Twi balombeene kutumbisha Yehowa dingi kukila

1. Mpàngo kinyi ipya ilombeene kwitukwasha bwa ‘kutumbisha Yehowa bikata’?

¹ Mu mweshi wa Kasatu ushaale, mbate mpàngo ipya, bwa kukwasha balungudi bwashi bekale na mushindo wa kukita mudimo wa bu mbala-mashinda mukwashi atumika nsaa 30 mu mweshi wa Kasatu na wa Kananka ku kipwa kyooso, mpa na mu mweshi ooso aufiki mukunkushi a kifunda mu kutala kakongye. Su lubingo alufiki mukunkushi a kifunda mu kutala kakongye lwi kipindji mu mweshi umune na kingi kipindji mu ungi mweshi, mulungudi mukumbeene kusangula umune wa ku yaaya myeshi bwa kufuba bu mbala-mashinda mukwashi munda mwa nsaa 30. Ba mbala-mashinda bakwashi booso mbalombeene kutwela mu kisangilo kyooso kishima akikitshi mukunkushi a kifunda na ba mbala-mashinda ba myeshi yooso na ba nsaa yooso. Bino abipatuula shi su atumono shi tatwi balombeene kulombasha nsaa 50, twi balombeene kubanga ‘kutumbisha Yehowa bikata’ bu mbala-mashinda mukwashi misusa inanka ku kipwa p’atulombasha nsaa 30!—Mis. 109:30; 119:171, EEM.

2. Baaba abakumiina kwikala bu ba mbala-mashinda bakwashi mu mafuku aafiki mukunkushi a kifunda mu kutala kakongye kaabo abapete miloo kinyi?

² Apafiki mukunkushi a kifunda mu kutala kakongye: Binobino, bantu bebungi abakumiina kwikala ba mbala-mashinda bakwashi mu mafuku aafiki mukunkushi a kifunda mu kakongye keenu na bwa kwinyingishena nsaa yabafubu naaye mu mudimo wa bulungudi. (Lom. 1:11, 12) Ba mbala-mashinda bakwashi bebungi mbalombeene kwata efuku dimune munkatshi mwa lubingo bwa kwenda na mukunkushi a kifunda mu mudimo wa bulungudi. Baaba abendaa ku mudimo mbalombeene kuteka mukunkushi a kifunda bwa kwenda naaye mu bulungudi mu dya Mposo sunga mu dya Lubingo. Na dingi, ba mbala-mashinda bakwashi nsaa yabatwele pamune mu kisangilo kya ba mbala-mashinda ba myeeshi yooso na ba nsaa yooso abanyingishibwa ngofu!

3. Bwakinyi mafuku a Kitentekyesho e buwa bwa ba mbala-mashinda bakwashi?

³ Mu mweshi wa Kasatu na wa Kananka: Baaba booso abakitshi mufubo wa bu mbala-mashinda mukwashi munda mwa nsaa 30 sunga musango umune ku kipwa mu mafuku a Kitentekyesho kya lufu lwa Kidishitu bwa nsaa 30, mbalombeene kutamisha “mulambu [wabo] wa ntumbo”! (Eb. 13:15, NW) Mweshi wa Kasatu na wa Kananka wi buwa bwa kutamisha mufubo wetu na kufuba bu mbala-mashinda mukwashi. Kipwa kyooso mu yaaya myeshi atukitshi mufubo wi buwa wa kwitamina bangi bwa kupetekyelwa ku Kitentekyesho kya lufu lwa Kidishitu. Na dingi bu bi bantu bebungi bakwete kutamisha mufubo wabo mu mafuku a Kitentekyesho, twi balombeene kufuba na balungudi belekenelekene. Kunyima kwa Kitentekyesho, atukatala dingi bantu booso bafikile ku Kitentekyesho bwa kwibanyingisha bwashi bafikye mu kuteemesha mwisambo wa muulo ukata aukitshika mu tukongye twa mu nsenga ishima lwalwa lubingo. Eshimba dyoobe dikwete nkutakula bwa kutumika bu mbala-mashinda mukwashi mu ano mafuku ababetupa mushindo wa kutumika bwa nsaa 30 su?—Luk. 6:45.