Mishindo ya kulungula mukandu wibuwa

BU BIBAADI mulungudi a mukandu wibuwa sha kishima, Yesu mmulekyele balongi baaye kileshesho kibuwa. Baatshile mpángo ya kwenda kwi bantu, esamba nabo na kwibalongyesha ku mashibo aabo na munkatshi mwa bantu. (Mat. 9:35; 13:36; Luk. 8:1) Yesu baadi mwisambe na bantu pa bupenka bwabo, baadi mulongyeshe balongi baaye pa bupenka, na kulambukisha bibumbu bya bantu be binunu na binunu. (Mak. 4:10-13; 6:35-44; Yo. 3:2-21) Tabaadi akisha mushindo ooso awumweneka wa kwisamba na bantu mayi a kwibanyingisha na kwibapa lukulupilo nya. (Luk. 4:16-19) Tabaadi akisha nsaa ya kutuusha bu kamonyi sunga pabaadi na lukalo lwa kwikisha sunga kukisha kapapi nya. (Mak. 6:30-34; Yo. 4:4-34) Nsaa y’atubadika myanda ya Yesu ifundjibwe ku bukwashi bwa kikudi kiselele, tomono’shi abitutakula bwa kulonda kileshesho kyaaye su? Oolo, twi na kya kumwambula nka bu bibakitshine batumibwa.​—Mat. 4:19, 20; Luk. 5:27, 28; Yo. 1:43-45.

² Tubande kutala mishindo i nayo beena Kidishitu lelo uno ya kwipaana mu mudimo ubabangile Yesu Kidishitu takudi bipwa peepi na 2 000.

KULUNGULA KU NSHIBO NA NSHIBO

³ Bu byatudi ba Temwe ba Yehowa, atushinguula muulo wa kulungula mukandu wibuwa wa Bufumu ku nshibo na nshibo. Twi batumikye na ano mayele ngofu mu mushindo waadi ashaale bu kitundwilo kyetu. Binangu bya kutumika na ano mayele bwa kukuma midiyo ya bantu ku mashimba na mukandu wibuwa mu kapindji kapeela mbituushe bipeta bibuwa. (Mat. 11:19; 24:14) Bulungudi bwa ku nshibo na nshibo mbumwenekye bu mushindo wibuwa wa kulesha kifulo kyetu bwa Yehowa mpaa na bwa bantu netu.​—Mat. 22:34-40.

⁴ Mayele a kulungula ku nshibo na nshibo ta mba Temwe ba Yehowa beatuushe nya. Mpoolo mutumibwa alesha’shi baadi alambukisha bantu ku mashibo aabo. Pabitale mudimo waaye, baadi mulungule bakulu ba mu Efeso’shi: ‘Kubanga ku dyadya efuku dya kwibedi dinafikile mu nsenga ya Azii, . . . ntshimutshine kwinulungula mwanda w’Efile Mukulu na kwinulambukisha wanka . . . ku nshibo na nshibo.’ Ku bukwashi bwa ano mayele na angi, Mpoolo ‘balungwile kwi beena Yuuda na kwi bashii beena Yuuda [beena Greke] bwabadya kwilanga ku mashimba, balukiile kwi Efile Mukulu na kukumiina Nfumwetu Yesu.’ (Bik. 20:18, 20, 21) Mu aa mafuku, ba amperere ba mu Looma babaadi abakumiina lulangwilo lwa ma nkishi, na bebungi abaadi ‘bepaane ku lulangwilo lwa b’efile.’ Kubaadi lukalo lukata lwa’shi bantu bakimbe “Efile Mukulu bapangile nsenga n’eyilu na bintu byoso bi mwanka,” aye baadi “akamika kwi bantu boso ba pa nsenga poso’shi belangye ku milwisho.”​—Bik. 17:22-31, EEM.

⁵ Lelo uno, lukalo lwa kwenda kwi bantu na mukandu wibuwa lwi kwanka ngofu. Nfudiilo a uno ndumbulwilo a myanda ebubi kwete kufika bukidi bukidi. Pa kutala luno lukalo lwi kwanka, twi na kya kutamisha nfubilo eetu a mudimo. Takwi ungi mushindo ukile uno wa kutumika na mayele a kukimba bantu be na nsala ya bya binyibinyi ku nshibo na nshibo nya. Kukita bino kukwete kutuusha bipeta bibuwa mumune na byabibaadi mu mafuku a Yesu na batumibwa.​—Mak. 13:10.

⁶ We na mushindo wa kwipaana ngofu mu bulungudi bwa ku nshibo na nshibo su? Su mbyabya, we mukumbeene kushinkamisha’shi, byokitshi abisangasha Yehowa. (Es. 9:11; Bik. 20:35) Mbilombeene kwikala’shi bulungudi bwa ku nshibo na nshibo ta mbukubofwile nya. Pangi we na nkalakashi ya ku mbidi sunga’shi mbakupe teritware e bantu bashy’abakuteemesha. Mbilombeene kwikala’shi mbulamatadi mmukandjikye mudimo wetu. Pangi we na buufu, na omono’shi bi bukopo bwa kubanga mwisambo na muntu oshy’owuku. Byabya, nsaa yooso ywende mu bulungudi bwa ku nshibo na nshibo okwete kupeta lukalakashi kampanda. Totshobolokanga. (Efi. 4:10-12) Mu ma mbalo ebungi bakwenu bakwete kupeta lukalakashi lwi mumune na loobe.

⁷ Yesu balayile balongi baaye’shi: “Ami naamu, ne nenu mafuku ooso, nyaa na ku nfudiilo kwa bya pano.” (Mat. 28:20) Wawa mulayilo awitunyingisha mu mudimo wetu wa kwikasha bantu bu balongi. Atupusha nka bibapushishe Mpoolo mutumibwa bambile’shi: “Ne mulombeene kukita byooso mwanda wa uno anyingisha.” (Fid. 4:13) Londa mpángo yooso ayaata kakongye bwa kutuusha bu kamonyi ku nshibo na nshibo. Okyebe kunyingishibwa na kupeta bukwashi nsaa y’ofubu na bangi. Ela luteko bwa kupeta bukwashi bwa kukambila lukalakashi looso loodi mulombene kupeta, na wepaane ngofu bu mulungudi a mukandu wibuwa.​—1 Yo. 5:14.

⁸ Kulungula bangi mukandu wibuwa, akukupa mushindo wa “kushinkamisha lukumiino [loobe].” (1 Mp. 3:15) Okyebe kushinguula bikata kwilekeena kwi pankatshi pa baaba be na lukulupilo lwa Bufumu na baaba bashii nalo. (Yesh. 65:13, 14) Okyebe dingi kupeta muloo wa kuuka’shi okwete kukookyela ku mwiya wa Yesu wa’shi: ‘Etaata dyenu diileeshe kwi bantu,’ na we mulombeene kupeta mwabi wa kukwasha bangi bwabadya kuuka Yehowa na kuuka bya binyibinyi abifikisha ku muwa wa ikalayika.​—Mat. 5:16; Yo. 17:3; 1 Tim. 4:16.

⁹ Mbalumbuule bwa kwenda ku nshibo na nshibo dya mpooso dyooso na dya lubingo dyooso mpaa na munkatshi mwa lubingo. Tungi tukongye ntwilumbuule bwa kwenda mu kulambukisha ku kyoolwa mu ma mbalo e bukopo kupeta bantu ku namashika. Bantu mbalombeene kukumiina kutambula benyi ku nyima kwa midi sunga mu nsaa ya kyoolwa pamutwe pa ku namashika.

KUKIMBA BAABA BAKUMBANE

¹⁰ Yesu balungwile balondji baaye bwa “kukimba” bantu balombane. (Mat. 10:11, EEM) Yesu tabaadi akimbi baaba balombane nkapenda ku nshibo na nshibo nya. Eyendo, baadi alungula mukandu wibuwa mu nshalelo yooso, bikale aye mwilumbuule sunga apamweka mushindo. (Luk. 8:1; Yo. 4:7-15) Batumibwa namu babaadi balungule mukandu wibuwa mu ma mbalo elekeene-lekeene.​—Bik. 17:17; 28:16, 23, 30, 31.

¹¹ Mpaa na lelo uno, kepatshila keetu nka kulungula muntu ooso mukandu wibuwa wa Bufumu. Bino abitekye kwambula kileshesho kya Yesu na batumibwa baaye pabitale mudimo wa kwikasha bantu bu balongi, mpaa na kushinguula mushindo ukwete kushintuluka myanda ya bantu ba mu teritware eetu. (1 Kod. 7:31) Kileshesho, balungudi mboobeshe kwenda mu kutala bantu mu ma mbalo a busunga. Mu maumbo ebungi, bulungudi bwa mu bilayi mbutuushe bipeta bibuwa, bu byabidi pabitale bulungudi bwa mu ma parke, mu ma parkinge, sunga mbalo yooso yabadi balombeene kupeta bantu. Tungi tukongye ntutuule mesa sunga matempu a mikanda mu teritware yaabo. Na dingi, biro bya filiale mbilombeene kwata mpángo ya kukita bulungudi pa mbalo i bantu bebungi abatambuka lwa ngwa, ku bukwashi bwa balungudi ba mu tukongye twi bungi. Paapa, muntu abashii bapete ku nshibo kwi balungudi mbalombeene kumulungwila mukandu wibuwa pa ingi mbalo.

¹² Nsaa y’atufumankana na bantu pa mbalo i bantu bebungi be na lukalo lwa kutambula mukandu wa mu Bible, twi balombene kwibapa mukanda wipushene na lukalo lwabo. Bwa kutamisha lukalo lwabo, we mulombene kwibapa adrese yoobe na kwata mpángo ya kwalukiila mu kwibatala, kwibalesha bya kutwela mu jw.org, sunga kwibapa adrese ya mbalo ayikitshikila bisangilo bya kakongye i peepi naaye. We mulombene kumona’shi kulungula pa mbalo i bantu bebungi mmushindo wibuwa wa kutamisha mudimo oobe wa bulungudi.

¹³ Anka lelo uno, beena Kidishitu ta mbapebwe nkapenda mudimo wa kulungula mukandu wibuwa nya. Su okyebe koobesha bwa kukwasha bangi bwa’shi bakookyele bya binyibinyi abifisha ku muwa wa ilakalayika, abitungu misango ibungi kwalukiilanga baaba bakumiine bwa’shi bapete mushindo wa kwenda kumpala na kufika bu beena Kidishitu banyingye mu kikudi.

KWALUKIILA MU KUTALA BANTU

¹⁴ Yesu balungwile balongi baaye’shi: “Anwikala tumonyi twande . . . mpaa na kufudiile nsenga.” (Bik. 1:8) Anka baadi mwibalungule dingi’shi: “Ndai kwi bantu ba miilo yoso nwibekashe bu balongi bande, . . . nwibalambukishe byabadya kukookyela byoso binenulungwile.” (Mat. 28:19, 20, Kilombeno kipya) Kwalukiila mu kutala bantu bakumiine nkulombeene kwitutwadila muloo wibungi mu mudimo wa Yehowa. Bantu abekalanga basangeele mukandu wibuwa bwa musango wa ku mpala wekalanga mwisambe nabo, abekalaa na muloo wa nkumona dingi. Nsaa ywebapa angi malongyesha a mu Bible, we mulombeene kunyingisha lukumiino lwabo mwi Efile Mukulu na kwibakwasha bwa’shi bashinguule’shi mbalanda mu kikudi. (Mat. 5:3) Su bwelumbuula kalolo na kwata mpángo ya kwalukiila mu kutala bantu pa nsaa y’abamono bu ilombane, we mulombeene kwikala na mushindo wa kubanga kulonga nabo Bible ku mashibo aabo. Kwalukiila mu kutala bantu kwikale bu kitshibilo kyoobe. Tatukwete penda kukuna ntete ya bya binyibinyi nya kadi, tukwete kwiyimyamina dingi meema.​—1 Kod. 3:6.

¹⁵ Kwalukiila mu kutala bantu nkulombeene kwikala bukopo kwi bangi. Pangi owuku ngofu mushindo wa kulungula bantu mukandu wibuwa mu kikoso, na we mufule uno mushindo wa kulungula. Kadi nsaa y’onangushena pabitale kwalukiila ku mashibo aabo bwa kwisamba nabo pabitale Bible, mbilombeene nkwikeela bukopo. Kwilumbuula kalolo akukukwasha bwa kukatusha moo. Kita moobe mooso bwa kulonda byooso byabetuleshaa mu bisangilo bya munkatshi mwa lubingo pabitale bulungudi. We mulombene dingi kukumina kwitamina mulungudi awuku bya kulungula kalolo bwadya kwenda noobe.

KULONGA BIBLE NA BANTU KU MASHIBO AABO

¹⁶ Pabaadi esamba na mwina Yuuda baadi asangeela bya binyibinyi baadi abadika Eyi dy’Efile Mukulu, mulungudi Fidipe bamwipwishe’shi: ‘Okwete kushinguula binyibinyi kyokwete kubala su?’ Yawa muntu bamwalulwile’shi: “A ne mulombeene kushinguula naminyi, su ntshi na mukunkushi?” Mu Bikitshino shapitre 8 abetulesha’shi, Fidipe babangiile pa Bifundwe bibaadi abibadika yawa muntu, aye ‘nkumuwukisha mukandu wibuwa wa Yesu.’ (Bik. 8:26-36) T’atuuku bungi bwa nsaa ibaadi Fidipe mukishe na yawa muntu nya. Anka, baadi mumupatulwile bya binyibinyi mu mushindo ubaadi yawa muntu mufikye mwina kukumiina, aye nkuteka bwa kubatshishibwa; na nkufika mulongi a Yesu Kidishitu.

¹⁷ Bantu bebungi lelo uno ta mbeubidishene na Bible nya. Byabya mbikumbeene kutunga kwibalukiila misango ibungi na kulonga nabo kantu pa kantu munda mwa mbingo, myeshi, kipwa sunga kukila paapa ku mpala kwabadya kupeta lukumiino na kulombasha myanda itekibwe bwa kubatshishibwa. Anka, lwishinko loobe na bukwashi botuusha na kifulo kyooso bwa kukwasha muntu e n’eshimba dilulame bwa’shi afikye mulongi, alukupa miloo mwanda Yesu bakwile’shi: “Mwabi wa kupana ngukile wa kupebwa.”​—Bik. 20:35.

¹⁸ Kushii mpaka, we mulombene kumona’shi bibuwa kulonga Bible na muntu ku bukwashi bwa mukanda wabadi batuushe bwa kulonga na bantu. Nsaa yotumikila malango a betupa mu bisangilo bya munkatshi mwa lubingo na kulungula na balungudi abawuku kulongyesha kalolo mu kakongye, wekala na mushindo wa kukunkusha kulonga kwa Bible akutuusha bipeta bibuwa, kukwasha bangi bwa’shi bekale balongi ba Yesu Kidishitu.

¹⁹ Su we na lukalo na bukwashi pabitale kubanga kulonga Bible na bantu, esambe na mukulu umune sunga na ungi Temwe awuku mishindo ya kulonga na bantu Bible kalolo. Binangu byabadi batuushe mu Programe a bisangilo bya Bwina Kidishitu na mudimo wetu na bileshesho abikyebe nkukwasha. Tuula lukulupilo loobe kwi Yehowa, na mulungule lukalo loobe mu luteko. (1 Yo. 3:22) Mu byooso, ata kitshibilo kya kulonga Bible na bantu ku mashibo aabo mpaa na kya kukunkusha kulonga kwa Bible mu kifuko kyoobe. Nsaa y’olongo Bible na bantu, okyebe kufwimisha muloo oobe mu bulungudi.

KUKUNKUSHA BAABA ABAKUMIINA BWA’SHI BATWELE MU NDUMBULWILO A YEHOWA

²⁰ Bantu abafiki bu beena kakongye nsaa y’atwibakwasha bwabadya kuuka Yehowa Efile Mukulu na kwikala bu balongi ba Yesu Kidishitu. Balongi ba Bible abakyebe kwenda ku mpala na kunyinga mu kikudi su abashinguula ndumbulwilo a Yehowa na kufuba pamune naaye. Kwibalongyesha mushindo wa kwibikita kwi na muulo. Ma video na broshire a Mbantu kinyi bakwete kukita akikyebe Yehowa lelo uno? bi kwanka bwa uno mwanda. Ingi myanda i mu Shapitre 4 a uno mukanda ngilombene dingi kukwasha.

²¹ Kubanga ku mbangilo kwa mwisambo oobe wa mu Bible, kwasha mulongi aukye’shi Yehowa kwete kutumika na ndumbulwilo bwa’shi mudimo wa bulungudi ukitshikye mu nsenga lelo uno. Lesha muulo wa mikanda ayikwasha bwa kulonga Bible, na opatuule mushindo wabakwete kwiyituusha na kwiyabila mu nsenga ishima ku bukwashi bwa bafubi bepane na belambule kwi Efile Mukulu. Itanyina mulongi oobe a Bible bwa’shi afikye mu bisangilo ku Nshibo ya Bufumu. Omupatulwile mushindo aukitshikaa bisangilo na omulubule kwi bakwetu be kwanka. Na muloo ooso, omukwashe dingi bwa’shi eubidishene na bangi ba Temwe ku bikongeno bya kifunda na bya mafuku asatu. Ku ino mbalo, leka muntu mupya bwa’shi emwene mushindo awulesha bantu ba Yehowa kifulo, kitundwilo kya beena Kidishitu ba binyibinyi. (Yo. 13:35) Nsaa i muntu asangeela bya binyibinyi atamisha muloo waaye bwa ndumbulwilo a Yehowa, akyebe kwifubwila ngofu peepi na Yehowa.

KUFUBA NA MIKANDA AYIPATUULA BIBLE

²² Beena Kidishitu ba ku mpala abekeele balungudi b’Eyi dy’Efile Mukulu baasha kisumi. Abaadi abatentula Bifundwe bwa kwikwasha abo banabeene na bwa kulonga mu kakongye. Abaadi abalungula bangi Eyi dya binyibinyi dy’Efile Mukulu. Mikanda ibaabadi abafundu ku maasa tayibaadi bungi na abaadi abeyilama kalolo. (Kol. 4:16; 2 Tim. 2:15; 3:14-17; 4:13; 1 Mp. 1:1) Lelo uno, ba Temwe ba Yehowa bakwete kutumika na mayele a ano mafuku bwa kutuusha nkama na nkama ya midiyo ya ma Bible na mikanda ayipatuula Bible. Bakwete kutuusha ma trakte, ma broshire, mikanda, na ma jurnale mu ndjimi nkama.

²³ Pokwete kulungula mukandu wibuwa na bangi, kita moobe mooso bwa kutumika na mikanda ya kulonga nayo Bible yabadi batuushe kwi ndumbulwilo a Yehowa. Bu byowuku bukwashi boodi mupete kukidila mu kubadika na mu kulonga kwa mikanda ya ba Temwe ba Yehowa, abikyebe nkutakula bwa kwiyipa bangi bantu.​—Eb. 13:15, 16.

²⁴ Bantu bebungi bakwete kutwela ku Internet bwa kuuka myanda ibungi. Byabya, kukatusha mikanda ayipatuula Bible, site eetu mukata a jw.org nkiina mudimo kikata bwa kupalakasha mukandu wibuwa na kutuusha bipeta bibuwa. Bantu be mu nsenga ishima mbalombeene kubadika sunga kuteemesha miisambo ya mu Bible na ya mu mikanda yeetu ayipatuula Bible yabadi bakobole mu ndjimi ibungi ku ordinatere yaabo. Baaba abapusha bukopo bwa kwisamba neetu sunga bashaale mu ma mbalo mwabashii na mushindo wa kutentekyesha na ba Temwe ba Yehowa mbalombeene kuuka myanda yatudi bakumiine ku bukwashi bwa site a jw.org pabatwele mwanka ku mashibo aabo.

²⁵ Ngi bwakinyi, abitungu kulungula bantu pabitale site a jw.org nsaa yooso yatudi na mushindo. Su muntu atutentekyesha naaye bayipusha pabitale myanda yatudi bakumiine, twibalombene kutumika na telephone sunga tablete bwa kumwaluula nka paapa. Su tubafumankana na muntu akula lungi ludimi, sunga ludimi lwa tumaama, twi bakumbene kumulesha mu site eetu bwadya kupeta Bible na mikanda ayipatuula Bible mu ludimi lwaye. Balungudi bebungi bakwete kufuba na ma video e mu site bwa kubanga kulonga Bible na bantu.

KULUNGULA MUKANDU WIBUWA APAMWEKA MUSHINDO

²⁶ Yesu balungwile bantu babaadi abateemesha eyi dyaaye’shi: ‘Nwi etaata dya pa nsenga. . . . Abitungu shi etaata dyenu diileeshe kwi bantu, bwa’shi, paabamono bikitshino byenu bibuwa batumbishe Nshenu e mwiyilu.’ (Mat. 5:14-16) Bano balongi abaadi abalesha ngikashi y’Efile Mukulu pa’bo kwambula Yesu, baadi mwakule bwaye’ye nabeene’shi: “Nee etaata dya ba pano[pa nsenga].” Yesu mmupe beena Kidishitu kileshesho pa kukita bwa’shi “etaata adifishana ku muwa” diileeshe bwa mwabi wa baaba booso abakyebe kuteemesha.​—Yo. 8:12.

²⁷ Mpoolo mutumibwa mmwitupe dingi kileshesho kya kulonda. (1 Kod. 4:16; 11:1) Pabaadi mu Atene, baadi atuusha bu kamonyi efuku dyooso mu kisalwe kwi baaba abaadi na mushindo wa ku muteemesha. (Bik. 17:17) Beena Kidishitu ba ku Fidipe abaadi bambule kileshesho kyaye. Pa mwanda wa byabya, Mpoolo baadi mwibafundjile’shi: Abaadi ‘munkatshi mwa bantu babambakane na balwishikye, mubaabadi abeelesha bu bimunyi by’etaata pano pa nsenga.’ (Fid. 2:15) Lelo uno, ku bukwashi bwa mayi na bikitshino byetu twi balombeene kukita bwa’shi bya binyibinyi bya Bufumu, bileeshe bu kimunyi nsaa yooso yatudi na mushindo wa kulungula bangi mukandu wibuwa. Eyendo, kileshesho kyetu kibuwa kya bu bantu balulame na abaakula bya binyibinyi nkilombeene kulesha bantu’shi twi belekeene na bangi. Kadi su tubebalungula mukandu wibuwa, abakyebe kuuka bwakinyi twi belekeene na bangi bantu.

²⁸ Bafubi ba Yehowa bakwete kulungula mukandu wibuwa kwi beena mufubo nabo, ku kalasa, mu mootoka, sunga ingi mbalo yabende mu kukita mifubo yaabo ya kwifuku n’efuku. Patudi mu lwendo, twi balombeene kwikala na mushindo wa kwisamba na bantu batwende nabo. Atwe banabeene, abitungu twikale bapasukye pabitale mushindo wa kushintuula mwisambo bwa kutuusha bukamonyi. Twilumbuleyi bwa kwisamba na bangi apamweneka mushindo ooso wawa.

²⁹ Atwikala na lukalo lwa kukita byabya su twi batuule mu binangu’shi tukwete kulangwila Mupangi eetu na kutumbisha eshina dyaaye. Na dingi, twi balombene kukwasha baasha mashimba alulame bwabadya kuuka Yehowa bwa’shi abo namu bamufubile na bekale na lukulupilo lwa muwa alutuukila ku lukumiino mwi Yesu Kidishitu. Yehowa asangala p’atukitshi byabya na ebyata bu mudimo wiselele.​—Eb. 12:28; Kibaf. 7:9, 10.

TERITWARE

³⁰ Kikyebe ky’eshimba dya Yehowa nkya’shi mukandu wibuwa ulungulwe mu nsenga ishima, mu bibundji bikata na mu misumba. Bwa kwibikita, tukongye, mpaa na bantu bakwete kufubila kula, mbebape teritware kwi biro bya filiale. (1 Kod. 14:40) Bino bi mumune na bibaadi mpángo y’Efile Mukulu mu siekele a ku mpala. (2 Kod. 10:13; Nga. 2:9) Bu bikwete kupalakana mudimo wa Bufumu lubilolubilo mu ano mafuku a ku nfudiilo, kwi bibungi bikwete kukitshibwa nsaa i teritware a kakongye mmulumbuulwe kalolo.

³¹ Ino mpángo ayitukilaa kwi mukunkushi a mudimo. Mufubi a midimo mmulombeene kufuba mu kwabila kwa ma teritware. Kwi mishindo ibidi ya ma teritware, teritware ya tusaka na ya muntu bupenka. Nsaa yabadi baleshe pafudiile teritware, mukunkushi a kasaka ka bulungudi akyebe kwikala na teritware a kasaka kaaye abadi balombeene kulungula kwi bantu ba mu kasaka kaaye. Ku lungi lupese, pakudi teritware mukata, mulungudi ooso mulombeene kwikala na aaye teritware.

³² Mulungudi e na teritware aaye mulombeene kwikala na mbalo ya kukita bulungudi nsaa yakushii kisangilo kya bulungudi, sunga pakushii mushindo wabadya kwibunga booso mu kasaka. Kileshesho, bangi balungudi abapetaa ma teritware peepi na mbalo yaabo ya mufubo na abalungulaa mwanka mu nsaa ya kwikisha. Bingi bifuko abipetaa teritware peepi na mbalo yabadi bashaale, na mbalombeene kulungula mwanka ku kyolwa. Kwikala na teritware mwipushene na nshalelo a mulungudi nkulombeene kumukwasha bwadya kukisha nsaa ibungi mu bulungudi. Eyendo, mu teritware a muntu bupenka mbalombeene dingi kwimufuba kwi kasaka. Su we na lukalo lwa kupeta oobe teritware, we mukumbeene kuteka mukwetu kwete kwabila ma teritware.

³³ Byabikala’shi mulungudi a mukandu wibuwa, sunga mukunkushi a kasaka ka bulungudi bapete teritware, abitungu akite mwaye mooso bwa kwisamba na bantu ku nshibo yooso. Mpángo ayatshibwa bwa kufunda myanda ya teritware mushima bibuwa ipushene na miiya y’eumbo. Ooso mukunkushi a kasaka ka bulungudi sunga mulungudi apete teritware, abitungu akite mwaye mooso bwa kumwifunya ooso mushima munda mwa myeshi inanka. Su bapudisha, abitungu alungule mufubi a midimo atalaa myanda ya teritware’shi, yawa teritware baapu. Muyiile myanda i kwanka mukunkushi a kasaka ka bulungudi sunga mulungudi mmulombeene kutungunuka na kufuba mu yawa teritware sunga kumwalwisha mufubi.

³⁴ Nsaa i beena kakongye booso abafubu mu buumune, mbalombeene kupudisha teritware ooso kalolo. Kukita bwa’shi balungudi babidi tabafumankananga mu teritware umune, nkulombeene kukwasha bwa kupela kutondesha bantu. Su tubakitshi byabya, atukyebe kuleesha kaneemo kwi bakwetu na kwi bantu be mu territware.

KWIPUSHENA BWA KULAMBUKISHA BANTU BA NDJIMI YOOSO

³⁵ Muntu ooso e na lukalo lwa kulonga pabitale Yehowa Efile Mukulu, Mwan’aye, na Bufumu bwaye. (Kibaf. 14:6, 7) Twi na disanka dya kukwasha bantu abakula ndjimi yooso bwa’shi betanyine eshina dya Yehowa bwa badya kufwala bumuntu bupya na kupeta kipandjilo. (Lom. 10:12, 13; Kol. 3:10, 11) Nkalakashi kinyi yatupetaa nsaa yatwende na mukandu wibuwa kwi bantu abakula ndjimi ilekeene-lekeene? Mushindo kinyi watudi balombeene kwiyipudisha bwa’shi bano bantu bapete mushindo wa kuteemesha mukandu wa Bufumu mu ludimi lwabapusha kalolo?​—Lom. 10:14.

³⁶ Ababilaa teritware muyiile ludimi. Byabya, mu mbalo y’abesamba ndjimi ilekeene-lekeene balungudi ba mu tukongye twilekene abalungulaa mukandu wibuwa mu aa ma mbalo. Yaaya nsaa, bibuwa’shi balungudi ba mu kakongye kooso bakite bukopo bwa kulungula penda bantu abakula ludimi lwabo. Mbalombeene kukita dingi byabya nsaa y’ababila masaki a kwitamina nao bantu ku kipwa kyooso. Anka, p’abalungula mukandu wibuwa mbalo i bantu bebungi na apamweka mushindo, balungudi mbalombeene kutentekyesha na muntu ooso na kutuusha mikanda mu ludimi looso.

³⁷ Ingi nsaa, tukongye twa ingi ndjimi ntulombeene kukutwa mushindo wa kwendanga mu teritware e kwi bula. Yaaya nsaa, bakulu bakwete kukunkusha mudimo be mu twatwa tukongye abitungu besambe pamune mushindo wabadi balombeene kulungula mukandu wibuwa mu uno teritware. Bino abikwasha bwa’shi muntu ooso apushe mukandu wa Bufumu na kukwasha bwa’shi boso tabakishanga nsaa mu kwisamba nka na bantu bamune.​—Nki. 15:22.

³⁸ Nkinyi kyatudi balombeene kukita su tubafumankana na muntu akula lungi ludimi? Tatupwandjikishanga shi akufiki mulungudi kwete kwakula lwalwa ludimi bwa kwisamba naye nya. Bangi balungudi mbalongye mushindo ubofule wa kubanga mwisambo mu ludimi lwabesamba kwi bantu baabafumankana nabo mu teritware aabo. Twi balombeene kulesha muntu mushindo wadya kubadika sunga kwata mikanda mu ludimi lwaye mu site eetu a Internet, jw.org, sunga kumutwadila mikanda i mu ludimi lwaye.

³⁹ Su yawa muntu alesha’shi asangeela bya binyibinyi, abitungu tukimbe muntu mukumbeene kumukwasha mu ludimi lwawuku. Twi balombeene dingi kumulesha kakongye ke peepi mwabesamba ludimi lwaye. Su akumiina’shi bafikye mu kumutala kwi muntu esamba ludimi lwaye, twi balombeene kumulesha mushindo wadi mukumbeene kufunda eshina dyaaye na mbalo yadi mushale mu site a jw.org. Kunyima biro bya filiale abitatshisha bwa kupeta mulungudi e peepi naaye, kisaka, sunga kakongye kalombeene kumukwasha bwa’shi awukye myanda ibungi.

⁴⁰ Abitungu tutungunukye na kwenda kwi muntu asangeela bya binyibinyi mpaa na nsaa yetulungula’shi bapete muntu akula ludimi lwaye. Ingi nsaa, biro bya filiale mbilombeene kuukisha bakulu’shi ta mbipete mulungudi mulombeene kukwasha yawa muntu akula lungi ludimi nya. Su tubapusha byabya, abitungu tukite mwetu mooso bwa kutungunuka na kwalukiila mu kutala yawa muntu bwa kunyingisha lukalo lwaye. Pakudi mushindo, twi balombeene kulonga naaye Bible, pangi na mukanda wi mu ludimi lwaye. P’atufubu kalolo na bileshesho na kumulungula bwa’shi abadikye verse yabadi bateemune, akapusha malongyesha a mbangilo a mu Bible. Su e na mwina kifuko awuku ludimi lwaye na akula ludimi lwa mbalo yanudi bashaale mmulombeene kukumiina kukwasha bwa kupatuula.

⁴¹ Bwa kuludika muntu basangeela bya binyibinyi bwa kutwela mu ndumbulwilo a Efile Mukulu, abitungu tumwitanyine mu bisangilo, sunga byekala’shi taapusha byooso byabakula mwanka. Su abateemuna Bifundwe, twi balombene kumukwasha bwa kupeta wawa mukanda mu Bible e mu ludimi lwaye su twi naye paapa. Kwibunga neetu mu bisangilo nkulombeene kumunyingisha na kumukwasha bwa kwenda ku mpala mu kikudi.

⁴² Tusaka: Kasaka akekalaa na balungudi abalungula mukandu wibuwa mu ludimi lwilekeene na lwa kakongye, sunga mwakutwa kwikala mukulu sunga mufubi a midimo mulombeene kukunkusha bisangilo bya ku lubingo mu lwalwa ludimi. Biro bya filiale mbilombene kukumina’shi kakongye ke na kasaka su, kaaka kasaka kabalombasha ino myanda ayilondo:

1. (1) Kwi ndambo ya bantu yaaya mbalo abesamba lungi ludimi lwilekeene na lwa kakongye.

2. (2) Kwi ndambo ya balungudi abawuku lwalwa ludimi sunga’shi abakumiina kulonga lwanka.

3. (3) Kasaka ka bakulu akakumiina kukunkusha mudimo wa bulungudi mu lwalwa ludimi.

Su kasaka ka bakulu akakyebe kutuula kasaka, bakulu mbalombeene kwiwukisha mukunkushi a kifunda. Mulombeene kuuka tungi tukongye twi na lukalo lwa kulungula bantu abesamba lwalwa ludimi na mmulombene kwibawukisha myanda ina muulo bwa kuuka kakongye ke na mushindo wa kukunkusha kaaka kasaka. Su abapu kusangula kakongye, bakulu abatumu mukanda ku biro bya filiale bwa kuteka matalwa a kukuminyibwa bwa kutuula kasaka mu kakongye kaabo.

⁴³ Bisaka: Biro bya filiale mbilombene kukumina’shi kakongye ke na bisaka su kyakya kisaka kibalombasha ino myanda ayilondo:

1. (1) Kwi lukalo lukata na abimweneka’shi nkulombene kutuka balungudi bebungi mu ludimi kampanda.

2. (2) Kwi ndambo ya balungudi abakula lwalwa ludimi sunga abalongo lwanka.

3. (3) Kwi mukulu sunga mufubi a midimo munyingye mukumbene kutwala bushito na kukunkusha sunga kisangilo kimune kya ku lubingo​—sunga kipindji kya kisangilo kya ku lubingo, bu mwisambo wa bantu booso sunga kulonga kwa Kitenta kya Mulami​—mu lwalwa ludimi.

Su ino myanda ibalombana mu mushindo kampanda, kasaka ka bakulu nkalombene kutuma mukanda ku biro bya Filiale na kulesha kantu pa kantu byoso bi kwanka bwa kuteka matalwa a kwikala na kutuula kisaka mu kakongye kaabo. Mukulu sunga mufubi a midimo akunkusha kino kisaka aketaminyibwa bu “mukukunkushi a kisaka” sunga “mufubi a kwasha kisaka” mupebwe bushito bwa kukunkusha kisaka.

⁴⁴ Su abapu kutuula kisaka, kasaka ka bakulu ba mu kaaka kakongye nkalombene kutala su bingi bipindji bya mu kisangilo mbalombeene kwibikumbasha mpa na misango ilombeene kukitshika bisangilo ku mweshi. Mbalombeene kulumbuula dingi Kisangilo kya mudimo wa bulungudi bwa kyakya kisaka. Booso be mu kisaka abafubu ku bukunkushi bwa kasaka ka bakulu akakunkusha kyakya kisaka. Bakulu abakyebe kwikala na nkatshinkatshi nsaa yabatuusha bukunkushi na kwata mpángo ya kulombasha nkalo ya kisaka. Nsaa i mukunkushi a kifunda afubu na kisaka mu lubingo lwadi mufikye mu kutala kakongye, akyebe kutuma rapore ya kyakya kisaka ku biro bya filiale mu kikoso bwa kulesha mushindo wakyende ku mpala na lukalo kampanda lwi kwanka. Apalombana nsaa, abikekala buwa bwa’shi kisaka kifikye bu kakongye. Su booso abafubu abatumikila bukunkushi bwa teokrasi, Yehowa asangala.​—1 Kod. 1:10; 3:5, 6.

BULUNGUDI BWA MU KISAKA

⁴⁵ Beena Kidishitu booso belambule be na bushito bwa kulungula bangi mukandu wibuwa. Kwi mishindo ibungi yatudi balombeene kukita byabya, kadi bebungi abasangeela kwenda mu bulungudi na bangi. (Luk. 10:1) Pa mwanda wa byabya, tukongye atwibungaa bwa kisangilo kya mudimo wa bulungudi mu dya mposo na dya lubingo dyooso mpaa na munkatshi mwa lubingo. Bipungo bya kwikisha mbilombeene dingi kwikala mushindo wibuwa wa kulungula mukandu wibuwa mu kisaka, mwanda bakwetu balume na bakashi bebungi ta be ku mifubo yaabo nya. Komite a mudimo a kakongye nyi alumbuula bisangilo bya mudimo mu nsaa na mbalo ayobesha kufika balungudi ku namashika na ku kyoolwa.

⁴⁶ Kulungula mukandu wibuwa mu kisaka akukwasha balungudi bwa kufuba pamune na “kunyingishibwa pamune.” (Lom. 1:12) Balungudi bapya mbalombeene kufuba pamune na balungudi bakulu bapwe kunyinga bwa’shi balongye bya kufuba. Mu angi ma mbalo, balungudi babidi sunga bebungi mbalombeene kufuba pamune bwa kupela masaku. Sunga wekala na lukalo lwa kwenda bupenka mu teritware, kwibunga pamune na kisaka nkulombeene kunyingisha booso be mwanka. Penda kuuka’shi bangi be mu bulungudi, nukwete kufuba nabo pa mbalo imune, nkulombeene kukunyingisha. T’abitungu’shi ba mbala-mashinda na bangi balungudi bemone bu’bo be na kitungo kya kutwela mu kisangilo kyooso kya bulungudi kyabadi balumbuule kwi kakongye, bikishekishe su kyakya kisangilo akikitshika efuku dyooso. Anka, mbilombeene kwikala buwa bwa’shi bapetekyelwe ata ku bingi bya ku bisangilo abikitshika ku lubingo looso.

⁴⁷ Atwe booso tulondeyi kileshesho kyabadi balekye kwi Yesu na batumibwa baaye! Twi bakumbeene kupeta mwabi wa Yehowa nka nsaa y’atwipaana mu kukita na bukome bwetu booso mudimo wa kulungula mukandu wibuwa wa Bufumu.​—Luk. 9:57-62.