Kulekyela kwa bantu ma jurnale—akukwasha bwa kubanga kulonga Bible na bantu
1. Bwakinyi takudi mafuku ebungi ndumbulwilo a Yehowa kwete kunyingisha balungudi ba mukandu wibuwa bwa kwikala na kiubishi kya kwikala na bantu babakwete kulekyela ma jurnale?
1 Bantu bebungi tabakumiinaa kulonga Bible netu nya, kadi abakuminaa kubadika ma jurnale eetu. Byabya, takudi mafuku ebungi ndumbulwilo a Yehowa kwete kunyingisha balungudi ba mukandu wibuwa bwa kwikala na kiubishi kya kwikala na bantu babakwete kulekyela ma jurnale. Bu bii bantu ababadika ma jurnale eetu misusa yooso, byabya abapete malaka a Eyi dy’Efile Mukulu. (1 Mp. 2:2) Kunyima, bintu byababadika mbilobeene kwibakuma ku mashimba, na kwibatakula bwa kukumiina bwashi balongye Bible.
2. Mushindo kinyi watudi balombeene kwibwesha lukalo kwi bano batukwete kulekyela ma jurnale?
2 ‘Myamina meema’ ku ntete ya bya binyibinyi: Pamutwe pa kuleka ma jurnale nka bisumanga, esambe na sha-nshibo na kukimba bya kudya naye bukuuku. Bino abikyebe nkukwasha bwa kuuka nshalelo aaye, myanda yasangelaa, na nkumino yaaye, bino abikukwasha bodya kwakula na kapatupatu. (Mye. 16:23) Elumbuula mususa ooso wende mukutala muntu. Su kwi mushindo, akula mu kikoso, oleeshe mwanda umune na ma verse bi mu jurnale, omyamine meema ku ntente ya binyibinyi i mwishimba dyaaye. (1 Kod. 3:6) Funda efuku dy’oyikalanga mwende mu nkamutala, mukanda oyikalanga mulekye, na mwisambo na ma verse anwikalanga babadikye.
3. Mmisusa bungi kinyi yatudi mulombeene kwalukiila mu kutala baaba batwikalanga balekyele ma jurnale?
3 We kwalukiila mu kwibatala misusa bungi kinyi? We mulombeene kwalukiila mweshi ooso bwa kuleka jurnale ooso mupya kwi baaba booso bolekyelaa ma jurnale. Byabya, muyile nshalelo oobe na lukalo lwa muntu, we mulombeene kwata kitshibilo kya kumutembela misusa ibungi. Bu kileshesho, lubingo lumune sunga ibidi kunyima kw’obe kumulekyela ma jurnale, we mulombeene kwalukiila na kumulungula shi: “Nafiki bwa kapindji kapeela bwa kutaluula ungi mwanda wi mu jurnale anyikalanga mukulekyele.” Bino abikyebe kupa muntu lukalo lwa kubadika mwisambo kampanda. Su mmupwe kumubadika, we mulombeene kumwipusha mushindo wanangusheena pabitale wawa mwisambo na kwisamba naye mu kikoso. Sunga shi su asangeela kubadika mikanda yetu, we mulombeene kwalukiila na kumulesha trakte, broshire, sunga mukanda watufubu nao wawa mweshi.
4. Misusa yooso, nkinyi kyatudi balombeene kukita akilesha shi baaba bantu batukwete kulekyela ma jurnale mbalombeene kwikala na lukalo lwa kulonga Bible?
4 Totengyelanga bwashi sha-nshibo akulungule bwa kulonga naye Bible. Ata mpàngo. Sunga shi kumpala baadi mupele kulonga nobe Bible, nsaa yooso we mulombeene kumuleesha mwisambo wi mu Kitenta kya Mulami wi na mutwe wa mwanda awamba shi “Myaluulo ku nkonko ya mu Bible” na omutale su akumiina kwisamba nobe. Pangi we mulombeene kubanga kulonga naye bwa musango wa kumpala kwaye ku nshibo. Byabya, su kwi mushindo washi nwabanga kulonga, nwi balombeene kutungunuka na kumupa ma jurnale bwa kutamisha lukalo lwaye.