Kwibunga pamune bwa kulangwila

1. Mbukwashi kinyi bubaadi bupete balongi ba Yesu pabaabadi bebungye pamune, na bwakinyi abaadi nabo lukalo?

MAFUKU apeela kunyima kwa kusanguka kwa Yesu, balondji baaye babaadi bebungye bwabadya kwinyingishena. Anka babaadi bashite biibi pa mwanda wa kutshina beshikwanyi. Moo wabo ubaadi ulombeene kupwa nsaa ibaadi ibatuukile Yesu munkatshi mwabo aye nkwibalungula shi: “Tambulayi kikudi ki selele”! (Badika Yowano 20:19-22.) Kunyima, babaadi bebungye dingi pamune, na Yehowa nkwibapongolwela kikudi ki selele. Babaadi bapete bukome bwikashaa bwa kukita mudimo wa bulungudi ubaadi awibatengyela!​—Bik. 2:1-7.

2. (a) Yehowa kwete kwitunyingisha mu mushindo kinyi, na bwakinyi twi na lukalo lwa kunyingishibwa? (b) Bwakinyi mpàngo ya lulangwilo lwa mu kifuko i na muulo? (Tala eyi di mushi mw’esaki na kashibo akamba shi: “Lulangwilo lwa mu kifuko.”)

² Twi na nkalakasho i mumune na yaaya ibaadi nayo bakwetu mu bipwa lukama bya kumpala. (1 Mp. 5:9) Ingi nsaa, bangi ba kwatudi mbalombeene kukyenga mwanda wa kutshina bantu. Na twi na lukalo na kwakwa kunyingishibwa kwa Yehowa su atukumiina kukambila yaaya nkalakasho mu mudimo wa bulungudi. (Ef. 6:10) Yehowa kwete kwitunyingisha ku bukwashi bwa bisangilo byetu. Lelo uno twi na mushindo wa kutwela mu bisangilo bibidi bya ku lubingo abitulongyesha myanda ibungi​—mwisambo wa bantu booso, kulonga kwa Kitenta kya Mulami, na bisangilo byetu bya munkatshi mwa lubingo byabetamina bu Bwina Kidishitu na mudimo wetu.a Twi na dingi bisangilo binanka ku kipwa​—kikongeno kya mafuku asatu, bikongeno bibidi bya kifunda na Kitentekyesho kya lufu lwa Kidishitu. Bwakinyi bi na muulo bwashi tutwele mu bino bisangilo byooso? Mushindo kinyi ushintulukye bisangilo byetu lelo uno? Na binangu byetu pabitale bino bisangilo abilesha kinyi kwatudi?

Bwakinyi abitungu kwibunga pamune?

3, 4. Yehowa mutekye bafubi baaye kinyi? Tuusha bileshesho.

³ Kubanga kala Yehowa mutekye shi bafubi baaye bebungye pamune bwa kumulangwila. Bu kileshesho mu 1513 ebedi dya Yesu Kidishitu (K.B.B.) Yehowa bapeele mwilo wa Isalele miiya yaaye, na miiya itale Nsabato ya ku lubingo bwashi kifuko kyooso kimone mushindo wa kumulangwila na kulongyeshibwa ku bukwashi bwa miiya. (Miy. 5:12; 6:4-9) Beena Isalele pabaabadi abalondo ano mayi, bifuko bibaadi abinyingishibwa na mwilo ooso ubaadi aushaala unyingye na utooshibwe mu kikudi. Mwilo paubaadi aukutwa kulonda Miiya, kulenguula miiya itale kwibunganga ku lubingo looso bwa kulangwila Yehowa, ubaadi aukutwa bukwashi bw’Efile Mukulu.​—Lv. 10:11; 26:31-35; 2 Mya. 36:20, 21.

⁴ Tubande kutala bileshesho bibidi bibaadi Yesu mulekye. Baadi na kyubishi kya kwenda ku Sinagoge ku lubingo looso mwifuku dya Nsabato. (Luk. 4:16) Kunyima kwa lufu lwa Yesu na kusanguka kwaye, balondji baaye mbatungunukye na kwibunganga sunga tababaadi dingi ku mwiya wa Nsabato. (Bik. 1:6, 12-14; 2:1-4; Lom. 14:5; Kol. 2:13, 14) Mu byabya bisangilo, balongi ba mu siekele a kumpala tababaadi penda abapete malango na kunyingishibwa nya, anka abaadi abatusha milambu ya kutumbisha Efile Mukulu ku bukwashi bwa nteko yaabo, kutuusha myaluulo, na kuyimba ngono.​—Kol. 3:16; Eb. 13:15.

5. Bwakinyi atutwelaa mu bisangilo bya ku lubingo na bikongeno bya kifunda na bya mafuku asatu abikitshikaa ku kipwa? (Tala kashibo akamba shi: “Bikongeno bya ku kipwa bibungye mwilo w’Efile Mukulu.”)

⁵ Bi mumune, nsaa yatutwele mu bisangilo bya ku lubingo na ku bikongeno bya kifunda na bya mafuku asatu bya ku kipwa, atulesha shi tukwete kukwatshishena Bufumu bw’Efile Mukulu, atunyingishibwa ku bukwashi bwa kikudi ki selele, na kunyingisha bangi ku mushindo w’atulesha lukumiino. Kingi kintu ki na muulo, twi na mushindo wa kulangwila Yehowa ku bukwashi bwa nteko yetu, myaluulo yatutuusha mu bisangilo na mu kuyimba kwa ngono. Mushindo aukitshika bisangilo byetu ngulombeene kwilekena na bibaadi bisangilo bya beena Isalele na beena Kidishitu ba mu siekele a kumpala, kadi kwibunga kwetu kwi mumune. Mushindo kinyi ushintulukye bisangilo byetu lelo uno?

Bisangilo bya ku lubingo looso bikwete kunyingisha mu “kifulo na mu mifubo ibuwa”

6, 7. (a) Bisangilo byetu bi na mpàngo kinyi? (b) Mushindo kinyi ubaadi wilekene bisangilo muyile bisaka bya Balongi ba Bible?

⁶ Nsaa ibabangile mukwetu Charles Taze Russell kukimba bya binyibinyi Mwiyi dy’Efile Mukulu, bamwene shi bi na muulo kwibunga na bangi be na mpàngo imumune. Mu 1879, Russell bafundjile shi: “Ami, pamune na bangi be mu Pittsburgh, twibelumbuule na twibakite kalasa ka Bible bwa kukimba Bifundwe, kwibunganga mu dya Lubingo dyooso.” Baaba babaadi ababadika Kitenta kya Mulami a Siyoona babaadi bebanyingishe bwabadya kwibunga pamune, na mu 1881, bisangilo bibabangile kukitshika mu Pittsburgh, mu Pennsylvanie mu dya Lubingo na mu dya Kasatu mooso. Kitenta kya Mulami kya mu mweshi w’Ekumi na umune mu 1895 kibaadi kileshe lukalo lwa bino bisangilo shi ndwa kwikala mu “kipwano kya bwi na Kidishitu, kifulo na buumune” na bwa kupa baaba abatwele mwanka mushindo wabadya kwinyingishena.​—Badika Beena-Ebelu 10:24, 25.

⁷ Munda mwa bipwa bibungi, mushindo wa kukita bisangilo na misusa ya kwibikita bibaadi bilekene muyiile bisaka bya Balongi ba Bible. Bu kileshesho, mukanda wa ku États-Unis ubaadi utuukye mu 1911 ubalesheshe shi: “Tukwete kukita penda bisangilo bitano ku lubingo.” Babaadi abakitshi bino bisangilo mu Dimune, mu dya Kasatu, mu dya Katano, na misango ibidi mu dya Lubingo. Ungi mukanda, wa mu kingi kisaka kya mu Afrique ubaadi utuukye mu 1914 ubalesheshe shi: “Atukitshi bisangilo kabidi ku mweshi, kubanga mu dya Katano mpa na mu dya Lubingo.” Anka mu angi mafuku mushindo wa kukita bisangilo ubaadi ushintulukye. Banda kutala myanda ayilesha bibaadi abikitshika kisangilo kyooso.

8. Miisambo kinyi ya bantu booso ibaadi kwanka?

⁸ Bisangilo bya bantu booso. Mu 1880, kipwa kimune kunyima kwa mukwetu Russell kubanga kutuusha Kitenta kya Mulami a Siyoona, baadi mulonde kileshesho kya Yesu na aye nkukita lwendo lwa kwifunya na kulungula mukandu wibuwa. (Luk. 4:43) Mu lwendo lwaye, mukwetu Russell mulekye kileshesho kya bino byatukwete kukita bu bisangilo byetu bya bantu booso. Pabitale lwalwa lwendo, Kitenta kya Mulami kibaadi akilesha shi: Russell “e na lukalo lwa kukita mwisambo mu bisangilo bya bantu booso wi na mutwe wa mwanda awamba shi: ‘Bintu bitale Bufumu bw’Efile Mukulu.’” Mu 1911, kunyima kwa tulasa, sunga tukongye, kwenda na kutama mu maumbo, kalasa kooso abaadi bekanyingishe bwa kutuma bantu balombeene kukita miisambo kalolo bwa kwenda na kwifunya na miisambo isamombo i na mitwe ya myanda bu kiimu na nkuulo. Ku nfudiilo kwa mwisambo ooso, abaadi abatemuna eshina dya sha mwisambo na mutwe wa mwanda w’akitshi mu lubingo alufiki.

9. Mushindo kinyi wende na kushintuluka miisambo ya bantu booso munda mwa bipwa, na mushindo kinyi oodi mulombeene kukwatshishena bino bisangilo?

⁹ Mu 1945, Kitenta kya Mulami kibaadi kileshe kubanga kwa kampanye ka bisangilo bya bantu booso bi na miisambo ya mu Bible ibaadi ayisambila “myanda ikata ya ano mafuku.” Munda mwa bipwa makumi, baasha miisambo tababaadi penda abatumika na yaaya miisambo yabadi batuushe kwi mpika a kishima nya, kadi abaadi dingi abakitshi miisambo yabadi balumbuule abo banabeene. Byabya, mu 1981 baasha miisambo booso babaadi bebatekye bwa kukita miisambo imeene mu myanda ya mu tukongye.b Mpa na mu 1990, ingi miisambo ibaabadi abakitshi mu bisangilo bya bantu booso, ibaadi ayitekye bantu bwabadya kutusha byabo binangu sunga kukita bileshesho; kadi mu kyakya kipwa abaadi bataluule aa malango, na miisambo ya bantu booso ababangile kwiyikita penda bu miisambo bisumanga. Kungi kushintuluka kukata kubaadi kutukye mu 2008 nsaa ibaabadi bapeeleshe minite ya miisambo ya bantu booso yakatuka mu minite 45 yafika mu minite 30. Sunga bashintuula bukata bwa miisambo, miisambo ilumbuulwe kalolo ibatungunukile na kukitshibwa bwa kunyingisha lukumiino Mwiyi dy’Efile Mukulu na kwitulongyesha pabitale myanda ilekene ya mu Bufumu bw’Efile Mukulu (1 Tim. 4:13, 16) Okwete kwitamina na muloo ooso baaba b’okwete kwalukiila mu kutala abakumiina bya binyibinyi na bangi bashii Batemwe bwabadya kufika mu kuteemesha ino miisambo ibuwa imeene mu myanda ya mu Bible su?

10-12. (a) Mushindo kinyi wabadi bashintuule kulonga kwa Kitenta kya Mulami? (b) Nkonko kinyi yatudi balombeene kwiyipusha?

¹⁰ Kulonga kwa Kitenta kya Mulami. Mu 1922, bakwetu abaukibwa bu be na ngyendo​—bafubi babadi batume kwi sosiete Watch Tower bwa nkakita miisambo mu tukongye na kukunkusha mudimo wa bulungudi—​abatuushile binangu bya kukitanga bisangilo mu kulonga kwa Kitenta kya Mulami. Na bino binangu abaadi bebikumine, na bwa mususa wa kumpala, kulonga kwa Kitenta kya Mulami abaadi abekukitshi munkatshi mwa lubingo sunga mu dya Lubingo.

¹¹ Kitenta kya Mulami kya mu 15/6/1932, kibaadi kituushe angi malango pabitale mushindo wa kukita bino bisangilo na kwibikunkusha. Abalondo mushindo ubaabadi abakunkusha kulonga kwa Kitenta kya Mulami ku Betele, mwisambo ubaadi aulesha mukwetu mulume mulombeene kukunkusha bisangilo. Bakwetu balume basatu abaadi balombeene kushaala kumpala mu bisangilo na kwishintushena mu kubadika kwa ma paragrafe. Miisambo mu aa mafuku tayibaadi na nkonko nya, byabya yawa akunkusha abaadi abamutekye bwashi atekye bantu abateemesha bwabadya kwela nkonko pabitale myanda ya bakwete kulonga. Kunyima kwa byabya, mulombeene kuteka bantu abateemesha bwa kutuusha myaluulo ku yaaya nkonko. Su bibaadi abitungu kutuusha angi malango, babaadi abatekye muntu akunkusha bwa kupatuula myanda “mu kikoso.”

¹² Ku mbangilo, kakongye kooso kabaadi na bulungantu bwa kusangula mwisambo mu jurnale wabakumiina kwi bantu beebungi bwa kulonga. Anka, mwisambo wa mu Kitenta kya Mulami kya mu 15/4/1933 ubaadi uleshe shi: Tukongye tooso tulongye Kitenta kya Mulami kyabadi nakyo. Mu 1937, kubatuukile malango alombane aalesha shi abitungu kulonga kukitshikye mu dya Lubingo. Kungi kutooshibwa kubaadi kushintuule mushindo wa kukita bisangilo muyiile byatukwete kukita kubaadi kutushibwe mu Kitenta kya Mulami 1/10/1942. Kya kumpala jurnale baadi muleshe shi nkonko ayikyebe kutuuka kunundu kw’esaki dyooso dya mwisambo wa kulonga na yaaya nkonko abitungu kutumika nayo. Akupu, kibaadi kileshe shi byabya bisangilo abitungu kwibikita munda mwa nsaa umune. Kibaadi dingi kinyingishe baaba abaluula, bwashi baakule mu “bishima byabo” pamutwe pa kubadika bipindji bya paragrafe. Kulonga kwa Kitenta kya Mulami kubatungunukile na kwikala bu kisangilo kya kumpala kyabakwete kutumika nakyo kwi mpika bwa kutuusha bidibwa bya mu kikudi pa nsaa ilombane. (Mat. 24:45) Ooso a kwatudi e na kya kwiyipusha shi: ‘Nkwete kwilumbuulanga bwa kulonga kwa Kitenta kya Mulami ku lubingo looso su? Na nkwete kwitatshisha bwa kutuusha myaluulo pakudi mushindo su?’

13, 14. Mushindo kinyi ubaadi aukitshika Kulonga kwa Bible mu kakongye, na nkinyi akikusangasha pabitale kino kisangilo?

¹³ Kulonga kwa Bible mu kakongye. Munkatshi mwa bipwa 1890, kunyima kwa kutuuka kwa ma volime a L’Aurore du Millénium, mukwetu H. N. Rahn Mulongi a Bible baadi mu kibundji kya Baltimore, mu Maryland, mu États-Unis, baadi mutuushe binangu bya kukita “kisaka kya kulonga Bible ku bukwashi bwa mukanda wa L’Aurore du Millénium.” Kumpala, bino bisangilo babaadi abatompo kwibikita mu nshibo ya muntu. Anka, mu mweshi wa Kitema 1895 kisaka kya kulonga Bible ku bukwashi bwa Aurore du Millénium kibaadi akikitshika kalolo mu bibundji bibungi bya mu États-Unis. Kitenta kya Mulami kya mu wawa mweshi kibaadi kileshe shi: Balongi booso ba bya binyibinyi mbalombeene kukita bino bisangilo. Kibalesheshe dingi shi yawa akunkusha ekale muntu auku kubadika kalolo. Bibaadi abitungu shi abadikye mulongo akupu atengyele baaba abaadi panka bwabadya kutuusha binangu. Kunyima kwa kubadika milongo yooso i mu paragrafe na kwiyitaluula, baadi mulombeene kutungunuka na kubadika maverse abadi bafunde. Ku nfudiilo kwa shapitre, muntu ooso e mu bisangilo baadi mulombeene kwakula myanda ibalongo mu kikoso.

¹⁴ Eshina dya kino kisangilo dibashintulukile misusa ibungi. Babaadi abekitamina bu kisaka kya beena Beree abalongo Bible, muyiile bibaadi abikitshi beena Beree ba mu siekele a kumpala abaadi abataluula Bifundwe. (Bik. 17:11) Kunyima eshina abedishintulwile bu Kulonga kwa mukanda mu kakongye. Lelo uno akwitaminyibwa bu Kulonga kwa Bible mu kakongye, na kakongye kooso akebungu pamune mu Nshibo ya Bufumu pamutwe pa kwibunga mu nshibo ya muntu. Munda mwa bipwa makumi, mikanda ilekene, ma broshire, mpa na miisambo ya mu Kitenta kya Mulami mbatumikye nayo bwa kulonga. Mu mafuku a ku mbangilo, booso abaadi abatwele bibaadi abitungu shi baleshe binangu byabo mu bisangilo. Bino bisangilo mbikwashe ngofu bwa kutamisha kiukilo kyetu kya Bible. Welumbuulaa nsaa yooso ku bino bisangilo na kutuusha myaluulo mwanka poodi na mushindo su?

15. Kalasa ka mudimo wa Teokrasi kabaadi kwanka bwakinyi?

¹⁵ Kalasa ka mudimo wa Teokrasi. Carey Barber, baadi afubu mu aa maufuku ku biro byetu bikata mu Brooklyn, mu New York atentekyesha shi: “Mu bufuku bwa mu Dimune 16/2/1942 balume booso ba ku Betele a ku Brookyn abaadi bebatekye bwashi befundjishe mu kalasa kaukibwe kumongo bu Kalasa ka Mudimo wa Teokrasi.” Mukwetu Barber baadi mutwele kumongo mu Kasaka ka Bakunkushi bakulu baadi muleshe pabitale kaaka kalasa shi: “Nyi mushindo umune aulesha kushintuluka kukata mu bikwete Yehowa kukitshina bafubi baaye ba lelo myanda.” Malongyesha abaadi na bukwashi bukata kwi bakwetu balume bwabadya kulumbuula mushindo wabo wa kulongyesha na mayele aabo a mu bulungudi, kubanga mu 1943 mukanda wa Cours pour le ministère théocratique ubaadi awende na kutuuka mu tukongye tooso twa mu nsenga. Kitenta kya Mulami kya mu 1/6/1943 kibaadi kileshe shi: Kalasa ka mudimo wa Teokrasi ke na mudimo wa kukwasha bafubi b’Efile Mukulu bwabadya “kwilongyesha bwa kwikala bu tumonyi twi buwa mu bulungudi bwa Bufumu.”​—2 Tim. 2:15.

16, 17. Kalasa ka mudimo wa Teokrasi kabaadi kwanka penda bwa kukita miisambo su? Patuula.

¹⁶ Kya kumpala, bantu bebungi abamwene shi bi bukopo kwisamba munkatshi mwa bantu bebungi. Clayton Woodworth, Jr., baadi na nshaaye abaabadi beele mu lukano pamune na mukwetu Rutherford na bangi mu 1918, atentekyesha mushindo ubapushishe pabatwelele mu kaka kalasa bwa mususa wa kumpala mu 1943. Mukwetu Woodworth bambile shi: “Bibaadi bukopo bwashi nkite mwisambo, edimi dyande dibaadi nka bu adinkulu bula, mukanwa mubaadi amungumu, na eyi dyande dibaadi adisuusu.” Anka pabaadi Clayton ende na kunyinga, bapetele mashito ebungi a kwisamba munkatshi mwa bantu bebungi. Kalasa kabaadi kamulongyeshe myanda ibungi kushii penda mushindo wa kukita miisambo, kabaadi kamulongyeshe dingi muulo wa kwikala na kwiyisha na muulo wa kukulupila mwi Yehowa. Amba shi: “Nashingulwile shi, penda sha mwisambo te na muulo nya. Kadi su belumbuula kalolo na kutuula lukulupilo lwaye kwi Yehowa, abamuteemesha na muloo na baaba abamuteemesha abakyebe kulamiina kintu.”

¹⁷ Mu 1959, bakwetu bakashi abaadi bebatekye bwabadya kutwela mu kano kalasa. Mukwetu mukashi Edna Bauer atentekyesha pabaadi mupushe abaukisha wawa mwanda ku kikongeno kibatwelele shi: “Natentekyesha muloo ubaadi nao bakwetu bakashi, binobino tabadi na mushindo ukata wa kwimutwela.” Su wekala mulume sunga mukashi, we mwate nsaa ya kupeta bukwashi ku uno mushindo bwa kwifundjisha mu Kalasa ka Mudimo wa Teokrasi bwashi olongyeshibwe na Yehowa su?​—Badika Yeeshaya 54:13.

18, 19. (a) Mushindo kinyi watukwete kupeta bukunkushi bulombane bwa kukita mudimo wa bulungudi? (b) Bwakinyi atuyimbaa mu bisangilo byetu? (Tala kashibo akamba shi: “Kuyimba bya binyibinyi.”)

¹⁸ Kisangilo kya Mudimo. Ku mbangilo kwa 1919, abaadi abakitshi bisangilo bya kulumbuula mudimo wa bulungudi. Mu aa mafuku, ta mbooso mu kakongye abaadi abatwele mu byabya bisangilo​—mpenda baaba abaadi bepaane mu mudimo wa kwenda na kwabila mikanda. Mu kipindji kikata kya kipwa kya 1923, Kisangilo kya Mudimo kibaadi akikitshika dimune ku mweshi, na booso abaadi mu kalasa, sunga shi mu kakongye, abaadi abemutwele. Mu 1928, abaadi banyingishe tukongye bwatudya kukita Kisangilo kya Mudimo ku lubingo looso, na mu 1935, Kitenta kya Mulami kibaadi kinyingishe tukongye bwatudya kwikala atukitshi Kisangilo kya Mudimo mu kulonda byabadi bafunde mu L’instructeur (muukibwe kumongo bu l’Informateur na akupu dingi bu Mudimo wetu wa Bufumu). Mu mafuku apeela abaadi bekitweshe mu programe a kakongye kooso.

¹⁹ Lelo uno tukwete kupeta bukunkushi bulombane bwa kukita mudimo wa bulungudi mu bisangilo byetu bya munkatshi mwa lubingo. (Mat. 10:5-13) Su we mulombashe myanda itekibwe bwa kupeta esaki dya Programe a bisangilo, okwete kwidilonga na kutumikila malango e mwanka nsaa yoodi mu mudimo wa bulungudi su?

Kisangilo ki na muulo ukata ku kipwa

20-22. (a) Bwakinyi atukitaa Kitentekyesho kya lufu lwa Yesu? (b) Nkinemo kinyi kyatudi nakyo patukitshi Kitentekyesho kya lufu lwa Yesu ku kipwa kyooso?

²⁰ Yesu baadi mulungule balongi baaye bwashi bekale abatentekyesha lufu lwaye mpa na pa kufika kwaye. Anka bu bibaadi Kitentekyesho kya Lukilo, Kitentekyesho kya lufu lwa Kidishitu nyi mwanda aukitshikaa ku kipwa. (1 Kod. 11:23-26) Kino kisangilo kikwete kubunga bantu midiyo ku kipwa kyooso. Akitentekyesha bedibwe mwimu kinemo kyabadi nakyo kya kumunana pamune mu Bufumu. (Lom. 8:17) Na kwi ingi mikooko namu, akibapa kanemo kakata ku kyanka na kukwatshishena Nfumu na Bufumu bw’Efile Mukulu na kululama kooso.​—Yo. 10:16.

²¹ Mukwetu Russell na benaaye abaadi bashinguule muulo wa kutentekyesha Kidibwa kya Mwanana na abaadi abauku shi abitungu kwikikita mususa umune ku kipwa. Kitenta kya Mulami kya mu mweshi wa Kananka 1880, akilesha shi: “Takudi bipwa bibungi bebungi ba kwatudi muno mu Pittsburgh be na kiubishi kya . . . kutentekyesha Lukilo [Kitentekesho] na kudya mukate na kutoma nfinyo ayilesha mbidi na mase a Mwanana.” Mu mafuku apeela ababangile kukita bikongeno mu kwipushena n’efuku adikitshika Kitentekyesho kya lufu lwa Yesu. Bungi bwa kumpala bubaadi bulamibwe mu aa mafuku bubaadi mu 1889, nsaa ibaadi bantu 225 batwele mwanka na bantu 22 nkubatshishibwa.

²² Lelo uno tatukwete kukita dingi Kitentekyesho kya lufu lwa Yesu bu kimune kya ku programe a kikongeno, anka tukwete kwitamina bantu booso mu mbalo yooso yabadi bwashi bafikye netu mu Nshibo ya Bufumu ya mbalo yatudi sunga pa mbalo yatudi bafutshile makuta bwa kukita kyanka. Mu 2013, bantu bakile midiyo 19 abekalanga batentekyeshe lufu lwa Yesu. Twi na kinemo kikata kishii kya penda kutwela mu Kitentekyesho kadi kya kunyingisha bangi bwabadya kwibunga pamune neetu mu kino kyoolwa ki selele! Na muloo ooso okwete kwitamina bantu bebungi bwabadya kufika ku Kitentekyesho kya lufu lwa Yesu ku kipwa kyooso pakudi mushindo su?

Mushindo watumonaa bisangilo byetu aulesha kinyi?

23. Mushindo kinyi omonaa kwibunga kwetu kwa pamune bwa kulangwila?

²³ Bafubi ba Yehowa basha kululama tabamonaa mwiya wa kwibunga pamune bwa kulangwila bu lukalakasho nya. (Eb. 10:24, 25; 1 Yo. 5:3) Bu kileshesho Nfumu Daavide baadi na muloo wa kwenda ku nshibo y’Efile Mukulu bwa kulangwila. (Mis. 27:4) Baadi na muloo wa kwenda mu kwibunga pamune na bangi abaadi bafule Efile Mukulu. (Mis. 35:18) Banda kunangwila pa kileshesho kya Yesu. Pabaadi ki mwana mukinga, baadi na muloo wa kulangwila mu nshibo ya Nshaaye.​—Luk. 2:41-49.

24. Nsaa yatutwele mu bisangilo, twi na mushindo wa kulesha kinyi?

²⁴ Nsaa y’atutwele mu bisangilo, tukwete kulesha kifulo kyetu bwa Yehowa na lukalo lwetu lwa kunyingisha beena Kidishitu neetu. Atulesha dingi lukalo lwetu lukata lwa kulonga mushindo wa kwikala bu beena Bufumu bw’Efile Mukulu, ku bukwashi bwa bisangilo byetu, bikongeno bya kifunda na bya mafuku asatu mwatukwete kupeta ano malongyesha. Na dingi, bisangilo byetu abitunyingisha na kwitupa bukome bwatudi nabo lukalo lwa kunyingiila mu umune wa ku midimo yabakwete kukita kwi Bufumu bw’Efile Mukulu lelo uno​—kufwisha bantu balongi ba Nfumu Yesu Kidishitu na kwibalongyesha. (Badika Mateo 28:19, 20.) Kushii mpaka, bukata bwa lukalo lwetu lukata lwa kwibunga pamune alulesha kalolo mushindo wi Bufumu bw’Efile Mukulu mbw’eyendo kwi ooso a kwatudi. Twikaleyi atwata bisangilo byetu na muulo!