tateemeshaa nteko yooso?

⁵ Yehowa ateemeshaa nteko yooso su? Banda kutala bibaadi mulungule beena Isaleele abaadi bamutombokyele mu mafuku a mutemuki Yeeshaya shi: “Panuwola maasa, neeshikiila ku meeso; nwi balombeene kufiimisha nteko yeenu, ntaneeyiteemesha’mi, maasa eenu ngapatakane mase.” (Yeeshaya 1:15) Byabya, Efile Mukulu mukumbeene kupela kuteemesha nteko y’eetu pa mwanda wa bikitshino kampanda. Bwashi Efile Mukulu ateemeshe nteko y’eetu kalolo, abitungu tulombashe myanda kampanda.

6. Nkintu kinyi kii na muulo akitungu kukita bwashi Efile Mukulu ateemeshe nteko yetu, na mushindo kinyi watudi balombeene kwikilombasha?

⁶ Kintu kya kumpala kii na muulo ukata nyi nkulesha lukumiino. (Badika Maako 11:24.) Mpoolo mutumibwa bafundjile shi: “Byabya ta kwi muntu a kusangasha Efile Mukulu su te na lukumiino ooo. Binyibinyi, yaawa eefubwila kwi Efile Mukulu abikyebe akumiine’shi Efile Mukulu e kwanka, afutaa baaba abamukimbi.” (Beena-Ebreeyi 11:6, Kilombeno kipya) Kwikala na lukumiino ta kwi nkapenda kukumina’shi Efile Mukulu e kwanka na shi ateemeshaa na kwaluula ku nteko nya. Lukumiino alumwenekyelaa ku bikitshino byetu. Twi balombeene kulesha patooka shi twi na lukumiino muyiile byatukitshi mu nshalelo eetu a mafuku ooso.​—Jaake 2:26.

7. (a) Bwakinyi abitungu shi twikale na kanemo nsaa yatwisamba na Yehowa? (b) Nsaa yatwele nteko kwi Efile Mukulu, mushindo kinyi watudi balombeene kulesha’shi twi beyishe na atwakula myanda yooso i mu mashimba eetu?

⁷ Yehowa dingi atekye booso abefubwila kwadi mu luteko bwashi bamutekye na bishima abilesha kwiyisha na mashimba aabo ooso. Kwi kintu kampanda akitutakula mu kwikala beyishe nsaa yatwisamba na Yehowa su? Bantu bebungi nsaa yabadi na lukalo lwa kwisamba na nfumu sunga prezida, abesambaa na kanemo kooso, abashinguula shi nfumu e kunundu kwabo. Twi balombeene kwikala na kanemo kakata nsaa yatwifubwila pepi na Yehowa. (Misambo 138:6) Anka, aye ndjo “Efile Mukulu Sha-bukome booso.” (Kibangilo 17:1, NWT) Nsaa yatwele nteko kwi Efile Mukulu, mushindo watumutekye abitungu uleshe shi twibeyishe na atuuku mbalo yatudi nayo ku meso kwaye. Kwakwa kwiyisha akwitukwasha bwashi patwele nteko twakule byooso bi mu mashimba eetu, kushi kwambuula myanda imune imune mu nteko yetu.​—Mateo 6:7, 8.

8. Mushindo kinyi watudi balombeene kukita myanda ipusheene na byatutekye?

⁸ Kingi kintu akitungu kukita bwashi Efile Mukulu ateemeshe nteko y’eetu nyi nkukita myanda muyiile nteko y’eetu. Yehowa etutekye bwashi tukite mwetu mooso bwashi tukite myanda muyiile luteko lwetu. Bu kileshesho, su atutekye shi “etupe leelo kya-kudya kyatudi nakyo lukalo,” abitungu twitatshishe bwa kulombasha mudimo ooso watudi balombeene kukita. (Mateo 6:11; 2 Beena-Tesalonika 3:10) Su atusambila bwa kupeta bukwashi bwa kupudisha lukalakasho kampanda lwa ku mbidi, abitungu twikale badimukile myanda yooso ilombeene kwitutwesha mu kutompibwa. (Beena-Kolose 3:5) Kukaasha ku ino myanda ikata ayitungu kulombasha, kwi nkonko ibungi ayitungu kwaluula.

KWALUULA KWA INGI NKONKO ITALE LUTEKO

9. Abitungu twele nteko kwi nanyi, na kukidila kwi nanyi?

⁹ Nnanyi atudi balombeene kuteka? Yesu balongyeshe balondji baaye bwashi beele nteko kwi “Yaay’etu ee mwiyilu.” (Mateo 6:9) Byabya, abitungu shi nteko yetu twiyeele penda kwi Yehowa Efile Mukulu. Anka, Yehowa etutekye’shi tushinguule mbalo inayo Mwan’aaye eeleka, Yesu Kidishitu. Anka bu byatwikalanga balongye mu Shapitre 5, Yesu bafikile pa nsenga bwa kwikala bu mulambu wa kwitukuula ku lufu na milwisho. (Yowano 3:16; Beena-Looma 5:12) Aye ndjo abadi batuule bu Tshiite-mwakwidi Mukata na bu Nsushi. (Yowano 5:22; Beena-Ebreeyi 6:20) Byabya, Bifundwe abitulungula bwashi twele nteko yetu mwishina dya Yesu. Aye nabeene bakwile shi: “Ami nee eshinda, nee binyibinyi, ne muwa. Muntu su ngumune takwenda kwi Yaaya kushii kukiila kwandji.” (Yowano 14:6) Bwashi nteko y’eetu iteemeshibwe, abitungu twiyeele kwi Yehowa kukidila kwi Mwan’aaye.

10. Bwakinyi twi kwamba shi tabitungu nka kwikala mushaale, mwimane sunga kwikala ungi mushindo bwa kwela nteko?

¹⁰ Twi balombeene kwikala bikwanyi nsaa yatwele nteko? Yehowa tatungaa shi bwa kumuteka mbidi yetu na maboko etu bikale mushindo kampanda nya. Bible alongyesha shi muntu mukumbeene kwela nteko mu mishindo ilekeene. Bino mbitale kwikala mushaale, mubandame, mukuname sunga kwikala mwimane. (1 Myanda 17:16; Neemii 8:6; Danyele 6:10; Maako 11:25) Ki na muulo ukata, ta mushindo watumweneka ku meeso a bantu nya, kadi mbyatudi mu mashimba eetu. Byabya, mu myanda y’eetu ya kwifuku dyooso sunga patudi na myanda ayitungu kukita bukidi, twi balombeene kukita luteko lwa munda munda mupunda mbalo yooso yatudi. Yehowa apushaa yaaya nteko sunga bantu batudi nabo tabeyipusha.​—Neemii 2:1-6.

11. Myanda kinyi y’etu bupenka ii na muulo yatudi balombeene kuteka?

¹¹ Twi balombeene kuteka kinyi? Bible alesha shi: ‘Kintu kyooso kyatudi balombeene kumuteka muyiile kukumiina kwaye etupa kyanka.’ (1 Yowano 5:14) Twi balombeene kuteka kintu kyooso kipusheene na akikyeb’Efile Mukulu. Akumiina shi tutekye myanda itutale su? Oolo! Kwela nteko kwi Yehowa kwi mumune na kwisamba na kuuk’oobe a p’eshimba. Twi balombeene kumupatulwila myanda yatudi nayo, ‘kufungula mashimba eetu’ kwi Efile Mukulu. (Misambo 62:9) Bibuwa tutekye kikudi kiselele, mwanda akitukwasha bwa kukita myanda ilulame. (Luuka 11:13) Abitungu dingi tutekye elango bwa kwata bitshibilo bibuwa na bwa kupeta bukome bwa kupudisha nkalakasho yatudi nayo. (Jaake 1:5) Nsaa yatukitshi mulwisho, abitungu tutekye kulekyelwa kwa milwisho y’eetu ku bukwashi bwa mulambu wa Kidishitu. (Beena-Efeeze 1:3, 7) Binyibinyi, myanda y’eetu bupenka tangilombeene kwikala pa mbalo ya kumpala mu nteko yeetu nya. Tabitungu shi twikale atutekye nkapenda myanda yeetu nya, abitungu tutekye dingi pabitale myanda ya bangi bantu​—beena kifuko neetu mpa na beena Kidishitu neetu.​—Bikitshino 12:5; Beena-Kolose 4:12.

12. Mushindo kinyi watudi balombeene kulesha shi atutuulu myanda itale Nshetu e mwiyilu pa mbalo ya kumpala mu nteko yetu?

¹² Myanda itale Yehowa Efile Mukulu abitungu ikale na muulo ukata mu nteko y’eetu. Twi na kya kumuteka na mashimba eetu ooso bwa myanda ibuwa yakwete kwitukitshina. (1 Myanda 29:10-13) Yesu batushile luteko lwa kileshesho lwabadi bafunde mu Mateo 6:9-13, mu lwalwa luteko mwitulongyeshe bwa kuteka bwashi eshina dy’Efile Mukulu ditumbishibwe. (Badika.) Kunyima mu lwalwa luteko abalesha shi Bufumu bw’Efile Mukulu bufikye nashi akikyeb’eshimba dyaaye kikitshikye pa nsenga bu byakikitshika mwiyilu. Anka penda nsaa ibapudiishe kwakula pabitale ino myanda ya muulo ukata ndjo aye nkwakula myanda imutale aye nabeene. Su atukitshi byabya bwa kutuula Efile Mukulu pa mbalo ya kinemo mu nteko yetu, byabya atulesha shi tatukimbi penda buwa bwetu atwe banabeene nya.

13. Bifundwe abyakula naminyi pabitale bula bwa nteko ibuwa?

¹³ Nteko yetu abitungu ikale bula bwi naminyi? Bible ta mutshibe bula abutungu kwikala nteko yetu ya pa bupenka sunga munkatshi mwa bantu nya. Luteko ndulombeene kwikala lwipi kumpala kwa kudya sunga kwikala bula nsaa yatudi bupenka atufungwila Yehowa mashimba eetu. (1 Samwele 1:12, 15) Kadi, Yesu baadi mutopekye bantu basha kwitatula abaadi abeele nteko ibula bwa kwilesha kumpala kwa bangi bantu. (Luuka 20:46, 47) Yehowa tateemeshaa nteko ibyabya nya. Ki na muulo nkwela nteko ayakula myanda ayitukila mu mashimba eetu. Byabya bula bwa nteko ibuwa bwi muyiile nkalo ya muntu na myanda yaadi nayo.

14. Bible p’etulungula bwashi ‘tutekye kushi kupungila,’ abikyebe kulesha kinyi, na nkinyi akitunyingisha pabitale uno mwanda?

¹⁴ Abitungu twele nteko misusa bungi kinyi kwifuku? Bible etulungula shi bibuwa ‘kuteka kushi kupungila, kuteka na kishima,’ na ‘kuteka kushii kukooka.’ (Luuka 18:1; Beena-Looma 12:12; 1 Beena-Tesalonika 5:17, Kilombeno kipya) Binyibinyi, bino bishima tabilesha shi abitungu twikale atwele nteko kwi Yehowa mwifuku dyooso dishima nya. Anka, Bible etulungula bwashi twikale atutekye misusa yooso, tutungunukye na kutumbula Yehowa bwa myanda ibuwa yaadi mwitukitshiine, kumuteka bwashi etukunkushe, etusambe, na etupe bukome. Kuuka kwashi Yehowa ta mwitutshibile bungi bwa misusa yatudya kwisamba naaye mu nteko ta kwitunyingisha su? Su twi na lutumbu pabitale kinemo kyatudi nakyo kya kwela luteko, atukyebe kupeta nsaa ibungi ya kwela nteko kwi Nsheetu e mwiyilu.

15. Bwakinyi abitungu twakule shi: “Amene” p’atwele luteko lwa pa bupenka sunga munkatshi mwa bantu?

¹⁵ Bwakinyi abitungu twakule shi “Amene” ku nfudiilo a luteko? Kishima “amene” akilesha shi “mbya binyibinyi,” sunga shi “bikale nka byabya.” Bileshesho bibungi bi mu Bifundwe abilesha shi bibuwa kwakula shi “Amene” nsaa yatufudiisha luteko lwetu bupenka sunga patudi munkatshi mwa bantu. (Misambo 41:14) Patwakula shi “Amene” ku nfudiilo kwa luteko lwetu bupenka, atushinkamisha shi bishima byetu tubebyakula n’eshimba dyetu dimune. Nsaa yatwakula shi “Amene”​—munda sunga n’eyi dibukopo—​ku nfudiilo kwa luteko lubabakatuka mu kukita munkatshi mwa bantu bebungi, atulesha shi atukumiina byooso bibabakatuka mu kwakula.​—1 Beena-Kodinto 14:16.

MISHINDO AYALULAA EFILE MUKULU KU NTEKO Y’ETU

16. Twi balombeene kwikala na lukulupilo kinyi pabitale nteko?

¹⁶ Yehowa alulaa ku nteko su? Oolo! Twi na kya kushinkamisha shi yawa “Apusha nteko” alulaa nteko yabeele na mashimba amune kwi midiyo ya bantu. (Misambo 65:3) Myalulo ya Yehowa ku nteko yetu ngilombeene kufika mu mishindo ilekeene.

17. Bwakinyi twi balombeene kwamba shi Efile Mukulu atumikaa na miikeyilu yaaye, na bafubi baaye be pa nsenga bwa kwalula ku nteko yetu?

¹⁷ Yehowa atumikaa na miikeyilu yaaye mpa na bafubi baaye be pa nsenga bwa kwaluula ku nteko. (Beena-Ebreeyi 1:13, 14) Nkumwenekye myanda ibungi pabitale bantu abaadi abatekye Efile Mukulu bwashi ebakwashe bapushe myanda i mu Bible na kunyima kwa mafuku apeela abaadi bebatembele kwi bafubi ba Yehowa bwa kwibakwasha. Ino myanda ayilesha bukwashi bwa miikeyilu ikwete kukunkusha mudimo wa kulungula mukandu wibuwa wa Bufumu. (Bifumbulwe 14:6) Bwa kwalula ku nteko y’atwele nsaa yatudi na lukalo lwa kintu kampanda, Yehowa mukumbeene kutuma mukwetu mwina Kidishitu bwashi afikye mu kwitukwasha.​—Myeele 12:25; Jaake 2:16.

18. Yehowa atumikaa naminyi na bukome bwaye mpa na Eyi dyaaye bwa kwalula ku nteko ya bafubi baaye?

¹⁸ Yehowa Efile Mukulu atumikaa dingi na kikudi kyaaye kiselele na Bible Eyi dyaaye, bwa kwalula ku nteko ya bafubi baaye. Yehowa mukumbeene kwalula ku nteko yatumutekye bwa kupeta bukwashi bwa kukambila bitompwanga byatudi nabyo bwa kwitukunkusha na kwitupa bukome ku bukwashi bwa kikudi kiselele. (2 Beena-Kodinto 4:7) Misusa ibungi myalulo ya ku nteko yetu bwa kupeta bukunkushi bwaye atwiyipetelaa mu Bible, mwamwa Yehowa kwete kwitukwasha bwa kumona mushindo wa kwata bitshibilo bibuwa. Twi balombeene kupeta maverse akumbeene kwitukwasha nsaa yatubadika Bible sunga mikanda ayipatuula Bible, kileshesho bu uno mukanda. Twi balombeene kupeta Bifundwe bya kwitukwasha patudi mu bisangilo bya beena Kidishitu sunga nsaa yabetupa elango kwi mukulu kampanda mu kakongye etatshisha bwa buuwa bwetu.​—Beena-Galate 6:1.

19. Nkinyi akitungu kuuka su ingi nsaa nteko yetu ayimweneka bu ishi ipete myalulo?

¹⁹ Su atumono shi Yehowa kwete kuyisha bwa kwaluula ku nteko yetu, ta nkwamba shi te na mushindo wa kwaluula ku nteko yetu nya. Anka, abitungu tushinguule shi Yehowa alulaa ku nteko yetu muyiile akikyeb’eshimba dyaaye mu nsaa ilombane. Yehowa auku nkalo yetu na mushindo wa kwiyipudisha kwitukila. Misusa ibungi kwete kwituteka bwashi ‘tutungunukye na kuteka, kukimba, na kukookola.’ (Luuka 11:5-10) Kwakwa kunyingiila akulesha Efile Mukulu bukata bwa lukalo lwatudi nalo nashi twi na lukumiino lwa binyibinyi. Na dingi, Yehowa mukumbeene kwalula ku nteko yetu mu mushindo watushatuuku. Bu kileshesho, mukumbeene kwalula ku nteko yetu pabitale bitompwanga kampanda, kushi kukaasha nkalakasho yatudi nayo, kadi etupa bukome bwa kunyingiila mu nkalakasho.​—Badika Beena-Fidipe 4:13.

20. Bwakinyi abitungu tutungunukye na kwela nteko?

²⁰ Twi balombeene kwikala na lutumbu lukata kwi Mupangi a eyilu na nsenga mwanda e pepi na booso abamwitanyina mu nteko! (Badika Misambo 145:18.) Abitungu twele nteko kwi Yehowa misusa yooso bu byatudi na kinemo kikata kya kwela nteko kwadi. Su tubakitshi byabya, atukyebe kupeta muloo ukata wa kwifubwila pepi na Yehowa, Aye apushaa nteko.